រាជធានីភ្នំពេញ ៖ មហាជនបានសម្តែងការភ្ញាក់ផ្អើល និងស្ងើចសរសើរយ៉ាងខ្លាំងនៅពេលគេបានឃើញតារាចម្រៀងលោក ខេមរៈ សិរីមន្ត បានបរិច្ចាគលុយផ្ទាល់ខ្លួនចំនួន២លានដុល្លារ សម្រាប់ការធ្វើផ្លូវ និងស្តារប្រឡាយមួយកន្លែង ស្ថិតក្នុងស្រុកម៉ាឡៃ ខេត្តបន្ទាយមានជ័យ ជាទីដែលលោកកំពុងបោះវិនិយោគទុនពុះដីឡូតិ៍លក់។
ក្រោយពីឃើញមានការបរិច្ចាគថវិកាយ៉ាងច្រើនសន្ធឹកសន្ធាប់នៅក្នុងការចូលរួមចំណែកអភិវឌ្ឍប្រទេសជាមួយរាជរដ្ឋាភិបាលនាពេលនេះ គេសង្កេតឃើញមានមហាជន ជាពិសេសបណ្តាប្រិយមិត្តគាំទ្រលោក ខេមរៈ សិរីមន្ត មួយចំនួនបានជូនពរឲ្យតារារូបនេះទទួលបានងារជាឧកញ៉ាឆាប់ៗនេះ។
«ជូនពបងប្រុសឡើងឧកញ៉ា ឆាប់ៗ!» «ជិតឡើងងារជាឧកញ៉ាហើយ! សម្រាប់ខ្ញុំមិនមានលទ្ធភាពទេ សម្រាប់ទឹកប្រាក់រហូតដល់២លានដុល្លារ តែខ្ញុំរីករាយ និងរំភើបចំពោះទឹកចិត្តប្រពៃរបស់បងមន្ត ក្នុងកិច្ចការជួយអភិវឌ្ឍន៍ប្រទេសជាតិ» «ទឹកចិត្តប្រពៃណាស់បង ជូនពរបងប្រុសឡើងងារជាឧកញ៉ាឆាប់ៗ !» «តែប៉ុណ្ណេះឡើងឧកញ៉ាដីឡូតិ៍ហើយ idol» ទាំងអស់នេះ គឺជាសារក្នុងចំណោមសារជាច្រើនទៀត ដែលប្រិយមិត្តគាំទ្រខំមិននៅពីក្រោយរូបភាពនៃការបរិច្ចាគថវិកា២លានដុល្លាររបស់លោក ខេមរៈ សិរីមន្ត។
ជាមួយនឹងការបង្ហោះលិខិតថ្លែងអំណរគុណពីសំណាក់លោកអភិបាលខេត្តបន្ទាយមានជ័យ តារាចម្រៀងក្នុងផលិតកម្មហង្សមាសលោក ខេមរៈ សិរីមន្ត ក៏បានភ្ជាប់ជាមួយនឹងសារដែរថា «ការជួយដល់សង្គមជាតិ និងប្រជាជនយើង គឺជាតួនាទីរបស់យើងទាំងអស់គ្នា»។
លោកបញ្ជាក់ថា «ថវិកា 2,000,000$ (ពីរលានដុល្លារ) ជាថវិកាដ៏ច្រើនសំរាប់ខ្ញុំ តែខ្ញុំរីករាយនឹងរួមចំណែកជាមួយរាជរដ្ឋាភិបាលដើម្បីកសាងនៅផ្លូវ និងប្រឡាយទឹកជួយសម្រួលដល់ពុកម៉ែបងប្អូនដែលរស់នៅស្រុកម៉ាឡៃ ខេត្តបន្ទាយមានជ័យ និងទូទាំងប្រទេសតាមអ្វីដែលខ្ញុំអាចធ្វើបាន»។
ដោយឡែក បើយោងតាមលិខិតថ្លែងអំណរគុណដែលមានហត្ថលេខាពីអភិបាលខេត្តបន្ទាយមានជ័យ លោក អ៊ុ រាត្រី បានបញ្ជាក់ថា «ថវិកាចំនួន២លានដុល្លារដែលជាជំនួយរបស់លោក ខែម ប៊ុនថៃ (ឈ្មោះពិតរបស់លោក ខេមរៈ សិរីមន្ត) គឺសម្រាប់ស្ថាបនាផ្លូវប្រវែង២២គីឡូម៉ែត្រ និងកាយប្រព័ន្ធទឹកប្រវែង១២គីឡូម៉ែត្រ ស្ថិតនៅក្នុងភូមិអូរអំបិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ»។
យ៉ាងណា តាមរយៈកាយវិការដ៏សប្បុរសធម៌របស់លោក ខេមរៈ សិរីមន្ត នាពេលនេះ ត្រូវបានមហាជន ជាពិសេសបណ្តាអ្នកគាំទ្ររូបលោកជាច្រើននាក់ បានកោតសរសើរដល់តារាចម្រៀងរូបនេះ ដែលមានសណ្តានចិត្តដ៏ប្រពៃចូលរួមជាមួយរាជរដ្ឋាភិបាលសម្រាប់ការស្តារ និងស្ថាបនាហេដ្ឋារចនាសម្ព័ន្ធតាមបណ្តាលខេត្ត-រាជធានី នៅទូទាំងប្រទេសកម្ពុជា។
ជាការកត់សម្គាល់ នេះមិនមែនសម្រាប់ការចំណាយលើការកសាងខាងលើនេះទេ កាលពីពេលថ្មីៗនេះលោក ខេមរៈ សិរីមន្ត ក៏បានសហការជាមួយសមាគមសិល្បករខ្មែរ រៀបចំពិធីចែកអំណោយជាថវិកា និងស្បៀងអាហារជូនដល់សិល្បករចាស់ៗដែលមានការលំបាក និងបាត់បង់សមត្ថភាពសម្តែងផងដែរ៕
ចែករំលែកព័តមាននេះ