បន្ទាយមានជ័យ ៖ កម្លាំងការពារព្រំដែនថៃបានឃាត់ពលករខ្មែរចំនួន៧០នាក់ ២គោលដៅដោយឡែកគ្នា ដែលលួចឆ្លងដែនទៅរកការងារធ្វើប្រទេសថៃ នៅថ្ងៃទី២៣ ខែធ្នូ ឆ្នាំ២០២១ នៅតាមបន្ទាត់ព្រំដែនភូមិសាស្ត្រស្រុកអារ័ញ្ញ ខេត្តស្រះកែវប្រទេសថៃ ។
មន្ត្រីទំនាក់ទំនងព្រំដែនកម្ពុជា.ថៃ បានប្រាប់ថា ៖ ពលករខ្មែរចំនួន៧០នាក់ ត្រូវបានទាហ៊ានឈុតខ្មៅថៃ ឃាត់ខ្លួននៅ២គោលដៅដោយឡែកគ្នាគោលដៅទី១.កម្លាំងចម្រុះដែលឈជើងតាមបន្ទាត់ព្រំដែនបានឃាត់ខ្លួនពលករខ្មែរចំនួន៤២នាក់ ក្មេង១៨នាក់ នៅតាមបន្ទាត់ព្រំដែនភូមិសាស្ត្រភូមិខ្លងវ៉ា ឃុំថាប់ព្រិក ស្រុកអារ័ញ្ញ ខេត្តស្រះកែវ គោលដៅទី២.កម្លាំងចម្រុះថៃ ដែលឈរជើងតាមបន្ទាត់ព្រំដែនបានឃាត់ពលករខ្មែរចំនួន២៨នាក់ ក្មេង៣នាក់ ក្នុងភូមិសាស្ត្រភូមិទ័ពសៀម ឃុំ.ស្រុកតាប្រយ៉ា ខេត្តស្រះកែវ ប្រទេសថៃ ។
មន្ត្រីទំនាក់ទំនងកម្ពុជា.ថៃ បានបញ្ជាក់ថា ៖ ក្រោយពេលដែលកម្លាំងចម្រុះយោធាថៃឃាត់ពលករខ្មែរចំនួន៧០នាក់ កុមារ២១នាក់ តាមបន្ទាត់ព្រំដែនក្នុងទឹកដីថៃបាននាំយកទៅសាកសួរ គឺពួកគាត់បានលួចឆ្លងចូលមកក្នុងទឹកដីថៃនេះ តាមរយៈមេខ្យល់ដែលជូនមកដាក់អោយមេខ្យល់ថៃជូនបន្តទៅរកការងារធ្វើនៅប្រទេសថៃ ដោយខុសច្បាប់នៅពេលជូនឆ្លងដែនចូលក្នុងទឹកដីថៃ កំពុងរកចាំមេខ្យល់ថៃមកទទួលជូនទៅរកការងារធ្វើត្រូវបានកម្លាំងយោធាថៃឃាត់ខ្លួន ។
ចំពោះពលករខ្មែរដែលត្រូវបានទាហ៊ានថៃឃាត់តាមបន្ទាត់ព្រំដែន ដែលពួកគាត់លួចឆ្លងដែនទៅរកការងារធ្វើប្រទេសថៃនេះ ក្រោយភាគីថៃសាកសួរព័ត៌មានហើយអាចបញ្ជូនមកតាមច្រកបឹងក្រកួន ឬច្រកអូរបីជាន់ ដើម្បីអោយក្រុមការងារកម្ពុជាទទួល ៕
ចែករំលែកព័តមាននេះ