«Daily Mail» របស់អង់គ្លេសកាលពីពេលថ្មីៗកន្លងមកផ្សាយថា ក្មេងប្រុស Ramesh Darji អាយុ១១ឆ្នាំ រស់នៅជាមួយឪពុកម្តាយក្នុងភូមិ Baglung ស្ថិតនៅតំបន់ដាច់ស្រយាល ប្រទេសនេប៉ាល់ កើតជំងឺចម្លែក ដោយក្រោយពេលកើតបាន១៥ថ្ងៃ ស្បែកចាប់ផ្តើមរបក និងស្បែកថ្មីចាប់ផ្តើមជំនួសមានលក្ខណៈជាស្រកាពណ៌ខ្មៅ រឹងកប់យ៉ាងជ្រៅក្នុងសាច់បណ្តាលឱ្យឈឺចាប់ខ្លាំង។ ស្រកានោះធ្វើឱ្យខ្លួនប្រាណរបស់កុមារឡើងរឹងដូចដុំថ្ម បន្តិចម្តងៗ ព្រោះមិនអាចកម្រើកនិងនិយាយបាន ។
នៅពេល Ranesh ចាប់ផ្តើមធំធាត់ដែលរាងកាយមានលក្ខណៈខុសប្រក្រតីធ្វើឱ្យកុមារដទៃទៀតមិនហ៊ានចូលក្បែរ ដូច្នេះគេគ្មានមិត្តភក្តិ និងមិនអាចទៅសាលារៀនបានទេ ។ នៅពេលអាយុ៥ឆ្នាំ គេប្រាប់ឪពុកម្តាយថា ឈឺចាប់ និងដើរមិនបានទេ ។ គេអាចនិយាយបានតិចតួចនៅពេលត្រូវការអាហារ ឬចង់ចូលបន្ទប់ទឹក ។
លោកណានដា អាយុ៣៥ឆ្នាំ និងអ្នកស្រីណា អាយុ២៦ឆ្នាំ ជាឪពុកម្តាយនិយាយថា កូនប្រុសរបស់ពួកគេកើតជំងឺស្បែកក្រិនតាំងពីកំណើត បណ្តាលមកពីជំងឺតំណពូជ ។
លោកណានដា ជាកម្មករអាចរកចំណូលបាន ៧.០០០រូពីនេបា៉ល់ ឬ៧០ដុល្លារក្នុងមួយខែ ។ ចំណែកអ្នកស្រីណា នៅផ្ទះថែទាំកូនប្រុស Ramesh ។ ប្តី-ប្រពន្ធនេះធ្លាប់នាំកូនទៅមន្ទីរពេទ្យ ប៉ុន្តែគ្រូពេទ្យប្រាប់ថា មិនអាចព្យាបាលបានទេ ត្រូវនាំយកទៅមន្ទីរពេទ្យធំ មានបរិក្ខារទំនើបៗក្រែងអាចព្យាបាលបាន ។
វីដេអូឃ្លីបបង្ហាញពីការលំបាករបស់ Ramesh ត្រូវគេបង្ហោះតាមហ្វេសប៊ុក ធ្វើឱ្យនាង Joss Stone តារាចម្រៀងដ៏ល្បីជនជាតិអង់គ្លេសមានក្តីអាណិតអាសូរ ក៏រៀបចំការប្រគំតន្ត្រីសប្បុរសធម៌រកប្រាក់ដើម្បីព្យាបាលគេ ។
បច្ចុប្បន្ន Ramesh និងក្រុមគ្រួសារស្ថិតនៅក្រុងកដ្ឋមណ្ឌូ ប្រទេសនេប៉ាល់ ទទួលការព្យាបាលនៅមន្ទីរពេទ្យ «កដ្ឋមណ្ឌូ មេឌីកាល ខូលឡេក» ប៉ុន្តែគ្រូពេទ្យមិនអាចព្យាបាលឱ្យជះសះស្បើយទាំងស្រុងបានទេ ។ ទោះជាយ៉ាងណាក្តីគេអាចមានសុខភាពល្អជាងមុន ៕
ចែករំលែកព័តមាននេះ