រាជធានីភ្នំពេញ៖ បច្ចុប្បន្នកម្ពុជាមានសហគមន៍កសិកម្មប្រមាណជាង ១២០០ បានកំពុងដើរតួដាំដុះបន្លែសុវត្ថិភាព រួមទាំងដំណាំហូបផ្លែនិងចិញ្ចឹមសត្វផងដែរ សម្រាប់ផ្គត់ផ្គង់ទីផ្សារក្នុងស្រុក កាត់បន្ថយការនាំចូលកសិផលពីខាងក្រៅប្រទេស ។ លោក វេង…
រាជធានីភ្នំពេញ៖ បច្ចុប្បន្នកម្ពុជាមានសហគមន៍កសិកម្មប្រមាណជាង ១២០០ បានកំពុងដើរតួដាំដុះបន្លែសុវត្ថិភាព រួមទាំងដំណាំហូបផ្លែនិងចិញ្ចឹមសត្វផងដែរ សម្រាប់ផ្គត់ផ្គង់ទីផ្សារក្នុងស្រុក កាត់បន្ថយការនាំចូលកសិផលពីខាងក្រៅប្រទេស ។ លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានមានប្រសាសន៍ឱ្យដឹងថា គិតត្រឹមខែធ្នូ ឆ្នាំ២០២១ សហគមន៍កសិកម្មចំនួន ១.២១៧ ដែលមានសមាជិកសរុបជាង ១៥ ម៉ឺននាក់នោះ មានដើមទុនសរុបជាង ១០២ ពាន់លានរៀល បានកំពុងយ៉ាងសកម្មនៅក្នុងការដាំដុះបន្លែ ចិញ្ចឹមសត្វ សរីរាង្គផ្គត់ផ្គង់ ទីផ្សារក្នុងស្រុក តាមរយ:ការអនុវត្តតាមបច្ចេកទេសកសិកម្មទំនើប ដោយប្រើប្រាស់ផ្ទះសំណាញ់ និង Hydroponic ។
លោករដ្ឋមន្ត្រីបានបញ្ជាក់ថា ការចុះកិច្ចសន្យាផលិតកម្មកសិកម្មរវាងកសិករ សហគមន៍កសិកម្ម និងវិស័យឯកជនមានចំនួនកើនឡើងផងដែរ ដោយគិតត្រឹមខែធ្នូ ឆ្នាំ២០២១ កសិករដែលទទួលបានវិញ្ញាបនបត្រការអនុវត្តកសិកម្មល្អ CamGAP មានចំនួន ៣០៩ ចម្ការ ឬកសិដ្ឋាន ដែលបានអនុវត្តតាមបទដ្ឋានបច្ចេកទេស ទទួលបានទិន្នផលខ្ពស់ប្រកបដោយគុណភាព និងសុវត្ថិភាព ។
លោកឧកញ៉ា ហ៊ុន ឡាក់ អ្នកវិនិយោគក្នុងវិស័យកសិកម្មម្នាក់ ថាការផលិតបន្លែសុវត្ថិភាពជាផ្នែកសំខាន់ក្នុងការលើកកម្ពស់ជីវភាពកសិករនិងវិស័យកសិកម្ម ។ លោកបានវិនិយោគបង្កើតមជ្ឈមណ្ឌលបន្លែសុវត្ថិភាពមួយ ។ មជ្ឈមណ្ឌលនេះជាផ្នែកមួយចូលរួមជំរុញការដាំដុះបន្លែសុវត្ថិភាពក្នុងផ្ទះសំណាញ់ និងចាប់ដៃគូជាមួយកសិករ សហគមន៍កសិកម្ម និងបណ្ដុំក្រុមផលិត តាមរយៈកិច្ចសន្យាកសិកម្ម ដោយក្រុមហ៊ុនផ្តល់ធាតុចូលកសិកម្ម និងបច្ចេកទេស ព្រមទាំងប្រមូលទិញបន្លែទាំងអស់ត្រឡប់មកវិញ ធ្វើការលាងសម្អាត វេចខ្ចប់ រក្សាទុកបន្លែដែលប្រមូលបានទាំងនៅក្នុងមជ្ឈមណ្ឌល និងតាមកិច្ចសន្យាកសិកម្មជាមួយកសិករគោលដៅតាមខេត្ត និង ធ្វើការចែកចាយដល់ទីផ្សារ ប្រកបដោយសុវត្ថិភាពធានាគុណភាព ។
អគ្គនាយកដ្ឋានកសិកម្មបានបង្ហាញថា ផ្ទៃដីផលិតកម្មដំណាំបន្លែបានកើនឡើងប្រមាណពី ៥១. ៣៣៨ ហិកតា នៅឆ្នាំ២០១៤ ដល់ ៦៩. ៨៥០ ហិកតានៅឆ្នាំ២០២១ ។ ចំណែកបរិមាណបន្លែផលិតបាន បានកើនឡើងជិតពីរដងពី ៤១៥. ២៣៩ តោន នៅឆ្នាំ២០១៤ ដល់ ៨១០.០៦៤ តោន នៅឆ្នាំ២០២១ ៕
ចែករំលែកព័តមាននេះ