ប្រទេសចិន ៖ ផ្ទាំងទឹកកកមួយដែលជាប្រភពធំជាងគេនៃទន្លេ Yangtze របស់ចិន គឺកំពុងតែរលាយដោយសារអាកាសធាតុប្រែប្រួល។ នេះបើតាមប្រព័ន្ធផ្សព្វផ្សាយរបស់រដ្ឋបានឲ្យដឹងកាលពីពេលកន្លងមក ។
« ផ្ទាំងទឹកកក Jianggudiru ដែលស្ថិតនៅលើភ្នំ Geladaindon ភាគខាងលិចខេត្ត Qinghai បានស្រុតចុះ៣៤ម៉ែត្រក្នុងរយៈពេលជាង៦ឆ្នាំ » ។ នេះបើតាមប្រសាសន៍របស់លោក Pu Jianchen អ្នកស្រាវជ្រាវនៅបណ្ឌិតសភាវិទ្យាសាស្ត្រចិន បានប្រាប់ទៅកាន់ភ្នាក់ងារព័ត៌មានស៊ីនហួ ។
លោក Pu Jianchen មានប្រសាសន៍បន្តថា ៖ « ផែនទឹកកកនេះបានចាប់ផ្តើមរលាយបន្តិចម្តងៗនៅខ្ទង់ឆ្នាំ១៩៧០ បន្ទាប់មកវាបានរីកឡើងវិញនៅចន្លោះឆ្នាំ១៩៨៩ និងឆ្នាំ១៩៩៤ មុនពេលដែលវាបានរលាយយ៉ាងលឿនពីឆ្នាំ១៩៩៥ កន្លងមក » ។
ចំណែកលោក Yang Xin ប្រធានសមាគមការពារបរិស្ថានទន្លេបៃតង បានថ្លែងថា ៖ « ផែនទឹកកកបានរលាយអស់២ម៉ែត្រក្នុងរយៈពេល១ឆ្នាំ នៅខ្ទង់ឆ្នាំ១៩៨០ និងឆ្នាំ១៩៩០ ប៉ុន្តែវាបានរលាយអស់ប្រមាណ៦ម៉ែត្រក្នុង១ឆ្នាំ ក្នុងរយៈពេលប៉ុន្មានឆ្នាំមកនេះ ។ នេះហើយជាភស្តុតាងជាក់ស្តែងនៃការប្រែប្រួលអាកាសធាតុសកល » ។
លោក Pu Jianchen បន្ថែមទៀតថា ៖ «ទន្លេ Yangtze នឹងទទួលបានទឹកបន្ថែមក្នុងរយៈពេលដ៏ខ្លី នៅពេលដែលផែនទឹកកករលាយ ប៉ុន្តែចុងក្រោយ នឹងគ្មានទឹកហូរចេញពីវាឡើយ» ។
គួរបញ្ជាក់ថា ចិន គឺជាប្រទេសបញ្ចេញឧស្ម័នផ្ទះកញ្ចក់ច្រើនជាងគេ បានសន្យាថា នឹងបញ្ចេញឧស្ម័នផ្ទះកញ្ចក់ឲ្យដល់កំពូលក្នុងឆ្នាំ២០៣០ ។ វាជាផ្នែកមួយនៃការប្តេជ្ញាចិត្តក្នុងដំណាក់កាលសកល ដើម្បីប្រយុទ្ធប្រឆាំងនឹងការឡើងនៃកម្តៅជាសកល និងបានចុះហត្ថលេខាកាលពីឆ្នាំមុន នៅទីក្រុងប៉ារីស ៕
ចែករំលែកព័តមាននេះ