ខេត្តកណ្តាល ៖ អាជ្ញាធរស្រុកកៀនស្វាយ ខេត្តកណ្តាល បានកំពុងផ្សព្វផ្សាយដល់អាជីវករលក់ដូរ ម្ចាស់អាហារដ្ឋាន និងម្ចាស់ហាងខារ៉ាអូខេ នៅតំបន់រមណីយដ្ឋានវត្តកៀនស្វាយក្រៅ អំពីការអនុវត្តវិធានការសុខាភិបាល ៣ការពារ និង ៣កុំ ដើម្បីជាការត្រៀមទទួលភ្ញៀវទេសចរជាតិ និងអន្តរជាតិ ក្នុងឱកាសបុណ្យឆ្លងឆ្នាំថ្មី ឆ្នាំសកល នាពេលខាងមុខ ។
លោក ពៅ គឹមលី អភិបាលរងស្រុកកៀនស្វាយ បានឲ្យដឹងថា អាជ្ញាធរលោកបានកំពុងណែនាំ ដល់អាជីវករទាំងអស់ឲ្យគោរពឲ្យបាននូវវិធានការសុវត្ថិភាពសុខាភិបាល ដើម្បីធានាសុវត្ថិភាពសុខភាព ជូនពលរដ្ឋដែលត្រូវដើរកម្សាន្តនៅពេលឆ្លងឆ្នាំខាងមុខនេះ ។
លោកលើកទ្បើងថា ក្នុងពេលដែលរាជរដ្ឋាភិបាលបើកប្រទេសទ្បើងវិញនេះ ភ្ញៀវទេសចរជាតិ និងអន្តរជាតិបានចេញដើរកម្សាន្តក្នុងទូទាំប្រទេសកាន់តែច្រើនទ្បើងៗ និយាយរួមនិងនិយាយដោយទ្បែកនៅរមណីយដ្ឋានវត្តកៀនស្វាយក្រៅក៏ទទួលបានភ្ញៀវទេសចរគួឲ្យកត់សម្គាល់ផងដែរ ។
ឱកាសបុណ្យឆ្លងឆ្នាំថ្មី ឆ្នាំសកល យើងរំពឹងថា នឹងមានចំនួនភ្ញៀវទេសចរជាច្រើនមកកម្សាន្តនៅរមណីដ្ឋានកៀនស្វាយ ដូច្នេះយើងត្រូវលើកកម្ពស់សោភណ្ឌភាព និងអនាម័យ សុវត្ថិភាព ដើម្បីឲ្យពលរដ្ឋរបស់យើងបានសប្បាយរីករាយដោយគ្មានការបារម្ភ ។ អាជ្ញាធរបានបញ្ជាក់ ។
លោក ពៅ គឹមលី បានឲ្យដឹងថា ការពង្រឹងវិធានការសុវត្ថិភាពសុខាភិបាល អាជ្ញាធរបានណែនាំ ដល់កន្លែងលក់ដូរ ត្រូវមានអាល់កុល ជែល ឧបករណ៍វាស់កម្តៅ រួមទាំងត្រួតពិនិត្យការពាក់ម៉ាស់និងរក្សាគម្លាត ឲ្យហ្មត់ចត់ ៕
ចែករំលែកព័តមាននេះ