នៅពេលដែលភ្នំនៃការទទួលខុសត្រូវផ្នែកសុខភាព ត្រូវបានគេទម្លាក់លើទ្រូងរបស់គ្រូពេទ្យនោះ គេនាំគ្នាភ្លេចអំពីការបង្កើនចំណេះដឹងដល់ប្រជាជនអំពីបញ្ហាសុខភាពនេះ ។ ចំណេះដឹងនឹងធ្វើឱ្យមនុស្ស រស់នៅកាន់តែប្រសើរ និងកាន់តែមានសុខភាព ។
ក្រសួងសុខាភិបាល មន្ទីរពេទ្យរដ្ឋ និងស្ថាប័នពាក់ព័ន្ធដទៃទៀត ត្រូវលើកកម្ពស់ការអប់រំសុខភាពដល់ប្រជាជនកម្ពុជា ។ ហេតុអ្វីបានជាប្រជាជនត្រូវមានចំណេះដឹងទាក់ទងនឹងការថែទាំសុខភាព?
មានជំងឺជាច្រើនបានកើតឡើង ដោយសារតែរបៀបរបបនៃការរស់នៅរបស់មនុស្សដូចជាការរស់នៅ ការហូបចុក និងការបំពេញការងារជាដើម ។ ដូច្នេះ តាមរយ:ការយល់ដឹងអំពីរបៀបរបបរស់នៅ ការហូបចុក និងការបំពេញការងារ មនុស្សជាច្រើននឹងអាចចៀសផុតពីជំងឺមួយចំនួន ដូចជាជំងឺលើសឈាម ជំងឺសរសៃឈាម-បេះដូង ជំងឺទឹកនោមផ្អែម ជំងឺមហារីក និងជំងឺកាចសាហាវ
ជាច្រើនទៀត ដែលឆក់យកជីវិតមនុស្ស ។ ការមានចំណេះដឹងអំពីសុខភាព ក៏អាចជួយដល់អ្នកជំងឺនៅក្នុងការផ្តល់កិច្ចសហការបានយ៉ាងល្អ ជាមួយគ្រូពេទ្យនៅក្នុងការពិនិត្យ និងព្យាបាលជំងឺផងដែរ ។
ដូច្នេះ ការបង្កើនការផ្សព្វផ្សាយអំពីជំងឺនានា និងកត្តាហានិភ័យដែលនាំដល់ការកើតជំងឺទាំងនោះ នឹងអាចធ្វើឱ្យប្រជាជនយល់ដឹងថា ត្រូវចៀសវាងដោយរបៀបណា។ វានឹងតម្រូវអោយមានយុទ្ធនាការទ្រង់ទ្រាយធំ ហើយជាប់លាប់ ដើម្បីផ្តល់ព័ត៌មានផ្នែកសុខភាព ដែលត្រឹមត្រូវ និងមានប្រយោជន៍ដល់ប្រជាជនកម្ពុជា ។
នៅពេលបច្ចុប្បន្ននេះ គេឃើញមានវ៉េបសាយព័ត៌មានសុខភាពដ៏ល្បីមួយបានកើតមានឡើង ។ វេបសាយ www.health.com.kh នោះ បង្កើតឡើង ដោយគ្រូពេទ្យមួយក្រុម ក្រោមការដឹកនាំរបស់លោកវេជ្ជបណ្ឌិត ងួន សេរ័ត្ន ។ ប្រជាជនកម្ពុជាអាចស្វែងយល់ព័ត៌មានសុខភាពជាច្រើន តាមរយ:វ៉េបសាយនេះ ដូចជាការយល់ដឹងអំពីវិធីបង្ការជំងឺ វិធីរស់នៅល្អៗ ដើម្បីចៀសវាងជំងឺ និងវិធីប្រើប្រាស់ថ្នាំ កុំឱ្យមានគ្រោះថ្នាក់ជាដើម ។
ប៉ុន្តែទោះបីជាយ៉ាងណាក្តី កម្ពុជាត្រូវការយុទ្ធនាការទ្រង់ទ្រាយធំជាងនេះ នៅក្នុងការអប់រំប្រជាជនឱ្យយល់ដឹងអំពីបញ្ហាសុខភាព។
នៅពេលដែលប្រជាជនយល់ដឹងខ្ពស់ អំពីចំណេះដឹងផ្នែកសុខភាព ពួកគេនឹងអាចចៀសវាងជំងឺជាច្រើន ។ ជាលទ្ធផល បន្ទុករបស់រដ្ឋ នៅក្នុងការទទួលពិនិត្យ និងព្យាបាលជំងឺ ក៏នឹងត្រូវកាត់បន្ថយតាមនោះ ។ សំខាន់ជាងនេះ ជីវិតមនុស្សជាច្រើន នឹងត្រូវសង្គ្រោះតាមរយ:ចំណេះដឹងផ្នែកសុខភាពនេះ ៕
ចែករំលែកព័តមាននេះ