ខេត្តបន្ទាយមានជ័យ៖ តំបន់សមរភូមិក្តៅ រវាងអតីតកងទ័ពខ្មែរក្រហម និងកងទ័ពរដ្ឋាភិបាល និងក្រោយមកជាចំណុចដីទំនាស់ដ៏រ៉ាំរ៉ៃ ទីបំផុត ត្រូវបានដោះស្រាយបញ្ចប់ហើយ ហើយបច្ចុប្បន្ន បានក្លាយជាតំបន់អភិវឌ្ឍន៍នៅជាយដែនខ្មែរ-ថៃ ។
ក្នុងពិធីអបអរសាទរខួបលើកទី២៣ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនៃនយោបាយឈ្នះឈ្នះ ឯកឧត្តម អ៊ុំ រាត្រី អភិបាលខេត្ត ដែលបានអញ្ជើញជាអធិបតី បានមានប្រសាសន៍ថា បឹងជង្រុក គឺជាតំបន់មួយ ដែលមានទំនាស់ដីធ្លីរ៉ាំរ៉ៃនិងអូសបន្លាយជាយូរ។
ចំណែកឯកឧត្តម ប៉ាន់ ខែមប៊ុនថន នាយករងខុទ្ទកាល័យសម្តេចតេជោនាយករដ្ឋមន្ត្រី ហ៊ុន សែន សហការជាមួយក្រុមការងារថ្នាក់ខេត្ត-ស្រុក មន្ទីរជំនាញ បានដោះស្រាយទំនាស់ដីធ្លីបឹងជង្រុក ក្រោមគោលនយោបាយឈ្នះ ឈ្នះ បញ្ចប់ទំនាស់ និងបានដាក់ឈ្មោះថា ភូមិបឹងជង្រុកតេជោឈ្នះឈ្នះ ក្នុងឃុំទួលពង្រ ស្រុកម៉ាឡៃ។
ឯកឧត្តម បន្តថា ក្រោយពេលទំនាស់ដីធ្លីតំបន់បឹងជង្រុក ត្រូវបានបញ្ចប់ជាស្ថាបពរ គឺបានបន្សល់ទុកគ្រាប់មីន និងយុទ្ធភណ្ឌមិនទាន់ផ្ទុះជាច្រើន ដែលអាចបង្កគ្រោះថ្នាក់ជាយថាហេតុគ្រប់ពេល ហើយអង្គភាពកម្ចាត់មីនស៊ីម៉ាក់ បានបោសសម្អាតមីន រៀបចំជាតំបន់អភិវឌ្ឍន៍បឹងជង្រុក ក្រោមគោលនយោបាយឈ្នះ ឈ្នះ ដែលជាចក្ខុវិស័យរបស់សម្តេចតេជោនាយករដ្ឋមន្ត្រី ហ៊ុន សែន។
ឯកឧត្តម ប៉ាន់ ខែមប៊ុនថន ថ្លែងថា ក្នុងពិធីអបអរសារទខួបលើកទី២៣ នៃការបញ្ចប់សង្គ្រាមស៊ីវិលនៅកម្ពុជា និងអនុវត្តប្រកបដោយជោគជ័យ តាមមនយោបាយ ឈ្នះ ឈ្នះ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានដឹកនាំប្រទេសឲ្យមានសុខសន្តិភាព និងការអភិវឌ្ឍគ្រប់វស័យនៅកម្ពុជា។
ឯកឧត្តម បានប្រគល់លំនៅឋានតេជោឈ្នះ ឈ្នះ ដែលជាអំណោយរបស់សម្តេចតេជោ ហ៊ុនសែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់គ្រួសារជនពិការ រស់នៅភូមិបឹងជង្រុកតេជោឈ្នះ ឈ្នះ ឃុំទួលពង្រ ស្រុកម៉ាឡៃនេះ។
ឯកឧត្តម ប៉ាន់ ខែម ប៊ុនថន បានបញ្ជាក់ថា ដើម្បីអបអរសាទរខួបលើទី២៣ឆ្នាំនេះ ឯកឧត្តម ក៏ដូចជា អាជ្ញាធរខេត្ត បានរៀបចំហូបនំបញ្ចុកសាមគ្គីដែលប្រសិទ្ធនាមថា«នំបញ្ចុកសន្តិភាព»ដោយមានប្រជាពលរដ្ឋក្នុងភូមិបឹងជង្រុកតេជោ ឈ្នះ ឈ្នះ ប្រមាណ ១.០០០នាក់ចូលរួមទទួលទាន និងអបអរសាទរយ៉ាងសប្បាយរីករាយ។
ជាមួយនេះ ក៏មានការដាក់តាំងពិព័រណ៍សំណល់គ្រាប់យុទ្ធភណ្ឌមិនទាន់ផ្ទុះ ដែលនៅសេសសល់ពីសម័យសង្គ្រាម ហើយដែលក្រុមការងារស៊ីម៉ាក់ រាវបាន ក្នុងតំបន់ភូមិបឹងជង្រុកតេជោឈ្នះ ឈ្នះ។ រីឯនៅពេលរាត្រី មានក្រុមកំប្លែងរបស់នាយ កុយ សម្តែងជូនប្រជាពលរដ្ឋទស្សនាកម្សាន្តផងដែរ៕
ចែករំលែកព័តមាននេះ