អ្នកនេសាទជនជាតិវៀតណាមនាំគ្នាអូសខ្មោចត្រីបាឡែនប្រវែង១០ម៉ែត្រយកទៅកប់ក្នុងឆ្នេរសមុទ្រខេត្ដបាក់លឺ ។ មានប្រជាជនជាច្រើនពាន់នាក់នាំគ្នាធ្វើពិធីកប់ខ្មោចត្រីបាឡែនដែលជាត្រីបាឡែនទី២បានជាប់អួនរបស់អ្នកនេសាទខេត្ដបាក់លឺចាប់តាំងពីដើម ឆ្នាំមក។ លោកង្វៀន ធីហាយ ម្ចាស់ទូកនេសាទឱ្យដឹងថា ពេលលោកកំពុងអូសអួននៅឆ្ងាយពីឆ្នេរប្រហែល៥៨គីឡូម៉ែត្រ ស្រាប់តែមានអារម្មណ៍ថា ត្រីធំជាប់អួន ហើយវារើបំរះយ៉ាងខ្លាំង ។ នៅពេលលើកអួនឡើង ប្រទះឃើញត្រីបាឡែនស្ថិតក្នុងសភាពស្ដូកស្ដឹង និងបានងាប់រយៈពេលបន្ដិចក្រោយមក ព្រោះវាបានរើបំរះខ្លាំងពេក ។
លោកហាយ បានសុំជំនួយពីទូកនេសាទចំនួន១០គ្រឿង ដែលកំពុងនេសាទត្រីនៅបរិវេណក្បែរគ្នាឱ្យជួយអូសយកត្រីនោះ ។ ត្រីបាឡែនដែលងាប់នេះមានទំងន់ប្រហែល១០តោន និងប្រវែងប្រហែល១០ម៉ែត្រ។ អ្នកនេសាទជាច្រើននាក់ទើបអាចអូសយកខ្មោចត្រីនោះទៅឆ្នេរដើម្បីកប់បាន ។ ស្របពេលនោះមានប្រជាជននៅក្នុងតំបន់ជាច្រើនពាន់នាក់ទៅឈរមើលផ្ដល់ជាកំលាំងចិត្ដ ។ អ្នកនេសាទឱ្យដឹងថា នោះជាត្រីបាឡែនពណ៌ប្រផេះស៊ីសត្វទឹកខ្នាតតូចជាអាហារ មានចរិតជាសត្វស្លូតមិនបង្កគ្រោះថ្នាក់ដល់មនុស្សទេ ។ អ្នកនេសាទវៀតណាមមានជំនឿថា សត្វចិញ្ចឹមកូនដោយទឹកដោះប្រភេទនេះជាសត្វស័ក្ដិសិទ្ធិ និងនាំជោគសំណាងដល់មនុស្សគ្រប់រូបដូច្នេះត្រូវជួយគ្នាបំពេញពិធីតាមផ្នែកសាសនា និងកប់ទុកនៅក្បែរឆ្នេរសមុទ្រ ។
កាលពីខែកុម្ភៈកន្លងមកអ្នកនេសាទក្នុងខេត្ដបាក់លឺ បាននាំគ្នាអូសត្រីបាឡែនទំងន់១៦តោន ដែលងាប់ចូលទៅឆ្នេរសមុទ្រ និងធ្វើពិធីកប់ដូចគ្នាដែរ ។ កាលពីសបា្ដហ៍មុន អ្នកនេសាទក្នុងខេត្ដ ក្វាងប៊ិញនាភាគកណ្ដាលប្រទេសបានជួយគ្នាអូសត្រីផ្សោតដ៏ធំមួយក្បាលចូលទៅក្នុងសមុទ្រក្រោយវាអណ្ដែតរសាត់មកទើរនៅលើឆ្នេរមានសភាពស្ដូកស្ដឹង ដោយមានត្រីផ្សោតមួយក្បាលទៀតរង់ចាំឃ្លាំមើលនៅឯបរិវេណឆ្ងាយ។ អ្នកជំនាញបញ្ជាក់ឱ្យដឹងថា ត្រីផ្សោតខ្នាតធំប្រវែង៤ម៉ែត្រនោះមានសភាពអស់កំលាំង ដូចជាមានជំងឺ ដូច្នេះហើយវាត្រូវរលកបោកបក់រសាត់ចូលឆ្នេរ ហើយមានកុមារទៅលេងសប្បាយជាមួយវា ៕
ចែករំលែកព័តមាននេះ