រាជធានីភ្នំពេញ ៖ គិតត្រឹមរយៈពេល៤ខែដើមឆ្នាំនេះ ទំហំពាណិជ្ជកម្មទ្វេភាគីរវាងកម្ពុជា-ថៃ មានទឹកប្រាក់ប្រមាណ១,៧ប៊ីលានដុល្លារ ក្នុងនោះ ថៃនាំចូលមកកម្ពុជាប្រហែល១,៤ប៊ីលានដុល្លារ ចំណែកកម្ពុជានាំចេញទៅវិញមានប្រមាណ៣៥០លានដុល្លារ ។ បើធៀបនឹងរយៈពេលដូចគ្នាកាលពីឆ្នាំ២០១៥ ថយចុះប្រហែល១៥%។ នេះបើតាមមន្ត្រីប្រចាំស្ថានឯកអគ្គរាជទូតថៃនៅកម្ពុជា ។
ថ្លែងក្នុងសន្និសីទសារព័ត៌មានស្តីពីការរៀបចំពិព័រណ៍ពាណិជ្ជកម្មថៃ ក្នុងឆ្នាំ២០១៦ កាលពីព្រឹកថ្ងៃទី២០ មិថុនា កន្លងមក លោកស្រី ជីរ៉ាណាន់ វង្សមង្គល អគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃនៅកម្ពុជា បានឲ្យដឹងថា ការនាំទំនិញរបស់ថៃមកកម្ពុជា បានថយចុះ២០% តែកម្ពុជានាំចេញទៅវិញកើនឡើង១២% ។
លោកស្រីបញ្ជាក់ថា មូលហេតុសំខាន់ដែលការនាំចូលរបស់ថៃមកកម្ពុជា ធ្លាក់ចុះនេះគឺ ១-តម្លៃប្រេងឥន្ធនៈចុះថោក ដែលកាលពីមុនក្នុងមួយបារ៉ែលមានតម្លៃរហូតដល់១០០ដុល្លារ តែឥឡូវនេះ តម្លៃប្រហែល៥០ដុល្លារប៉ុណ្ណោះ។ ២-ការនាំចូលសម្ភារគ្រឿងសំណង់របស់កម្ពុជា បានថយចុះ ពីព្រោះកម្ពុជាបានងាកទៅនាំផលិតផលទាំងនេះពីប្រទេសចិន វៀតណាម ឬប្រទេសផ្សេងៗជំនួសវិញ និង៣-ក្រៅពីកាត់បន្ថយការនាំចូលពីបរទេស កម្ពុជាថែមទាំងអាចផលិតស៊ីម៉ង់ត៍បានជាច្រើនលានតោន និងផលិតផលប្រើប្រាស់ផ្សេងទៀត ។
ចំពោះការនាំចេញទំនិញទៅថៃមានការកើនឡើងនោះ បើតាមមន្ត្រីអ្នកនាំពាក្យក្រសួងពាណិជ្ជកម្ម បានឲ្យដឹងថា ដោយសារតែកម្ពុជាអាចគ្រប់គ្រងលំហូរពាណិជ្ជកម្ម និងការកត់ត្រាបានប្រសើរជាងមុន ។ កម្ពុជាមានគោលនយោបាយជួយផ្សព្វផ្សាយផលិតផលលើគ្រប់វិស័យ ហើយបានបំផុសតាំងពីការដាំដុះ ការផលិត រហូតដល់ការនាំចេញ ។ ទន្ទឹមនឹងនេះ រាជរដ្ឋាភិបាលបានខិតខំផ្សព្វផ្សាយគ្រប់បែបយ៉ាងដើម្បីជំរុញការនាំចេញផលិតផលក្នុងស្រុកផងដែរ ។
លោកស្រី សឹង សុផារី មន្ត្រីអ្នកនាំពាក្យក្រសួងពាណិជ្ជកម្មកម្ពុជា បានថ្លែងថា ៖ « ពួកគាត់[អាជីវករ-ពាណិជ្ជករ]ដឹងច្បាស់ថា រដ្ឋជួយឧបត្ថម្ភអ្វីខ្លះ និងគួរនាំចេញទៅច្រកណាខ្លះ គឺពួកគាត់យល់ដឹងច្រើនជាងពេលមុន ដែលជាកត្តាធ្វើឲ្យការនាំចេញកើនឡើង » ។
លោកស្រីបានបញ្ជាក់ទៀតថា ចំពោះការនាំចូលទំនិញពីថៃថយចុះនេះ កាលពីដើមឡើយប្រភពដែលនាំចូលមានតែពីប្រទេសថៃ និងប្រទេសជិតខាងកម្ពុជាទេ ពីព្រោះរបស់វាធូរថ្លៃ ប៉ុន្តែមកដល់ឥឡូវនេះ ជីវភាពក៏កើនឡើង ហើយប្រទេសដែលធ្វើដៃគូពាណិជ្ជកម្មជាមួយកម្ពុជាទាំងនៅក្នុង និងក្រៅតំបន់មានច្រើន ជាហេតុធ្វើឱ្យតម្រូវការនៃការប្រើប្រាស់ផលិតផលរបស់ពលរដ្ឋកម្ពុជាមានការផ្លាស់ប្តូរ និងដោយសារសេដ្ឋកិច្ចប្រែប្រួលផងដែរ ។
លោកស្រី ជីរ៉ាណាន់ វង្សមង្គល ក៏បានថ្លែងដែរថា តាមការសង្កេត កម្ពុជាបានចាប់ផ្តើមផលិតទំនិញបានមួយចំនួនធំ ជាពិសេសមុខទំនិញជាម្ហូបអាហារ ដោយសារកម្ពុជាមានរោងចក្រសិប្បកម្មកែច្នៃម្ហូបអាហារបានច្រើន ដែលជាកត្ដាកាត់បន្ថយការនាំចូលនូវទំនិញទាំងអស់នោះ ។
ទោះបីយ៉ាងណា លោកស្រីរំពឹងថា នៅដំណាច់ឆ្នាំ២០១៦នេះ ទំហំពាណិជ្ជកម្មទ្វេភាគីរវាងកម្ពុជា-ថៃ អាចនឹងប្រហាក់ប្រហែលនឹងឆ្នាំ២០១៥ ដែលមានទំហំទឹកប្រាក់ចំនួន៥.៦០០លានដុល្លារអាមេរិក ។
លោកស្រីថា ៖ « ដើម្បីរក្សាកំណើនការនាំចេញទំនិញមកកម្ពុជា យើងត្រូវរក្សាទីផ្សារដែលកំពុងមានសព្វថ្ងៃនេះឲ្យបានស្ថិតស្ថេរ និងព្យាយាមផ្សព្វផ្សាយពីទំនិញរបស់ថៃ ដើម្បីឲ្យមានលក់នៅគ្រប់ទីផ្សារនៃខេត្ត-ក្រុងរបស់កម្ពុជា។ លើសពីនេះទៀត យើងព្យាយាមពង្រីកទីផ្សារនៅកម្ពុជា សម្រាប់មុខទំនិញថ្មីដែលមិនទាន់មានលក់ផងដែរ តាមរយៈការរៀបចំតាំងពិព័រណ៍ ដោយផ្តល់ឱកាសដល់ពាណិជ្ជករថៃអាចយកផលិតផលរបស់ខ្លួនមកតាំងបង្ហាញជូនអាជីវករ និងអ្នកប្រើប្រាស់នៅកម្ពុជាបានឃើញនិងស្គាល់ ហើយក៏ជាការសាកល្បងទីផ្សារទំនិញថ្មីផងដែរ ។ ពេលនោះយើងនឹងអាចពង្រីកមូលដ្ឋានទំនិញថ្មី និងមានតំណាងចែកចាយនៅកម្ពុជាបន្ថែម» ។
នេះជាហេតុផលចម្បងដែលអាចជួយរក្សានូវទំហំទឹកប្រាក់នៃការធ្វើពាណិជ្ជកម្មរួមគ្នារវាងកម្ពុជា-ថៃស្ថិតក្នុងកម្រិតដដែល និងកើនឡើងបន្ថែមទៅតាមការរៀបចំនូវយុទ្ធសាស្ត្ររបស់យើង ៕
ចែករំលែកព័តមាននេះ