អ្នកវិទ្យាសាស្ត្របានព្រមានថា បណ្តាស្ត្រីដែលនិយមទទួលទានភេសជ្ជៈផ្អែមញឹកញាប់សរុបក្នុងមួយថ្ងៃប្រហែលជា២កំប៉ុងគឺប្រឈមនឹងការកើតមានជំងឺបេះដូងឬទឹកនោមផ្អែមប្រភេទ២ជាមិនខាន ។
ការសិក្សាដែលមានរយៈពេល៥ឆ្នាំទៅលើស្ត្រីជាង៤ពាន់នាក់ អាយុចន្លោះពី៤៥ឆ្នាំទៅ៨៤ឆ្នាំធ្វើឡើងដោយ ក្រុមអ្នកវិទ្យាសាស្ត្រសាកលវិទ្យាល័យ University of Oklahoma សហរដ្ឋអាមេរិកបានបង្ហាញ អ្នកដែលចូលចិត្តផឹកភេសជ្ជៈផ្អែមដោយស្ករ(ទឹកក្រូច)ជាប្រចាំប្រឈមនឹងគ្រោះថ្នាក់ពីជំងឺបេះដូង ទឹកនោមផ្អែម ព្រមទាំងមានទំហំចង្កេះរីកធំជាងមុនទ្វេដងធៀបទៅនឹងក្រុមផ្សេងដែលមិននិយមផឹកភេសជ្ជៈផ្អែមៗ ។
វេជ្ជបណ្ឌិត Christina Shay អ្នកដឹកនាំការស្រាវជ្រាវ បាននិយាយថា បណ្តាស្ត្រីដែលផឹកភេសជ្ជៈផ្អែមដោយស្ករត្រឹម២កំប៉ុងក្នុងមួយថ្ងៃធ្វើឱ្យទំហំចង្កេះកើនឡើង ប៉ុន្តែមិនមែនកើនទម្ងន់ខ្លួនទេ ។ ដោយឡែកកម្រិតខ្លាញ់ក្នុងសរសៃឈាម(Triglycerides) របស់ស្ត្រីទាំងនេះក៏បានកើនឡើងខ្ពស់ផងដែរ ។
ក្រុមអ្នកវិទ្យាសាស្ត្របានកត់សម្គាល់ថា ភាគច្រើនស្ត្រីដែលផឹកភេសជ្ជៈផ្អែមដោយស្ករមិនមែនធាត់ឡើងទម្ងន់ធ្វើឱ្យគេដឹងបានដោយមើលឃើញតាមរយៈរាងកាយខាងក្រៅនោះទេ ។
វេជ្ជបណ្ឌិត Shy បានបន្តថា មនុស្សភាគច្រើនសន្មត់ថា អ្នកដែលបានទទួលទានភេសជ្ជៈផ្អែមដោយស្ករក្នុងចំនួនច្រើន ឱកាសនៃការធាត់ដុះពោះពិតជាកើនឡើង ។ ចំណែកការប្រឈមនឹងជំងឺបេះដូងក៏ដូចជាជំងឺទឹកនោមផ្អែមក៏បានកើនឡើងផងដែរ ។
ជាការសន្និដ្ឋានចុងក្រោយ ក្រុមស្រាវជ្រាវរបស់វេជ្ជបណ្ឌិត Shay បានបញ្ជាក់ថា ស្ត្រីអាចប្រឈមនឹងបញ្ហាសុខភាពច្រើនសន្ធឹកសន្ធាប់ជាមួយនឹងការទទួលទានភេសជ្ជៈផ្អែមៗដ្បិតពួកគេត្រូវការកាឡូរីតិចជាងបុរស៕
ចែករំលែកព័តមាននេះ