តំបន់ធម្មជាតិរហាលកេស អាវៀន ត្រៀមបើកទទួលអ្នកទេសចរឆាប់ៗនេះ
- បន្ទាយមានជ័យ
ប្រធានសហគមន៍ការពារតំបន់ធម្មជាតិរហាលកេស អាវៀន គ្រោងនឹងបើកទ្វារឡើងវិញទទួលអ្នកទេសចរទៅលេងកម្សាន្ត និងទស្សនាសត្វស្លាបដ៏ច្រើនសំបូរបែប បន្ទាប់ពី
ខេត្តបន្ទាយមានជ័យ ៖ ប្រធានសហគមន៍ការពារតំបន់ធម្មជាតិរហាលកេស អាវៀន គ្រោងនឹងបើកទ្វារឡើងវិញទទួលអ្នកទេសចរទៅលេងកម្សាន្ត និងទស្សនាសត្វស្លាបដ៏ច្រើនសំបូរបែប បន្ទាប់ពីរាជរដ្ឋាភិបាលប្រកាសបើកប្រទេសឡើងវិញ ។
លោកនេត ណុក ប្រធានក្រុមប្រឹក្សាឃុំឈ្នួរមានជ័យ និងជាអនុប្រធានសហគមន៍ និងលោកខុង ប៊ុន ជំទប់ទី១ និងជាប្រធានតំបន់ការពារធម្មជាតិរហាលកេស អាវៀន ឲ្យដឹងកាលពីថ្ងៃទី១៨ ខែធ្នូ ឆ្នាំ២០២១ថាតំបន់ធម្មជាតិរហាលកេស អាវៀន ស្ថិតក្នុងឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ ។ មូលហេតុដែលសហគមន៍ដាក់ឈ្មោះ«រហាលកេស អាវៀន» ដោយសារកាលពីយូរលង់មក ចាស់ៗតែងតែនិយាយថាកន្លែងបឹងហៅថារហាលដែលមានផ្ទៃដីទឹកប្រមាណជា៥ហិកតា សំបូរទៅដោយត្រីកេស ទើបហៅថារហាលកេស ដោយបន្ថែមពាក្យ«កេស» ។
មួយផ្នែកទៀតនៅជាប់គ្នានោះមានផ្ទៃដីព្រៃលិចទឹកប្រមាណជា២៣ហិកតា មានរាងក្រវេចក្រវៀន ដែលគេហៅថាអាវៀន ។ បច្ចុប្បន្នក្រុមការងារបានដាក់ឈ្មោះថ្មីភ្ជាប់គ្នាថា តំបន់ការពារធម្មជាតិរហាលកេសអាវៀន ដោយរហាលកេសគឺផ្នែកអភិរក្សពូជត្រី និងអាវៀនផ្នែកខាងអភិរក្សសត្វស្លាបចម្រុះជាច្រើនប្រភេទ ។ រយៈពេលប្រមាណជាង៤ឆ្នាំមកហើយ សត្វស្លាបកាន់តែច្រើន និងសំបូរបែបរស់ ដូចជាកុកស ខ្វែកយប់(ខ្វែកធំ) កុកក្រក ក្រង៉ ទុង ក្អែកទឹក ត្រយង សត្វស្មោញ ដែលជាសត្វកម្រជិតដាច់ពូជនៅក្នុងប្រទេសកម្ពុជាយើង និងសត្វ ផ្សេងៗជាច្រើនប្រភេទទៀតរៀបរាប់មិនអស់ ។
លោកខុង ប៊ុន ឲ្យដឹងថា«នៅតំបន់ការពារធម្មជាតិរហាលកេសអាវៀនមានការងារចំនួន២ ជាស្នូល គឺអភិរក្ស និងអភិវឌ្ឍន៍ ។ ការងារស្នូលគឺក្រុមការងារនៅតែការពារយាមល្បាតជាប្រចាំថ្ងៃ ដែលមិនអាចអាក់ខានបាន ដើម្បីទប់ស្កាត់ការលួចបរបាញ់សត្វស្លាប និងការលួចឆក់ត្រីជាដើមក្នុងតំបន់នេះ ។ ពោលបើយើងចង់អភិវឌ្ឍប្រែក្លាយតំបន់នេះឲ្យទៅជាតំបន់ទេសចរណ៍ បើយើងមិនអភិរក្សមុនទេ យើងមិនដឹងជាយកអ្វីទៅអភិវឌ្ឍនោះទេ សំខាន់គឺយើងត្រូវថែរក្សាឲ្យបាននូវអ្វីដែលកំពុងតែមាននេះឲ្យបានគង់វង្ស ទើបអភិវឌ្ឍឲ្យទៅជាតំបន់អេកូទេសចរណ៍បាន» ។
ប្រភពដដែលបញ្ជាក់ថាតំបន់ការពារធម្មជាតិរហាលកេស អាវៀន គឺមានការទទួលស្គាល់ពីអាជ្ញាធរគ្រប់លំដាប់ថ្នាក់ ចាប់ពីអាជ្ញាធរមូលដ្ឋាន រហូតដល់ក្រសួងបរិស្ថាន ។ ម្យ៉ាងវិញទៀតមានអង្គការជាដៃគូមួយបានជួយលើគម្រោងអភិវឌ្ឍ ដោយគាំទ្រគម្រោងនេះ១០ខែ អនុវត្តចាប់ពីខែកញ្ញា ឆ្នាំ២០២១ បញ្ចប់នៅចុងខែមិថុនា ឆ្នាំ២០២២ លើទំហំទឹកប្រាក់ចំនួន៣.៧៣៤ដុល្លារ ដើម្បីស្តារបឹងធ្វើខ្យូស និងបម្រើឲ្យវិស័យទេសចរណ៍ ។
លោកខុង ប៊ុន ថាជាទិសដៅប្រែក្លាយតំបន់ឲ្យទៅជាតំបន់អេកូទេសចរណ៍ ដើម្បីរកចំណូលឲ្យអ្នករស់នៅក្នុងតំបន់តាមរយៈធនធានដែលមានស្រាប់ និងចេះកែច្នៃឲ្យទៅជាសម្បត្តិធនធានធម្មជាតិ ដែលនាំប្រយោជន៍ឲ្យប្រជាពលរដ្ឋ ។ ក្នុងក្នុងអំឡុងខែមករា ឬខែកុម្ភៈ ឆ្នាំ២០២២នឹងបើកទ្វារទទួលភ្ញៀវទេសចរឡើងវិញ បន្ទាប់ពីបិទដោយសារជំងឺកូវីដ-១៩ ។ ការបើកនេះ សហ គមន៍នឹងធ្វើកន្លែងទទួលភ្ញៀវទេសចរឲ្យបានសមរម្យជាងមុន ដោយធ្វើខ្យូសសម្រាប់អង្គុយលេង មានម្ហូបអាហារ មានកន្លែងចតរថយន្តបានស្រួល កន្លែងរាវគ្រំ និងស្ទូចត្រីកម្សាន្ត ។
លោកខុង ប៊ុន បានថ្លែងអំណរគុណឯកឧត្តមសាយ សំអាល់ រដ្ឋមន្ត្រីក្រសួងបរិស្ថាន និងលោកជំទាវឧកញ៉ាម៉ៅ ម៉ាល័យ កែ គឹមយ៉ាន ដែលគ្រោងនឹងផ្តល់ប៉ុស្តិ៍ប៉ម ដល់ដើម្បីឲ្យមើលសត្វ និងក្រុមការងារយាមល្បាតពិនិត្យមើលពីសកម្មភាពរបស់ជនខិលខូច ដែលមានបំណងបរបាញ់សត្វស្លាប ៕
ចែករំលែកព័តមាននេះ