រាជធានីភ្នំពេញ ៖ អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍អោយដឹងនៅមុននេះបន្តិចថា ពិតជាមានការផ្ទុះគ្រាប់បែក ចំនួន០២គ្រាប់ពិតមែន គឺនៅក្បែរស្ថានទូតកម្ពុជា…
រាជធានីភ្នំពេញ ៖ អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍អោយដឹងនៅមុននេះបន្តិចថា ពិតជាមានការផ្ទុះគ្រាប់បែក ចំនួន០២គ្រាប់ពិតមែន គឺនៅក្បែរស្ថានទូតកម្ពុជា ប្រចាំនៅប្រទេសមីយ៉ាន់ កើតឡើងចន្លោះពីម៉ោង១០ ទៅម៉ោង១០និង៣០នាទី ព្រឹកថ្ងៃទី៣១ ខែធ្នូ ឆ្នាំ២០២១នេះ ប៉ុន្តែមិនមានប៉ះពាល់ដល់មន្ត្រីទូត ដែលកំពុងបម្រើការនៅក្នុងស្ថានទូតនោះទេ ។
លោក កុយ គួង បានបន្តថា មន្ត្រីទូត បានឮសំឡេងផ្ទុះទី១ ដោយពិនិត្យមើលទៅចម្ងាយពីរបងស្ថានទូត ប្រហែលជា ១០០ម៉ែត្រ និងសំឡេងផ្ទុះទី២ មានចម្ងាយពីរបងស្ថានទូតប្រហែល ១៥០ម៉ែត្រ ។ អាជ្ញាធរមីយ៉ាន់ម៉ា ក៏ចុះទៅពិនិត្យភ្លាមៗ នៅកន្លែងផ្ទុះទាំងនោះឃើញថា គឺជាគ្រាប់បែកកែច្នៃ គ្រាន់តែវាធ្វើឲ្យឮសំឡេងខ្លាំងតែប៉ុណ្ណោះ មិនមានផលប៉ះពាល់ដល់អ្នកណាទាំងអស់ ពោលគឺមិនមានអ្នករងរបួស ឫគ្រោះថ្នាក់ឡើយ ។
លោក កុយ គួង ក៏បានអោយដឹងទៀតថា បន្ទាប់ពីមានការផ្ទុះ គឺមន្ត្រីទូតកម្ពុជា នៅតែបំពេញការងារជាប្រក្រតី ហើយអាជ្ញាធរមីយ៉ាន់ម៉ា គេពង្រឹងសន្តិសុខកាន់តែខ្លាំងឡើង គឺទាំងស្ថានទូត និងផ្ទះស្នាក់នៅរបស់មន្ត្រីទូតកម្ពុជាទាំងអស់ គឺអាជ្ញាធរមីយ៉ាន់ម៉ា គេយកចិត្តទុកដាក់ខ្ពស់ ។
ទាក់ទងនឹងដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី៧ ខែមករា ឆ្នាំ២០២២ ខាងមុខនេះ មិនមានការប្រែប្រួលនោះឡើយ នេះបើតាមការបញ្ជាក់របស់អ្នកនាំពាក្យក្រសួងការបរទេសកម្ពុជា ៕
ចែករំលែកព័តមាននេះ