រាជធានីភ្នំពេញ ៖ តារាសម្តែងនាង ហេង ស្រីពេជ្រ នឹងបើកបេះដូងទទួលយកបុរសដែលល្អសម្រាប់ជាគូអនាគតនាឆ្នាំក្រោយ បន្ទាប់ពីអាយុរបស់នាងកាន់តែច្រើនបន្តិចហើយនោះ ខណៈពេលដែលបុរសជាគូអនាគតរបស់នាង គឺនាងនឹងមិនប្រាថ្នាអ្នកសិល្បៈដូចគ្នាឡើយ។
ប្រឡូកសិល្បៈអស់ជាច្រើនឆ្នាំ ហេង ស្រីពេជ្រ ហាក់មិនទាន់លេចលឺនូវដំណឹងស្នេហាជាមួយនឹងបុរសណាម្នាក់នៅឡើយទេ ក្រៅតែអំពីការបង្ហាញវត្តមានសម្តែងរឿងជាបន្តបន្ទាប់ស្ទើរមិនដាច់សូរ ក្នុងពេលដែលតារាស្រីរូបនេះច្រើនប៉ះតែតួម្តាយ និងជាជំទាវអ្នកមានទ្រព្យស្តុក។
យ៉ាងណាក៏ដោយ ចូលដល់ឆ្នាំថ្មីនេះ ហេង ស្រីពេជ្រ បានប្រកាសថា នាងបានត្រៀមបើកបេះដូងទទួលយកបុរសណាម្នាក់សម្រាប់ជាគូអនាគតនៅឆ្នាំក្រោយនេះហើយ ព្រោះមកដល់បច្ចុប្បន្ន នាងក៏មានអាយុរៀងច្រើនបន្តិចហើយ ហេតុនេះត្រូវដល់ពេលគិតគូរពីអនាគតខ្លួនឯង។
ហេង ស្រីពេជ្រ បានអះអាងប្រាប់កោះសន្តិភាពថា បញ្ហាគូស្រករនេះ កន្លងមកនាងក៏មានការគិតគូរខ្លះដែរ ប៉ុន្តែដោយសារនាងត្រូវពង្រឹងការសម្តែង និងការប្រឹងប្រែងរកប្រាក់ជួយទំនុកបម្រុងគ្រួសារនោះ ទើបនាងហាក់មិនសូវបានគិតគូរច្រើនអំពីរឿងនេះ។
នាងបញ្ជាក់ថា កន្លកមក ក៏មានគេចូលសួរនាំដល់ឪពុកម្តាយរបស់នាងដែរ ប៉ុន្តែនាងនៅមិនទាន់ទទួលយកបញ្ហាគូជីវិតនៅពេលនេះឡើយ ដោយសារនាងត្រូវគិតរឿងគ្រួសារជាមុនសិន ហើយណាមួយនាងត្រូវកាន់ទុក្ខប្អូនដែលទើបទទួលមរណភាពចំនួន១ឆ្នាំសិន។
បើតាម ហេង ស្រីពេជ្រ ថា ការមិនទទួលយកបុរសដែលបានចូលសួរនាំនាងកន្លងមកនោះ គឺមិនមែនបុរសទាំងនោះមិនល្អឡើយ ប៉ុន្តែដោយសារនាងមិនទាន់ចង់គិតគូររឿងគូស្រករនាពេលនោះប៉ុណ្ណោះ ព្រោះនាងត្រូវមានភារៈកិច្ចជួយទ្រទ្រង់គ្រួសារឲ្យបានល្អប្រសើរជាងនេះជាមុនសិន។
ទោះជាយ៉ាងណា នាងបញ្ជាក់ថា បញ្ហាគូស្រករនេះ នាងអាចនឹងគិតនៅឆ្នាំក្រោយ ឬអាចនិយាយថា តាមព្រហ្មលិខិតពេលណាគឺពេលនឹង ដោយនៅក្នុងនោះនាងក៏មិនប្រាថ្នាបុរសដែលជាអ្នកសិល្បៈដូចគ្នាដែរ ពោលគឺបុរសដែលមកស្រឡាញ់នាងនោះ គឺសុំត្រឹមជាបុរសដែលមានចិត្តធម៌ និងស្រឡាញ់អាណិតគ្រួសារនាងគឺគ្រប់គ្រាន់ហើយ។
ដោយឡែកសម្រាប់ការងារសិល្បៈវិញចូលដល់ឆ្នាំថ្មីនេះ ហេង ស្រីពេជ្រ នាងបានទទួលថតរឿងចំនួន២រឿង និងរឿងខ្លី៣រឿង ព្រមទាំងការថតស្ពតពាណិជ្ជកម្មចំនួន២ ខណៈពេល២រឿងដែលនាងកំពុងថតនោះ គឺសុទ្ធសឹងតែជាតួអង្គជំទាវទាំងអស់៕
ចែករំលែកព័តមាននេះ