ស្មាតហ្វូនស៊េរីក្រោយរបស់ក្រុមហ៊ុនសាំស៊ុង Galaxy Note 7 នឹងបង្ហាញក្នុងព្រឹតិ្តការណ៍ UNPACKED នៅថ្ងៃទី២ សីហា ២០១៦ក្នុងក្រុងញូវយ៉កសហរដ្ឋអាមេរិក ខណៈលក្ខណៈពិសេសរបស់វាកំពុងទាក់ទាញចំណាប់អារម្មណ៍អតិថិជនរបស់ខ្លួន ។
យោងតាមប្រភពព័ត៌មានចចាមអារ៉ាមឱ្យដឹងថា Galaxy Note 7 អាចនឹងបំពាក់បច្ចេកវិទ្យាស្គែនប្រស្រីភ្នែក (Iris Scanner) ដោយក្រុមហ៊ុនកូរ៉េឈ្មោះថា Patron ជាអ្នកផ្គត់ផ្គង់បន្ទះ Sensor ទាំងអស់នេះ ។
ក្រុមហ៊ុន Patron បានឈ្នះការដេញថ្លៃដើម្បីសហការផលិត Sensor ជួយឱ្យសាំស៊ុងកាន់តែមានសន្ទុះក្នុងការវាយលុកជាមួយក្រុមហ៊ុន Apple នូវ iPhone ជំនាន់ក្រោយ។ ខណៈពេលលក្ខណៈពិសេសរបស់វាមិនទាន់ត្រូវក្រុមហ៊ុនទម្លាយឱ្យដឹង តែបណ្តាគេហទំព័របច្ចេកវិទ្យាមួយចំនួនបានអះអាងថា ក្រុមហ៊ុនសាំស៊ុងនៅតែជ្រើសរើសអេក្រង់បញ្ឆិត និងប្រើប៊ិក S-Pen សរសើរផងដែរ ។
ព័ត៌មានចុងក្រោយឱ្យដឹងថា Galaxy Note 7 នឹងត្រូវនាំចេញចំនួន២,៥លានគ្រឿងសម្រាប់ខែសីហា និងខែកញ្ញា ពោលគឺសរុបចំនួន៥លានគ្រឿង ។ ក្រុមហ៊ុនសាំស៊ុងរំពឹងថា ការបង្ហាញវត្តមាន Galaxy Note 7 នឹងធ្វើឱ្យទីផ្សារភាគហ៊ុនរបស់ខ្លួនកើនឡើងមួយកម្រិតទៀត ៕
ចែករំលែកព័តមាននេះ