កណ្តាល៖ ក្រុមក្មេងទំនើង មានគ្នា ៤នាក់ បានបង្ហោះម៉ូតូ រួចបានយកដុំថ្មគប់លើរថយន្តដឹកដី ក៏ត្រូវបានសមត្ថកិច្ចស្រុកកណ្ដាលស្ទឹង ឃាត់ខ្លួនភ្លាមតែម្តង។ ហេតុការណ៍នេះ បានកើតឡើង នៅថ្ងៃទី០៥ ខែមករា ឆ្នាំ២០២២ វេលាម៉ោង ១៣ និង០០នាទី នៅភូមិដំរីស្លាប់ ឃុំទ្រា ស្រុកកណ្ដាលស្ទឹង ខេត្តកណ្ដាល។
នគរបាល បានប្រាប់ថា ជនរងគ្រោះ ឈ្មោះ សាន់ សីម៉ា ភេទប្រុស អាយុ ៤០ឆ្នាំ មានទីលំនៅភូមិខ្នារឃុំក្រាំងធ្នង់ ស្រុកបាទី ខេត្តតាកែវ ជាអ្នកបើកបររថយន្តដឹកដី។ ជនសង្ស័យ ៤នាក់៖ ទី១ ឈ្មោះ រុន សារ៉ែន អាយុ ១៩ឆ្នាំ មានទីលំនៅភូមិចំបក់ ឃុំសៀមរាប ស្រុកកណ្តាលស្ទឹង ខេត្តកណ្ដាល មុខរបរ មិនពិតប្រាកដ ទី២ឈ្មោះ រុន ម៉ាណែត ភេទប្រុស អាយុ១៧ឆ្នាំ មានទីលំនៅភូមិចំបក់ ឃុំសៀមរាប ស្រុកកណ្តាលស្ទឹង ខេត្តកណ្តាល មុខរបរមិនពិតប្រាកដ ទី៣ឈ្មោះ ហឿន សំណាង ភេទប្រុស អាយុ១៧ឆ្នាំ មានទីលំនៅភូមិរានថ្ម ឃុំសៀមរាប ស្រុកកណ្តាលស្ទឹង ខេត្តកណ្តាល មុខរបរ មិនពិតប្រាកដ និងទី៤ឈ្មោះ សុង វណ្ណឃីម ភេទប្រុស អាយុ២០ឆ្នាំ មានទីលំនៅភូមិតាដោលទី៣ ឃុំ អំពៅព្រៃ ស្រុកកណ្តាលស្ទឹង ខេត្តកណ្តាល មុខរបរ រត់តុ។
នគរបាល បញ្ជាក់ថា នៅថ្ងៃទី០៥ ខែមករា ឆ្នាំ២០២២ វេលាម៉ោង ១២ និង០០នាទី ក្រុមជនសង្ស័យ បានជិះម៉ូតូពីរគ្រឿង មានគ្នា បួននាក់។ ឈ្មោះ រុន សារ៉ែន ជិះម៉ូតូមួយគ្រឿង ជាអ្នកបើក និងឈ្មោះ ហឿន សំណាង ជាអ្នកជិះពីក្រោយ។ ឯម៉ូតូមួយគ្រឿងទៀត បើកបរដោយឈ្មោះ សុង វណ្ណឃីម និងឈ្មោះ រុន ម៉ាណែត ជាអ្នកជិះពីក្រោយបានធ្វើដំណើរចេញពីផ្សារសៀមរាប ស្ថិតនៅក្នុងឃុំសៀមរាប តាមបណ្ដោយផ្លូវជាតិលេខ២ ឆ្ពោះទៅទិសខាងត្បូង ពេលទៅដល់ចំនុចស្ពាន កំពង់កោរ ព្រំប្រទល់ខេត្តតាកែវ ក្រុមជនសង្ស័យទាំង ៤នាក់ បានបត់ ចូលតាមផ្លូវកៅស៊ូ ទើបធ្វើថ្មី ឆ្ពោះទៅវត្ត កោះសុក្រំ ឃុំទ្រា ពេលជិតដល់កន្លែងកើតហេតុក្រុមជនសង្ស័យ បាននាំគ្នា បង្ហោះម៉ូតូ ហើយបានជួបនឹងរថយន្តដឹកដីមួយគ្រឿង ជិះមកពីក្រោយ ពេលនោះ រថយន្តដឹកដី បានស៊ីផ្លេពីក្រោយ ហើយបើកវ៉ាក្រុមជនសង្ស័យទៅ ភ្លាមនោះ ក្រុមជនសង្ស័យ ខឹង ក៏ជិះម៉ូតូដេញតាមពីក្រោយ ហើយបានវ៉ា រួចឈប់ចាំ ពេលរថយន្តដឹកដីបើកមកដល់ ក្រុមជនសង្ស័យ បានយកដុំថ្ម គប់ទៅលើរថយន្តរបស់ជនរងគ្រោះ បណ្តាលអោយបែកកញ្ចក់ទ្វាររថយន្តផ្នែកខាងឆ្វេង ០១ផ្ទាំង។ ភ្លាមនោះ ជនរងគ្រោះ បានឈប់រថយន្ត ហើយសួរនាំ ឃើញដូចនោះ ក្រុមជនសង្ស័យ បានជិះម៉ូតូរត់គេចខ្លួន។
ដោយឡែកឈ្មោះ ហឿន សំណាង បានព្យាយាមរត់ តែត្រូវជនរងគ្រោះ ចាប់នាំទៅប៉ុស្តិ៍នគរបាលរដ្ឋបាលឃុំទ្រា ដើម្បីដាក់ពាក្យបណ្ដឹង។
ភ្លាមនោះ កម្លាំងប៉ុស្តិ៍នគរបាលរដ្ឋបាលឃុំទ្រា បានបញ្ជូនជនសង្ស័យទៅកាន់អធិការដ្ឋាន ដើម្បីសាក់សួរ ក្រោយការសួរកម្លាំងផ្នែកព្រហ្មទណ្ឌស្រុកកណ្តាលស្ទឹង បានឃាត់ខ្លួនជនសង្ស័យចំនួនបីនាក់ទៀត បញ្ជូនមកកាន់អធិការដ្ឋាននគរបាលស្រុកកណ្តាលស្ទឹង ដើម្បីកសាងសំណុំរឿង តាមនីតិវិធីច្បាប់៕ ឆ ដា
ចែករំលែកព័តមាននេះ