ការពារកុំឱ្យមានផ្ទៃពោះ…ខ្លាចវីរុស Zika
មជ្ឈដ្ឋានសុខាភិបាលប្រេស៊ីលបានចេញសារព្រមានយ៉ាងចម្លែកចំពោះ នារីប្រទេសនេះ គឺ «ត្រូវការពារកុំឱ្យមានផ្ទៃពោះឱ្យសោះ… ខ្លាចវីរុស Zika » ។ តាមពិតនេះជាសារសម្រាប់អនាគតអ្នកម្តាយទាំងឡាយ
មជ្ឈដ្ឋានសុខាភិបាលប្រេស៊ីលបានចេញសារព្រមានយ៉ាងចម្លែកចំពោះ នារីប្រទេសនេះ គឺ «ត្រូវការពារកុំឱ្យមានផ្ទៃពោះឱ្យសោះ… ខ្លាចវីរុស Zika » ។ តាមពិតនេះជាសារសម្រាប់អនាគតអ្នកម្តាយទាំងឡាយ ពិសេសនៅតំបន់ឦសានប្រទេសប្រេស៊ីល បន្ទាប់ពីរកឃើញមានវត្តមានវីរុសឆ្លងតាមមូសមួយប្រភេទឈ្មោះ Zika ដែលជាវីរុសបង្កឱ្យស្វិតខួរក្បាលទារក ។
ចាប់ពីវីរុស Zika មានវត្តមានក្នុងប្រទេសប្រេស៊ីលកាលពីដើមឆ្នាំ២០១៥មក ប្រជាជនប្រេស៊ីលរាប់ពាន់នាក់រងគ្រោះដោយសារវា។ ថ្វីបើវីរុស Zika មិនធ្វើទុក្ខខ្លាំងដោយគ្រាន់តែបង្កឱ្យមានអាការរសាប់រសល់ ឈឺក្បាលល្មម និងឡើងកន្ទួលក្រហមតាមមុខ តាមដងខ្លួន តែវីរុសនេះផ្តល់ផលអាក្រក់ដល់ការលូតលាស់ស្បូននៅពេលអ្នកម្តាយត្រូវវាវាយប្រហារពេលទើបតែចាប់ផ្តើមមានផ្ទៃពោះ ។ លោកវេជ្ជបណ្ឌិត Angela Rocha នៅមន្ទីរពេទ្យ Osvaldo Cruz និយាយប្រាប់ទូរទស្សន៍ CNN ថា «ពួកខ្ញុំព្រមានគ្រប់គ្រួសារត្រូវតែមានវិធានការការពារកុំអាលមានផ្ទៃពោះឱ្យសោះ» ។
ក្នុងឆ្នាំ២០១៥ គេកត់សម្គាល់ឃើញមានជាង២៤០០ករណី ទារកកើតមកមានជំងឺស្វិតខួរក្បាលនៅរដ្ឋទាំង២០របស់ប្រេស៊ីល ដែលជំងឺនេះកាលពីឆ្នាំ២០១៤ មានតែ១៤៧ករណីប៉ុណ្ណោះ ។ ក្រុមវេជ្ជបណ្ឌិតស្រាវជ្រាវករណីទារក២៩នាក់ស្លាប់ តើវាមានពាក់ព័ន្ធវីរុស Zika ឬអត់ ព្រោះគេធ្លាប់ប្រទះវីរុស Zika ក្នុងសុកម្តាយមួយចំនួនដែលកូនកើតមកមានជំងឺនេះ ។ ក្នុងស្ថានភាពវីរុស Zika កំពុងរាលដាលខ្លាំងក្នុងប្រទេសប្រេស៊ីល រដ្ឋចំនួន៦របស់ប្រទេសនេះ ឈានដល់ប្រកាសអាសន្ន ។ គ្រាន់តែរដ្ឋ Pernambuco តែមួយនៅភាគខាងជើងប្រេស៊ីល មាន៩០០ករណី ឆ្លងវីរុស Zika ។ នៅពេលទារកមានជំងឺស្វិតខួរក្បាលកើតមានខ្ពស់ក្នុងខែវិច្ឆិកា ២០១៥ ទើបមជ្ឈដ្ឋានសុខាភិបាលប្រេស៊ីលស្លន់ស្លោស្វែងរកមូលហេតុ ហើយក៏បានរកឃើញថារាល់ទារកស្វិតខួរក្បាលសុទ្ធតែមានពាក់ព័ន្ធដល់វីរុស Zika និងបានរកឃើញទៀតថាមកពីអ្នកម្តាយមានវីរុសនេះ ពេលចាប់ផ្តើមមានផ្ទៃពោះ ។ សព្វថ្ងៃវីរុសទេ Zika មិនត្រឹមតែរាតត្បាតនៅភាគខាងជើងប្រេស៊ីល វាកំពុងសាយភាយចូលទីក្រុងរីយ៉ូដឺហ្សាណេរ៉ូ និងរដ្ឋសាវប៉ូឡូទៀត ជាមួយគ្នានោះក៏កំពុងរាតត្បាត សន្សឹមៗទៅភាគខាងត្បូងប្រទេសផងដែរ ។
ស្ត្រីម្នាក់ឈ្មោះ Patricia Compassi ចែករំលែកតាមបណ្តាញសង្គមពីករណីកូនប្រុសរបស់នាងឈ្មោះ Lorenzo ដែលកើតមកមានជំងឺស្វិតខួរក្បាល ។ នាងថាពេលមានផ្ទៃពោះដំបូងនាងទៅមន្ទីរពេទ្យឆ្លុះមើលតើក្នុងខ្លួនមានវីរុស Zika ឬអត់ តែឆ្លុះរកមើលយ៉ាងណាក៏អត់ឃើញមានអីសោះ ។ នាងខំតែអរ ដឹងអីថ្ងៃមួយភ្ញាក់ពីដំណេកស្រាប់តែឃើញមានកន្ទួល អុជៗលើផ្ទៃមុខ ព្រមទាំងមានការឈឺចាប់តាមសន្លាក់ឆ្អឹងឆ្អែង ។ ដំបូងវេជ្ជបណ្ឌិតគិតថាមកពីនាងអាលែស៊ីចំណី តែតាមពិតឆ្លងវីរុសZika សោះ ។ ដល់ពេលផ្ទៃពោះនាងជិតគ្រប់ខែ វេជ្ជបណ្ឌិតរកឃើញថាកូនក្នុងផ្ទៃនាងមានជំងឺស្វិតខួរក្បាល ។
វីរុស Zika ត្រូវបានរកឃើញដំបូងក្នុងឆ្នាំ១៩៤៧ នៅតំបន់ដែលពពួកស្វា Zika របស់ប្រទេសអ៊ូហ្គង់ដា ខាងទ្វីបអាហ្វ្រិករស់នៅ ហើយវាបានឆ្លងមកមនុស្សក្នុងឆ្នាំ១៩៦០ ។ វាឆ្លងមកតំបន់ប៉ាគីស្ថានខាងត្បូង និងតំបន់មួយចំនួននៅទ្វីបអាស៊ី ហើយ ថ្មីៗកន្លងមកស្រាប់តែផ្ទុះនៅអាមេរិកឡាទីនតែម្តង ។ មកដល់សព្វថ្ងៃ វីរុស Zika ផ្ទុះខ្លាំងប៉ុន្មានដងដែលគេកត់សម្គាល់បាន ។ វាផ្ទុះខ្លាំងដំបូងនាឆ្នាំ២០០៧ នៅកោះ Yapislands ក្នុងប្រជុំកោះ Micronesia ភាគខាងលិចមហាសមុទ្រប៉ាស៊ីហ្វិក ធ្វើឱ្យប្រជាជន៣ភាគ៤លើកោះនោះឆ្លងវីរុស Zika តែកាលណោះគ្មានទារកណាកើតមកមានជំងឺស្វិតខួរក្បាលឡើយ ។ ការឆ្លងវីរុស Zika ដ៏ធំលើកទីពីរ កើតក្នុងឆ្នាំ២០១៣ នៅកោះ Polynesia របស់បារាំង ធ្វើឱ្យប្រជាជន២៨.០០០នាក់ក្នុងចំណោមប្រជាជន២៧០.០០០នាក់ ដែលរស់នៅកោះឆ្លងវីរុស Zika តែកាលណោះគេក៏រកមិនឃើញមានទារកណាកើតមានជំងឺស្វិតខួរក្បាលដែរ ។ វេជ្ជបណ្ឌិតប្រស៊ីលមួយចំនួនសង្ស័យអ្នកទេសចរទៅពីអាស៊ី និងពីសមុទ្រប៉ាស៊ីហ្វ្រិក ជាអ្នកនាំវីរុស Zika ចូលប្រទេសប្រេស៊ីលកាលពីរដូវប្រកួតបាល់ទាត់ពិភពលោកឆ្នាំ២០១៤ ។
វីរុស Zika ត្រូវគេជឿថា ឆ្លងរាលដាលតាមរយៈសត្វមូស Aedesaegypti ។ នៅសហរដ្ឋអាមេរិកមូសប្រភេទនេះ មានវត្តមានតិចតួចនៅរដ្ឋតិចសាស់ ផ្លរីដា និងហាវ៉ៃ ។ សព្វថ្ងៃប្រេស៊ីលកំពុងប្រឹងប្រែងយ៉ាងខ្លាំងប្រឆាំងមូស Aedes aegypti ផង អំពាវនាវប្រជាជនឱ្យចូលរួមកម្ចាត់មូសចង្រៃប្រភេទនេះផង ពិសេសព្រមាន នារីនៅតំបន់គ្រោះថ្នាក់មួយចំនួនកុំអាលមានកូនខ្លាចក្រែងកូនកើតមកមានជំងឺស្វិតខួរក្បាល។ នៅទីក្រុងរីយ៉ូដឺហ្សាណេរ៉ូ ទីក្រុងដែលបានទទួលសិទ្ធិរៀបចំការប្រកួតកីឡាអូឡាំពិកឆ្នាំ២០១៦នេះ អាជ្ញាធរក្រុងសុំឱ្យបុគ្គលិកពេទ្យទៅតាមផ្ទះប្រជាជនជាង៩លានគ្រួសារដើម្បីណែនាំការធ្វើអនាម័យលុបបំបាត់ថ្លុកទឹក និងកម្ទេចចោល អ្វីៗដែលអាចដក់ទឹក ជាមួយគ្នានោះតាមដាននារីកំពុងមានផ្ទៃពោះដែលសង្ស័យឆ្លងវីរុស Zika ផងដើម្បីមានវិធានការទប់ទល់ទាន់ពេលវេលា ៕
ចែករំលែកព័តមាននេះ