រាជធានីភ្នំពេញ ៖ «អាផ្លក់ ចយ» គឺជាជនសង្ស័យម្នាក់ដែលបានធ្វើសកម្មភាពលួចម៉ូតូ១គ្រឿងនៅមុខតូបប្ដូរប្រាក់មួយកន្លែង តែពុំបានសម្រេច ហើយក៏ត្រូវបានម្ចាស់ម៉ូតូឃើញទាន់ រួចស្រែកឆោឡោផ្អើលពេញផ្សារ បន្ទាប់មកក៏ចាប់ខ្លួនជនសង្ស័យ (អាផ្លក់ ចយ) បាននាំទៅប្រគល់ជូននគរបាលប៉ុស្តិ៍ចោមចៅទី៣ ដើម្បីធ្វើការសួរនាំ និងកសាងសំណុំរឿងចាត់ការតាមច្បាប់។
ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង១០ព្រឹក ថ្ងៃទី២០ ខែធ្នូ ឆ្នាំ២០២១ នៅចំណុចទីតាំងកន្លែងកើតហេតុ ម្ដុំផ្សារឯករាជ្យ២ ស្ថិតក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បើតាមនគរបាលបានប្រាប់ថា ជនសង្ស័យម្នាក់ឈ្មោះហៅថា «អាផ្លក់ ចយ» មានអាយុ២៤ឆ្នាំ គ្មានកន្លែងស្នាក់នៅពិតប្រាកដនោះទេ ហើយនៅមុនពេលកើតហេតុ ជននេះបានដើរនៅម្ដុំផ្សារឯករាជ្យ២ ស្រាប់តែបានប្រទះឃើញម៉ូតូ១គ្រឿងម៉ាកហុងដាឃ្លីក ពណ៌ស ពាក់ស្លាកលេខ ភ្នំពេញ 1HS-9747 ដែលម្ចាស់ម៉ូតូជិះទៅចតទុកនៅមុខតូបប្ដូរប្រាក់មួយកន្លែង ស្ថិតនៅក្នុងផ្សារនោះ ហើយភ្លេចដកសោចេញទៀត ពេលនោះ ជនសង្ស័យ «អាផ្លក់ ចយ» ក៏បានឡើងអង្គុយលើម៉ូតូ រួចក៏កាច់សោបញ្ឆេះបម្រុងជិះចេញគេចខ្លួន។
នគរបាលបានប្រាប់ឲ្យដឹងទៀតថា ខណៈពេលនោះ ម្ចាស់ម៉ូតូកំពុងឈរដូរលុយ ស្ថិតនៅជិតនោះដែរ ឃើញទាន់ក៏ស្រែកឆោឡោថា «ចោរៗ» បង្កឲ្យមានការភ្ញាក់ផ្អើលយ៉ាងខ្លាំង។ បន្ទាប់មក ម្ចាស់ម៉ូតូ រួមជាមួយនឹងប្រជាពលរដ្ឋក៏បាននាំគ្នាចាប់ «អាផ្លក់ ចយ» នេះ បានភ្លាមៗ រួចបានប្រគល់ជូននគរបាលប៉ុស្តិ៍ចោមចៅទី៣ នៃអធិការដ្ឋាននគរបាលពោធិ៍សែនជ័យ ដើម្បីសាកសួរ និងកសាងសំណុំរឿងបញ្ជូនទៅកាន់សាលាដំដូងរាជធានីភ្នំពេញ ចាត់ការតាមច្បាប់៕
ចែករំលែកព័តមាននេះ