«Mirror» របស់អង់គ្លេសផ្សាយកាលពីពេល ថ្មីៗកន្លងមកថា លោកអាន់តូនី ណេតូ អាយុ៤៦ឆ្នាំ បានខាំមុខ ហែកអាវ និងចាក់ប្រពន្ធដោយកាំបិត ព្រោះខឹងបដិសេធមិនព្រមរួមរ័ក ។ ហេតុការណ៍នេះកើតឡើងនៅតំបន់ខូលលីហើរ៍ ក្រុងម៉េនឆេស្ទ័រ ។
ប៉ូលិសមិនអាចចូលទៅផ្ទះកើតហេតុបានទេ ដូច្នេះហើយបានទម្លាយទ្វារចូល ។ នៅក្នុងផ្ទះនោះប៉ូលិសឃើញនារីអាយុ២៦ឆ្នាំ ដេកដួលទាំងឈាមដាបខ្លួននៅកាំជណ្តើរ ខណៈកូន២នាក់ អាយុ៣ឆ្នាំ និង៤ឆ្នាំ នៅក្បែរនោះ ។ ចំណែកជនល្មើសបានគេចខ្លួនបាត់ ។
សមត្ថកិច្ចប្រទះឃើញក្មេងអាយុ១ឆ្នាំម្នាក់ទៀត ដេកក្នុងអង្រឹងនៅបន្ទប់គេង ដោយមានឈាមប្រឡាក់ពេញមុខ ព្រោះការវាយប្រហារនោះកើតឡើងក្នុងបន្ទប់គេង ។ នៅបរិវេណកើតហេតុ ប៉ូលិសនាំស្ត្រីរងគ្រោះទៅមន្ទីរពេទ្យ ខណៈពេលវេជ្ជបណ្ឌិតបញ្ជាក់ថា នាងត្រូវគេចាក់រហូតធ្លាយពោះវៀន និងសួតចុះខ្សោយត្រូវសម្រាកព្យាបាលនៅមន្ទីរពេទ្យរយៈពេលជាង១ខែ ។
ក្រោយមកជនល្មើសអាន់តូនី ណេតូ ត្រូវចាប់ខ្លួនពីបទបំផ្លិចបំផ្លាញរាងកាយ និងប៉ុនប៉ងសម្លាប់ប្រពន្ធ ។ តុលាការសម្រេចឱ្យជននោះជាប់គុករយៈពេល១២ឆ្នាំ ។
នារីរងគ្រោះបានហៅណេតូទៅទទួលទានអាហារពេលល្ងាច និងតុបតែងដើមគ្រីស្មាសជាមួយគ្នា ។ នៅរាត្រីនោះណេតូ ខឹង ព្រោះនាងមិនព្រមរួមរ័ក ដូច្នេះហើយទើបគេចាក់នាងតែម្តង ៕
ចែករំលែកព័តមាននេះ