ភ្នំពេញ៖ ពិតជារឿងគួរឲ្យសោកសង្រេងខ្លាំងណាស់ ខណៈដែលស្ត្រីម្នាក់ ព្រោះតែនឹករម្លឹកបងប្រុសពេក ខំជិះម៉ូតូ ១គ្រឿង ធ្វើដំណើរចេញពីខេត្តកំពង់ស្ពឺ ដើម្បីមកលេងបង ដែលកំពុងស្នាក់នៅ និងរត់កង់បី…
ភ្នំពេញ៖ ពិតជារឿងគួរឲ្យសោកសង្រេងខ្លាំងណាស់ ខណៈដែលស្ត្រីម្នាក់ ព្រោះតែនឹករម្លឹកបងប្រុសពេក ខំជិះម៉ូតូ ១គ្រឿង ធ្វើដំណើរចេញពីខេត្តកំពង់ស្ពឺ ដើម្បីមកលេងបង ដែលកំពុងស្នាក់នៅ និងរត់កង់បី នៅរាជធានីភ្នំពេញ។ ប៉ុន្តែពេលមកដល់ភ្នំពេញ គាត់អត់បានចូលទៅជួបបងសិនទេ គឺទៅលេងមិត្តភក្ដិសិន លុះត្រឡប់មកពីផ្ទះមិត្តភក្ដិវិញ ជិះម៉ូតូទៅផ្ទះបង ជាអកុសល ពុំទាន់ទៅដល់ និងបានជួបមុខបងប្រុសផង ក៏ស្រាប់តែខ្យល់គ ដួលស្លា.ប់បាត់បង់ជីវិតនៅតាមផ្លូវតែម្ដង។
ហេតុការណ៍នេះ បានបង្កឲ្យមានការភ្ញាក់ផ្អើល កាលពីវេលាម៉ោង ៤ និង ១៥នាទី ល្ងាចថ្ងៃទី២២ ខែធ្នូ ឆ្នាំ២០២១ នៅតាមផ្លូវវេងស្រេង ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះ ឈ្មោះ រី សុខណាង អាយុ ៣៨ឆ្នាំ មុខរបរស៊ីឈ្នួលលាងចានឲ្យគេ តាមភោជនីយដ្ឋាន។ គាត់ជាស្រីមេម៉ាយកូន១ មានទីលំនៅក្នុងភូមិចំបក់ ឃុំវល្លិ៍សរ ស្រុកសំរោងទង ខេត្តកពង់ស្ពឺ។
សាច់ញាតិរបស់គាត់ បាននិយាយថា នៅវេលាព្រឹកថ្ងៃកើតហេតុ គាត់(ជនរងគ្រោះ) បានជិះម៉ូតួម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ កំពង់ស្ពឺ 1F-2904 ចេញពីផ្ទះ មករាជធានីភ្នំពេញ ថាមកលេងបងប្រុស ដែលកំពុងស្នាក់នៅ រត់កង់បីម្ដុំកន្លែងកើតហេតុ។ ប៉ុន្តែក្រោយពេលមកដល់ គាត់ពុំបានចូលទៅផ្ទះបងទេ គឺនាងបានខលប្រាប់បងថា ហួសទៅលេងមិត្តភក្ដិ នៅឯផ្សារអូរឫស្សីសិន ចាំពេលត្រឡប់មកពីផ្ទះមិត្តភក្ដិវិញ ទើបចូលផ្ទះបងជាក្រោយ ហើយបន្ទាប់ពីខលប្រាប់រួច ក៏ទៅបាត់ទៅ។
សាច់ញាតិដដែល បានប្រាប់បន្តទៀតថា រហូតដល់វេលាល្ងាចថ្ងៃដដែល ទើបនាងជិះម៉ូតូចាកចេញពីផ្ទះមិត្តភក្ដិ នៅឯផ្សារអូរឫស្សី ក្នុងបំណងទៅផ្ទះបងប្រុស។ លុះពេលទៅដល់ត្រង់ចំណុចកើតហេតុ បានឈប់ម៉ូតូ ហើយយកទូរស័ព្ទខលទៅបងរកផ្លូវចូលផ្ទះ។ ប៉ុន្តែជាអកុសល ខណៈកំពុងឈរនិយាយស្រាប់តែខ្យល់គ ដួលទាំងកម្រោល ពេលនោះ អ្នកជិតខាងឃើញបែបនេះ បាននាំគ្នាជួយសង្គ្រោះបឋមដែរ តែមិនអាចជួយបាន ព្រោះនាងបានដាច់ខ្យល់ស្លា.ប់បាត់ទៅហើយ។
ប្រភពខាងលើ បានប្រាប់បន្ថែមទៀតថា ខណៈនោះ បានបង្កឲ្យមានការភ្ញាក់ផ្អើលយ៉ាងខ្លាំង ហើយក្រោយពេលកើតហេតុ ប្រជាពលរដ្ឋបាននាំគ្នាយកទូរស័ព្ទរបស់នាងខល ទៅកាន់បងប្រុសនាង ប្រាប់ពីការស្លា.ប់នេះ។ ទើបបងប្រុស ព្រមទាំងសាច់ញាតិទាំងអស់ នាំគ្នា ទៅកាន់កន្លែងកើតហេតុ ទាំងក្ដីតក់ស្លុតបំផុត។ បន្ទាប់មក បានលើកសាកសពដាក់លើម៉ូតូកង់បី ដើម្បីនាំទៅសង្គ្រោះ តែហួសពេលអស់ទៅហើយ។
ចំណែកកម្លាំងនគរបាលប៉ុស្តិ៍ចោមចៅទី១ នៃអធិការដ្ឋាននគរបាលខណ្ឌពោធិ៍សែនជ័យ ក៏បានចុះទៅពិត្យមើលភ្លាមៗ និងរាយការណ៍ជូនថ្នាក់លើ ឲ្យបានដឹង និងមានចំណាត់ការលើហេតុការណ៍នេះផងដែរ៕ យន់ ស៊ីថា
ចែករំលែកព័តមាននេះ