បុរសដែលខឹងប្អូនថ្លៃមិនឲ្យតម្លៃខ្លួន ក៏យកសាំងដុតនោះ ត្រូវតុលាការសម្រេចហើយ
- កណ្តាល
អ្នកស្រី ពេជ ម៉ារ៉ែន ចៅក្រមស៊ើបសួរ និងជាអនុប្រធានសាលាដំបូងខេត្តកណ្តាល បានសម្រេចចេញដីកា
ខេត្តកណ្តាល ៖ នៅល្ងាចថ្ងៃទី០៦ ខែមករា ឆ្នាំ២០២២នេះ អ្នកស្រី ពេជ ម៉ារ៉ែន ចៅក្រមស៊ើបសួរ និងជាអនុប្រធានសាលាដំបូងខេត្តកណ្តាល បានសម្រេចចេញដីកាឃុំខ្លួនជនសង្ស័យម្នាក់ត្រូវជាពូសាច់ថ្លៃដែលខឹងប្អូនថ្លៃមិនឲ្យតម្លៃខ្លួនក៏យកដបសាំងមកដុតបង្កឱ្យមានការភ្ញាក់ផ្អើលកាលពីម៉ោង២០និង២០នាទីយប់ថ្ងៃទី៥ ខែមករា នៅមុខផ្ទះជនរងគ្រោះ ស្ថិតក្នុងភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាលនោះ ត្រូវបានដាក់ពន្ធនាគារជាបណ្តោះអាសន្នហើយ ពីបទ «ហិ.ង្សាដោយចេតនាមានស្ថានទម្ងន់ទោស និងប្រើប្រាស់គ្រឿង.ញៀន» តាមមាត្រា២១៨ នៃក្រមព្រហ្មទណ្ឌ និងមាត្រា៤៥ នៃច្បាប់ស្តីពីការត្រួតពិនិត្យគ្រឿង.ញៀន ។
ជនដែលត្រូវចោទខាងលើនេះមានឈ្មោះ ស្រេង ឃុន ភេទប្រុស អាយុ៣៤ឆ្នាំ មានទីលំនៅភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរកម្មករ ចំណែកជនរងគ្រោះមានឈ្មោះ ធី សំអូន ភេទប្រុស អាយុ៣៣ឆ្នាំ មានទីលំនៅភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរជាងឈើ។
បើតាមនគរបាលបានបញ្ជាក់ថា នៅវេលាកើតហេតុខាងលើ ខណៈពេលដែលជនរងគ្រោះ និងក្រុមគ្រួសារ ព្រមទាំងបងប្អូនកំពុងតែឈរនិយាយគ្នាលេងនៅមុខផ្ទះ ស្រាប់តែជនសង្ស័យដែលត្រូវជាពូសាច់ថ្លៃនៅផ្ទះជិតគ្នានោះ បានដើរមកដោយមានកាន់ដបសាំងនៅនឹងដៃផងដែរ ហើយក៏បាននិយាយថា ជនរងគ្រោះ និងបងប្អូនមិនដែលអោយតំលៃខ្លួនទេ និងបាននិយាយគំរា.មរកដុតសម្លា.ប់ជនរងគ្រោះ និងក្រុមគ្រួសារទៀតផង ទើបបណ្តាលអោយមានការឈ្លោះប្រកែកគ្នា រហូតធ្វើឱ្យជនសង្ស័យយកដបសាំងដែលកាន់នៅក្នុងដៃចាក់ជះទៅលើខ្លួនជនរងគ្រោះ រួចក៏យកដែកកេះដុត បណ្តាលអោយឆាបឆេះរលាកខ្លួនជនរងគ្រោះមួយចំហៀងខ្លួនខាងឆ្វេង និងខ្ទាតសាំងចំត្របកភ្នែកកូនតូចរបស់ជនរងគ្រោះផងដែរ ។
ប្រភពដដែលបន្តថា ភ្លាមៗនោះ មេភូមិ និងប្រជាការពារ បានឃាត់ខ្លួនជនសង្ស័យ រួចប្រគល់ជូននគរបាលប៉ុស្តិ៍កំពង់សំណាញ់ ធ្វើការសាកសួរនៅប៉ុស្តិ៍ រួចបញ្ជូនបន្តមកកាន់អធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងចាត់ការតាមនីតិវិធីច្បាប់តែម្តង។
ចែករំលែកព័តមាននេះ