រាជធានីភ្នំពេញ ៖ តារាចម្រៀងនាង ទូច ស្រីល័ក្ខ នៅតែបង្ហាញនូវក្តីរំពឹងទុកថា នាងនឹងទទួលបានភាពយុត្តិធម៌តាមប្រព័ន្ធច្បាប់ពាក់ព័ន្ធបណ្តឹងពីអតីតស្វាមីរបស់នាងដែលបានប្តឹងទាមទារសុំសិទ្ធិយកកូនប្រុសតែមួយរបស់នាងយកទៅចិញ្ចឹម ក្រោយអ្នកទាំងពីរបានសម្រេចចែកផ្លូវគ្នាអស់រយៈពេលជាច្រើនឆ្នាំមកនេះ។
ទូច ស្រីល័ក្ខ នៅតែបង្ហាញភាពសុទិដ្ឋិនិយមថា ខ្លួននឹងអាចឈ្នះរឿងក្តីខាងលើនេះ ត្បិតប៉ុន្មានឆ្នាំចុងក្រោយនេះ នាងមានភារកិច្ចទាំងស្រុងនៅក្នុងការបីបាច់ថែរក្សាកូនតែមួយរបស់នាងតាំងពីតូចរហូតមកទល់ពេលនេះ ដោយមិនមានការជួយទំនុកបម្រុងណាមួយពីអតីតស្វាមីចាប់តាំងពីការបែកគ្នាមក។
តាមរយៈសំណេរដែលបានសរសេរបង្ហោះតាមបណ្តាញសង្គមហ្វេសប៊ុក អ្នកនាង ទូច ស្រីល័ក្ខ បានលើកឡើងថា ខ្ញុំអរគុណបងប្អូនទាំងអស់គ្នា បានផ្តល់ការស្រលាញ់ នឹងផ្តល់ការគាំទ្រ ហើយចេញជាសារលើកទឹកចិត្ត រហូតមកដល់សព្វថ្ងៃនេះ គ្រប់សកម្មភាពរបស់ខ្ញុំនឹងការងារលក់ online នឹងការលំហាត់ប្រាណរបស់ខ្ញុំជាដើម។
នាងថា ខ្ញុំជឿជាក់ថា ប្រព័ន្ធតុលាការគាត់នឹងផ្តល់ភាពយុត្តិធម៌ចំពោះខ្ញុំជាស្ត្រីខ្មែរ រឿងក្តីដែលអតីតប្តីរបស់ខ្ញុំប្តឹងទាមទារយកកូនពីខ្ញុំ ដែលរូបខ្ញុំទទួលសំពាធយ៉ាងខ្លាំងពីរូបគាត់រហូតមកដល់ថ្ងៃនេះ។
នាងបញ្ជាក់ថា គេមានក្តីសុខ គេក៏ជាអ្នកចុះចេញពីផ្ទះទៅការជាមួយស្រីថ្មី ហើយអ្វីដែលសំខាន់ បើសុខហើយនៅឡើយទាមទារអីទៀត សំខាន់កូនរស់នៅជាមួយខ្ញុំតាំងពីកើតរហូតកូនមានស្នាមញញឹម និងរឹងមាំ ឆ្លាតខ្លាំងណាស់ អាហារកិច្ចកូនគឺរូបខ្ញុំជាអ្នកទទួលរ៉ាប់រងទាំងស្រុង ថ្លៃសាលា 3000$ សំរាប់មួយថឺម ទឹកដោះគោកូន សម្ភារៈ និងការចាយវាយទូទៅ គឺខ្ញុំបំពេញសំរាប់កូនខ្ញុំ គឺមិនឲ្យទាស់។
នាងបន្តថា សុំទោស ទុក្ខបញ្ហា គឺគេជាអ្នកបង្កើតមកឲ្យខ្ញុំ រយៈពេល៣ឆ្នាំហើយ គឺបញ្ហានៅឡើយមិនទាន់ចប់ គ្មានស្រីណាទ្រាំបានក្រៅពីខ្ញុំទេ បើមិននិយាយខ្លះខ្លាចមនុស្សមួយចំនួនតូចគាត់យល់ច្រឡំគិតអ្វីដែលមិនត្រឹមត្រូវ រាប់ទាំងការផុសរបស់ខ្ញុំ អរគុណមនុស្សម្នាក់តែងតែនៅក្បែរខ្ញុំជានិច្ចនឹងផ្តល់ជាកម្លាំងចិត្ត។ ទូច ស្រីល័ក្ខ បន្ថែមថា រយៈពេលជាច្រើនឆ្នាំទទួលរងបញ្ហាជាច្រើន ក្នុងការលំបាកបានធ្វើឲ្យផ្លូវចិត្តរងសម្ភាធក្នុងបញ្ហាជីវិតជាច្រើន តែឥឡូវឆ្នាំថ្មីនេះ ខ្ញុំសន្យាលថាមិនធ្វើឲ្យខ្លួនឯងបាត់បង់ខ្លួនឯងម្តងទៀតបានទេ។
នាងបញ្ជាក់ថា ខ្ញុំនឹងប្រើជីវិតដោយពោរពេញទៅដោយស្នាមញញឹម ប្រើពេលវេលាដ៏មានន័យសំរាប់ខ្លួនឯងនឹងកូនប្រុស មួយឆ្នាំ ពីរឆ្នាំ បីឆ្នាំ បួនឆ្នាំ វាពិបាកណាស់ក្នុងការប្រឹងប្រែងដើម្បីជំនះទាំងសេដ្ឋកិច្ចដែលខ្ញុំប្រឹងសាងដោយបានជោគជ័យមួយផ្នែក យ៉ាងច្បាស់លាស់ មេម៉ាយមានអីមិនល្អ។
ជាការកត់សម្គាល់អ្នកនាង ទូច ស្រីល័ក្ខ កន្លងមក ទស្សនិកជនបានដឹងគ្រប់គ្នាហើយអំពីរឿងរ៉ាវនៃការបែកបាក់ស្វាមីសញ្ជាតិហូឡង់ លោក Morten Kvamman តាំងពីអំឡុងខែសីហា ឆ្នាំ ២០១៩ ដោយទុកឲ្យនាងទ្រាំបៀមការឈឺចាប់ រស់ចិញ្ចឹមកូនប្រុសដ៏ស្រស់ស្អាតតែម្នាក់ឯង ដោយគ្មានការទំនុកបម្រុងពីអតីតស្វាមីឡើយ។
ជុំវិញរឿងហេតុដែលនាំឲ្យបែកបាក់អតីតស្វាមីនេះដែរ តារាស្រីអ្នកនាង ទូច ស្រីល័ក្ខ បានបញ្ជាក់ថា គឺផ្តើមចេញពីស្វាមីរបស់នាងលួចទៅរួមរស់ជាមួយស្រីថ្មី ទើបធ្វើឲ្យចំណងស្នេហាកូន១ ពួកគេត្រូវបានប្រេះឆាមកទល់ពេលនេះ។ អំឡុងពេលរង់ចាំការលែងលះដាច់ស្រេច អ្នកនាង ទូច ស្រីល័ក្ខ បានជួបនូវរឿងរ៉ាវលំបាកតស៊ូជាច្រើន រហូតធ្វើឱ្យអ្នកនាងធ្លាប់បង្ហើបថា ខ្លួនមានជំងឺបាក់ទឹកចិត្តទៀតផង៕
ចែករំលែកព័តមាននេះ