ដំណឹងល្អ! រាជរដ្ឋាភិបាលប្រកាសបើកបវេសនកាលថ្ងៃទី ១០ មករានេះហើយ
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសជាផ្លូវការថា បវេសនកាលឆ្នាំសិក្សា ២០២១-២០២២
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសជាផ្លូវការថា បវេសនកាលឆ្នាំសិក្សា ២០២១-២០២២ នឹងបើកនៅថ្ងៃទី ១០ ខែមករា ឆ្នាំ២០២២។ ពោលគឺនៅសល់តែ៥ថ្ងៃទៀតប៉ុណ្ណោះ ពិសេសសម្តេចបញ្ជាក់ថា ការបើកបវេសនកាលនាថ្ងៃច័ន្ទ សប្តាហ៍ក្រោយ ក៏សម្រាប់កុមារតូចនៅកម្រិតមត្តេយ្យសិក្សាផងដែរ ។
«ខ្ញុំបានអនុញ្ញាតតាមសំណើ ពីរដ្ឋមន្ត្រីក្រសួងអប់រំ ឯកឧត្តម ហង្សជួន ណារ៉ិង ឱ្យបើកថ្នាក់មតេយ្យឡើងវិញ ពីអាយុ ៣ ឆ្នាំ ដល់ ៥ ឆ្នាំ» ។ នេះជាការប្រកាសរបស់សម្តេចតេជោ ហ៊ុន សែន ក្នុងឱកាសពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោក ពីការប្រកួតប៉េតង់ នៅទីក្រុងសាន់តាស៊ូសាណា ប្រទេសអេស្ប៉ាញ កាលពីខែវិច្ឆិកា ឆ្នាំ២០២១នៅថ្ងៃទី៥ មករា ឆ្នាំ២០២២ ។ សម្តេចតេជោ បានពន្យល់ថា បវេសនកាលឆ្នាំសិក្សាថ្មី រួមទាំងការបើកសាលាមត្តេយ្យសិក្សា នាថ្ងៃទី ១០ ខែមករា នេះ គឺវាសមល្មមនឹងបើកហើយ ព្រោះវ៉ាក់សាំងបានចាក់ស្រោច ហើយការឆ្លងក្នុងសហគមន៍វាថយ ដោយសារវ៉ាក់សាំងចាក់ស្រោច អញ្ចឹងអាយុ ៣ ឆ្នាំ ៤ ឆ្នាំ បានចាក់វ៉ាក់សាំងការបារជំងឺផ្សេងៗហើយដែរ អញ្ចឹងកំរិត នៃការឆ្លងតិចតួច ពិសេសគឺគ្មានការឆ្លងក្នុងសហគមន៍ផងដែរ ។
សម្តេចនាយករដ្ឋមន្ត្រីបន្តថា «អ៊ីចឹង សុំឱ្យអាណាព្យាបាល មាតា បិតា គឺ យកកូនចៅទៅដាក់នៅមត្តេយ្យ… បានរៀនផង បានទទួលការថែទាំផង ហើយឪពុក-ម្តាយបានទៅធ្វើការ ។ នេះជាការជូនដំណឹង១ដល់ប្រជាពលរដ្ឋទូទៅ អំពីការបើកសាលារៀន» ។ សម្តេចក៏បានផ្តាំថា «ចៅៗទាំងឡាយ ដែលត្រៀមចូលសាលា ថ្ងៃទី ១០ (មករា) ឥឡូវថ្ងៃនេះ គឺថ្ងៃទី ៥ ហើយ សល់តែ៥ ថ្ងៃទៀតទេ គឺចាប់ផ្តើមចូលសាលា ក្នុងនោះរាប់ទាំងចៅៗតូចៗ ដែលត្រូវចូលមត្តេយ្យផងដែរ» ។
«ខ្ញុំសុំនិយាយនៅថ្ងៃនេះតែម្តងថា ថ្ងៃទី ១០ ខែមករា គឺ ៥ ថ្ងៃខាងមុខនេះ គឺជាថ្ងៃបើកបវេសនកាល ឆ្នាំសិក្សា ២០២១-២០២២ ជាមួយនឹងការបើកមត្តេយ្យសិក្សា ដេលមានអាយុ ៣ ទៅ ៥ ឆ្នាំ» ។ សម្តេចបញ្ជាក់ជាថ្មីម្តងទៀត និងបានអំពាវនាវក៏ដូចជាស្នើឱ្យប្រជាពលរដ្ឋគ្រប់លំដាប់ថ្នាក់ឱ្យប្រយ័ត្នឱ្យមែនទែន រឿងវីរុសបំប្លែងថ្មី ប្រភេទ «អូមីក្រុង» ។
ជាមួយនឹងការប្រកាសបើកបវេសនកាលនាសប្តាហ៍ក្រោយ សម្តេចក៏បានប្រកាសមិនឱ្យអ្នកជំងឺកូវីដ-១៩ ប្រភេទអូមីក្រុងធ្វើការព្យាបាលនៅតាមផ្ទះបាននោះទេ ទោះស្ថិតនៅក្នុងឋានៈអ្វីក៏ដោយ គឺដាច់ខាតត្រូវព្យាបាលនៅមន្ទីរពេទ្យ ដើម្បីទប់ស្កាត់ការឆ្លងជាយថាហេតុណាមួយចូលក្នុងសហគមន៍ដែលអាចធ្វើឱ្យកម្ពុជាអាចវិលទៅរកភាពថយក្រោយ ឈានដល់ការបិទប្រទេសនោះ ៕
ចែករំលែកព័តមាននេះ