រាជធានីភ្នំពេញ ៖ កាលពីវេលាម៉ោង៩និងឹ៣០នាទីព្រឹកថ្ងៃទី២១ ខែមិថុនា ក្រុមកម្មករកម្មការិនីជាង១០០នាក់មកពីរោងចក្រក្លូប័ល អាប៉ារែល លីមីតធីត ដែលមានទីតាំងស្ថិតនៅក្នុងសង្កាត់កំបូល ខណ្ឌពោធិ៍សែនជ័យ បាននាំគ្នាមកកាន់រដ្ឋសភា ដើម្បីសុំអន្តរាគមន៍លើការទាមទារចំនួន៥ចំណុច ក្រោយពីក្រុមហ៊ុនបានប្រកាសបិទទ្វារកាលពីថ្ងៃទី៣១ ខែឧសភា ហើយការស្វែងរកជំនួយពីស្ថាប័នពាក់ព័ន្ធកន្លងមកហាក់ដូចជាមិនទាន់រកបានដំណោះស្រាយណាមួយនៅឡើយ ។
យោងតាមខ្លឹមសារញត្តិបានសរសេរថា សម្ព័ន្ធសហជីពចលនាកម្មករ(CUMW) សម្ព័ន្ធសហជីពការងារឯករាជ្យ(ILUC) សម្ព័ន្ធសហជីពអំណាចយុវជនកម្ពុជា(CYPUL) សហព័ន្ធសហជីពពលករកម្ពុជា និងសហព័ន្ធសហជីពសេរីកម្មករខ្មែរ តំណាងឱ្យកម្មករនិយោជិតនៃរោងចក្រកាត់ដេរក្លូប័ល អាប៉ារែល លីមីតធីត ដែលមានទីតាំងស្ថិតនៅក្នុងភូមិត្រពាំងទួល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ។
សូមសម្តេចពញាចក្រី ហេង សំរិន ប្រធានរដ្ឋសភា ជួយអន្តរាគមន៍ករណីកូដកម្មទាមទារលក្ខខណ្ឌការងាររបស់កម្មករនិយោជិតនៃរោងចក្រកាត់ដេរ ក្លូប័ល អាប៉ារែល លីមីតធីត ដែលកាលពីរសៀលថ្ងៃទី៣១ ខែឧសភា កន្លងមក ក្រុមហ៊ុនបានប្រកាសបិទទ្វារលែងដំណើរការ ហើយក្រុមកម្មករកម្មការិនីក៏បានចេញមកធ្វើការតវ៉ានៅខាងក្រៅបរិវេណរោងចក្រ។
ក្នុងអំឡុងពេលនៃការធ្វើកូដកម្មនេះ មិនមានការចូលរួមសម្របសម្រួលពីស្ថាប័នពាក់ព័ន្ធណាមួយឡើយ ដើម្បីពិភាក្សាស្វែងរកដំណោះស្រាយជូនកម្មករនិយោជិត ។ ញត្តិរបស់សហព័ន្ធសហជីពដែលបានទទួលការពឹងពាក់ពីកម្មករនិយោជិត ឱ្យជួយដោះស្រាយនូវសំណើមួយចំនួនរបស់ពួកគាត់មានដូចខាងក្រោម ៖
- ១-សូមឱ្យក្រុមហ៊ុនទូទាត់ប្រាក់អតីតភាពការងារជូនកម្មករនិយោជិតតាមច្បាប់ស្តីពីការងារ ។
- ២-ចំពោះកម្មករនិយោជិតដែលមានឈ្មោះត្រូវបានក្រុមហ៊ុនបញ្ឈប់ក្នុងខែឧសភា ឆ្នាំ២០១៦ មានចំនួន៦៣៥នាក់ និងកម្មករដែលមានកិច្ចសន្យានៅសល់សូមឱ្យក្រុមហ៊ុនទូទាត់ប្រាក់បំណាច់ផ្សេងៗជូនពួកគាត់ក្នុងខែមិថុនា ដូចគ្នាតែម្តងដែលរួមមាន ៖ ប្រាក់ជូនដំណឹងមុន ប្រាក់កិច្ចសន្យាការងារ ប្រាក់៥% ប្រាក់បំណាច់ឆ្នាំ ប្រាក់អតីតភាពការងារ ប្រាក់អត្ថប្រយោជន៍ផ្សេងៗទៀតជូនពួកគាត់ទាំងអស់គ្នាឱ្យបានរួចរាល់ ។
- ៣-សម្រាប់ស្ត្រីមានផ្ទៃពោះ ហើយមានអតីតភាពការងារគ្រប់មួយឆ្នាំ ក្រុមហ៊ុនគិតប្រាក់៥%នៃប្រាក់មធ្យមភាគជូនពួកគាត់ឱ្យបានគ្រប់គ្នា ព្រោះរោងចក្របានប្រកាសបិទទ្វារ ។
- ៤-ករណីក្រុមហ៊ុនគ្មានលទ្ធភាពទូទាត់ប្រាក់បំណាច់ផ្សេងៗជូនកម្មករដូចមានក្នុងចំណុចទាមទារ សូមឱ្យក្រុមហ៊ុនបន្តកុងត្រាការងារជូនកម្មករទាំងអស់ជាធម្មតាឡើងវិញ ។
- ៥-នៅពេលក្រុមហ៊ុនបិទទ្វារលែងដំណើរការ សូមឱ្យក្រុមហ៊ុនផ្តល់ជាប្រាក់ជូនកម្មករជាការលើកទឹកចិត្ត ។
តំណាងក្រុមកម្មករនិយោជិតចំនួន៥នាក់ ត្រូវបានមន្ត្រីរដ្ឋសភាអនុញ្ញាតឲ្យយកញត្តិសុំការធ្វើអន្តរាគមន៍នោះចូលទៅដាក់ផងដែរ ទើបនាំគ្នាធ្វើការរំសាយចេញពីមុខរដ្ឋសភា និងយកទៅដាក់នៅខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បន្តទៀត៕
ចែករំលែកព័តមាននេះ