រាជធានីភ្នំពេញ ៖ មហាជន អ្នកលេងបណ្តាញសង្គម បានបង្ហាញនូវការហួសចិត្តគ្រប់ៗគ្នា ក្រោយពីបានឃើញវីដេអូខ្លីមួយ បង្ហាញអំពីចរិតបងប្អូនជាម្ចាស់រថយន្តមួយចំនួនដែលបានបើកបររុលប្រជ្រៀតគ្នា គ្មានស្គាល់គន្លង ហើយបង្កការកកស្ទះនៅកំណាត់ផ្លូវជាតិលេខ៤ ។
វីដេអូខ្លីដែលមានរយៈពេលប្រមាណជិត៣នាទីនេះ ត្រូវបានអ្នកលេងបណ្តាញសង្គមចែកចាយយ៉ាងផុសផុល កាលពីថ្ងៃទី១ ខែមករា ឆ្នាំ២០២២ ម្សិលមិញនេះ និងមានបងប្អូនមួយចំនួនបានបញ្ចេញមតិរិះគន់យ៉ាងចាស់ដៃតែម្តង ព្រោះតែទិដ្ឋភាពក្នុងវីដេអូខ្លះនោះ បានបង្ហាញយ៉ាងច្បាស់អំពីការកកស្ទះពេញមួយទំហឹង ហើយរុលទៅមុខមិនរួច ដែលកត្តានេះបង្កឱ្យឡើងដោយម្ចាស់រថយន្តមួយចំនួន ដែលបញ្ជាចង្កូតរថយន្តលើដងផ្លូវជាតិលេខ៤ ក្នុងទិសដៅចូលក្រុងភ្នំពេញ ដោយបានបើកបរមិនគោរពច្បាប់ចរាចរណ៍បន្តិចសោះ គឺបំពានគន្លងអ្នកមកពីទិសដៅផ្ទុយគ្នា ដោយរថយន្តឡើងដល់៦ជួរ បិទផ្លូវអ្នកបើកបរក្នុងទិសដៅផ្ទុយ (ទិសដៅចូលទៅខេត្តព្រះសីហនុ) ទាំងស្រុងតែម្តង។
ក្នុងវីដេអូនោះផងដែរ ក៏បានឱ្យយើងឃើញថា បងប្អូនដែលត្រូវបើកបរចូលទឹកដីខេត្តព្រះសីហនុ គ្មានសល់ចំណែកផ្លូវបើកបរនោះទេ គឺពិតជាវេទនាភ្នែកណាស់ ខណៈម្ចាស់យានយន្តទំនើបដែលបើកបំពានគន្លងអ្នកទិសផ្ទុយគ្នា ហាក់គ្មានការពិចារណា និងចូលរួមគោរពច្បាប់ចរាចរណ៍បន្តិចសោះ ។
ការបើកបរមិនគោរពច្បាប់ចរាចរណ៍ គឺជាកត្តាសំខាន់មួយដែលបណ្តាលឱ្យមានការបាត់បង់ជីវិតមនុស្សលើដងផ្លូវ ។ ជាក់ស្តែង គ្រោះថ្នាក់ចរាចរណ៍កាលពីថ្ងៃទី១ ខែមករា ឆ្នាំ២០២២ គឺមានអ្នកស្លា.ប់១៥ និងរបួស២២នាក់ ដែលកើតឡើងដោយសារតែការបើកបរគ្មានការគោរពច្បាប់ ដោយបើកប្រសាចពេញផ្លូវតែម្តង ៕
ចែករំលែកព័តមាននេះ