កណ្តាល៖ ជនសង្ស័យម្នាក់ ជាមុខសញ្ញាលួចយ៉ាងសកម្ម និងធ្លាប់ជាប់ពន្ធនាគារម្ដងរួចមកហើយនោះ ត្រូវបានសមត្ថកិច្ចនគរបាលក្រុងតាខ្មៅ ធ្វើការឃាត់ខ្លួនបានម្ដងទៀត ដោយជនសង្ស័យ បានធ្វើសកម្មភាពលួចទ្រព្យអ្នកដទៃ។ ជនសង្ស័យ ឆ្លើយថា ដោយសារអត់លុយទិញបាយហូបចំនួនបីថ្ងៃហើយ ទើបលួចគាស់ផ្ទះគេ។
ហេតុការណ៍នេះ បានកើតឡើងនៅថ្ងៃទី៥ ខែមករា ឆ្នាំ២០២២ វេលាម៉ោង ១១ និង ៣០នាទី នៅចំណុចផ្ទះទុកចោល ក្នុងភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល។
នគរបាលបានអោយដឹងថា ជនសង្ស័យ ឈ្មោះ កែវ យ៉ត ហៅម៉ៅ ភេទប្រុស អាយុ ៣៥ឆ្នាំ ជនជាតិខ្មែរ ស្នាក់នៅម្តុំវាលខ្សាច់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបររើសអេតចាយ។
ជនសង្ស័យ ធ្លាប់ជាប់ពន្ធនាគារចំនួន ១ឆ្នាំ ក្នុងករណីប៉ុនប៉ងលួច។ កាលពីវេលាកើតហេតុខាងលើ ជនសង្ស័យ បានដើរចូលទៅក្នុងដីឡូដ៍ទំនេរ មានផ្ទះទុកចោល គ្មានមនុស្សនៅ បន្ទាប់មក បានលួចគាស់បានដែកចម្រឹងទ្វារ និងសន្លឹកទា្វរ បាន ៣ផ្ទាំង និងកំទេចដែកមួយចំនួន ហើយបានលីចេញមកក្រៅ ក៏បានជួបកម្លាំងប៉ុស្តិ៍តាខ្មៅ កំពុងល្បាត ហៅសាកសួរ រួចបញ្ជូនមកកាន់អធិការដ្ឋាននគរបាលក្រុងតាខ្មៅ ចាត់ការតាមនីតិវិធីតែម្តង។
នៅចំពោះមុខសមត្ថកិច្ច ជនសង្ស័យបានឆ្លើយថា ខ្លួនពិតជាបានចូលទៅលួចដែកទ្វារ នៅផ្ទះទុកចោលគ្មានមនុស្សនៅខាងលើ ប្រាកដមែន ដើម្បីយកដែក ទៅលក់អោយអេតចាយ យកលុយទិញបាយហូប ព្រោះអត់បាយបីថ្ងៃហើយ។ ជនសង្ស័យ ត្រូវបានឃាត់ខ្លួន នៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿង តាមនីតិវិធីច្បាប់៕ ឆ ដា
ចែករំលែកព័តមាននេះ