រាជធានីភ្នំពេញ ៖ លោក សុវណ្ណរិទ្ធី ហៅតា វ៉ិចទ័រ បានចេញមកទម្លាយការពិតនូវរឿងកូនស្រីរបស់លោក គឺ វ៉ាន់ នីឡា បានទិញផ្ទះវីឡាដែលមានតម្លៃរាប់ម៉ឺនដុល្លារ ក្នុងពេលដែលតារាកំប្លែងវ័យក្មេងរូបនេះ កំពុងកាក់កបអាជីពសិល្បៈ រួមនឹងជំនួញលក់ផលិតផលតាមអនឡាញ។
លោកតា វ៉ិចទ័រ បានចាត់ទុករឿងរ៉ាវដែលមានការចុះផ្សាយខាងលើនេះ គឺជារឿងមិនពិតឡើយ ត្បិតកូនស្រីរបស់លោកនៅមិនទាន់មានលទ្ធភាពច្រើនទិញផ្ទះដែលមានតម្លៃរាប់សិបម៉ឺនដុល្លារ ដូចការសង្ស័យពីមហាជននោះឡើយ ខណៈពេលដែលគាត់ក៏ហួសចិត្តពេលឃើញព័ត៌មានមួយនេះ។
លោក សុវណ្ណរិទ្ធី ហៅតា វ៉ិចទ័រ បានអះអាងប្រាប់កោះសន្តិភាពតាមសារអេឡិចត្រូនិចថា អ្វីដែលមហាជនបានឃើញកូនស្រីលោក នីឡា ថតនៅមុខផ្ទះវីឡានោះ គឺគ្រាន់តែជាការថតស្ពតផ្សាយពាណិជកម្មឲ្យផ្ទះនៅបុរីគេតែប៉ុណ្ណោះ មិនមែន នីឡា ទិញនោះទេ។
លោកបញ្ជាក់ថា អ្នកដែលមិនដឹងរឿង គេច្បាស់ជាយល់ច្រឡំថា នីឡា កូនស្រីរបស់លោកមានលុយសម្បើមណាស់ដែលអាចមានលទ្ធភាពទិញផ្ទះវីឡារាប់ម៉ឺនដុល្លារបែបនេះ ប៉ុន្តែធាតុពិតអ្វីដែលមហាជនបានឃើញនោះ គឺគ្រាន់តែជាការថតស្ពតពាណិជកម្មឲ្យគេតែប៉ុណ្ណោះ សូមកុំមានការយល់ច្រឡំ។
ដោយឡែកពាក់ព័ន្ធនឹងមង្គលការរបស់ នីឡា វិញ លោកតា វ៉ិចទ័រ បានលើកឡើងដដែលថា កូនស្រីរបស់លោកនឹងចូលរោងការនៅថ្ងៃទី១៨-១៩ ខែមីនា ឆ្នាំ២០២២ ខាងមុខនេះ បន្ទាប់ពីខនខានប្រមាណជា២ឆ្នាំ ដោយសារការឆ្លងរីករាលដាលនៃជំងឺកូវីដ១៩។
ជាការកត់សម្គាល់ មហាជន ជាពិសេសបណ្តាអ្នកលេងហ្វេសប៊ុកបាននាំគ្នាចាប់អារម្មណ៍យ៉ាងខ្លាំង ក្នុងពេលដែលគេបានឃើញ នីឡា បើកបង្ហាញនូវផ្ទះវីឡាដ៏ស្រស់ស្អាតមួយ ដែលនេះគេសន្និដ្ឋានថា គឺជាផ្ទះថ្មីរបស់តារាកំប្លែងស្រីរូបនេះទើបនឹងទិញមុនពេលនាងចូលរោងការ។ ម្នាក់ៗក៏លាន់មាត់សរសើរថា នីឡា ត្បិតតែនៅក្មេង ប៉ុន្តែនាងអាចមានលទ្ធភាពរកប្រាក់បានច្រើនគួរសមនៅក្នុងមួយខែៗពីការងារសិល្បៈ និងមុខរបរលក់ផលិតផលតាមអនឡាញ ខណៈពេលដែលបច្ចុប្បន្ន នីឡា ក៏បានអភិវឌ្ឍន៍ខ្លួនជាអ្នកកាត់សក់តាមរោងការផងដែរ។
កត្តានេះ គឺគ្មានអ្វីដែលពិបាកនោះឡើយសម្រាប់ នីឡា ដែលមានលទ្ធភាពទិញផ្ទះវីឡាមានតម្លៃរាប់ម៉ឺនដុល្លារបែបនេះ ក្នុងពេលដែលអនាគតស្វាមីរបស់នាងក៏ជាកូនអ្នកមានទ្រព្យសម្បត្តិមួយសមរម្យផងនោះ។
យ៉ាងណា ការពិតនៃរឿងរ៉ាវទិញផ្ទះវីឡារបស់ នីឡា នាពេលនេះ ក៏បានបើកបង្ហាញការពិត បន្ទាប់ពីឪពុករបស់នាង គឺលោក សុវណ្ណរិទ្ធី ហៅតា វ៉ិចទ័រ ចេញមកបកស្រាយ និងធ្វើការបដិសេធចោលទាំងស្រុងនូវព័ត៌មានដែលបានចុះផ្សាយ និងការយល់ឃើញពីមហាជនមួយចំនួននាពេលនេះ៕
ចែករំលែកព័តមាននេះ