ករណីមួយចំនួន ការប្លន់កូនក្រមុំ (ការស្ទាក់ចាប់ ស្រីៗតាមផ្លូវដើម្បីបង្ខំឱ្យរៀបការធ្វើប្រពន្ធខ្លួន គេហៅថាប្លន់កូនក្រមុំ) បញ្ចប់ទៅវិញជាមួយសោកនាដកម្មបង្ហូរទឹកភ្នែកក៏មាន ដូចយ៉ាងឆ្នាំ២០០៩ រថយន្ត១គ្រឿង
ករណីមួយចំនួន ការប្លន់កូនក្រមុំ (ការស្ទាក់ចាប់ ស្រីៗតាមផ្លូវដើម្បីបង្ខំឱ្យរៀបការធ្វើប្រពន្ធខ្លួន គេហៅថាប្លន់កូនក្រមុំ) បញ្ចប់ទៅវិញជាមួយសោកនាដកម្មបង្ហូរទឹកភ្នែកក៏មាន ដូចយ៉ាងឆ្នាំ២០០៩ រថយន្ត១គ្រឿងដែលស្ទាក់ចាប់កូនក្រមុំតាមផ្លូវ ពេលចាប់បានហើយ បើកគេចក្នុងល្បឿនលឿនបង្កឱ្យមានគ្រោះថ្នាក់ចរាចរណ៍ បណ្ដាលមនុស្ស៤នាក់ក្នុងរថយន្តនោះ គឺ៣នាក់ជា ប្រុសៗ និងម្នាក់ជាកូនក្រមុំស្លាប់យ៉ាងអាណោចអាធ័ម ។
រដ្ឋស្វយ័តឆេកឆ្នី នៅក្នុងសហព័ន្ធរុស្ស៊ី ពេលនេះផ្ទុះប្រពៃណីប្លន់កូនក្រមុំឡើងវិញ គួរឱ្យព្រួយបារម្ភ ។
ពេលអាយុ១៥ឆ្នាំនាង Jalina Dementieva មិនដែលគិតដល់ការយកប្ដីម្ដងណាឡើយ។ នាងចង់រៀនបន្តរហូតដល់ក្លាយជាវេជ្ជបណ្ឌិតសិន ទើបរៀបការជាមួយប្រុសដែលខ្លួនស្រឡាញ់ពេលខ្លួនអាយុ២៥ឆ្នាំ ។ ប៉ុន្តែជាមួយប្រពៃណីប្លន់កូនក្រមុំ ដែលនៅតែស្ថិតស្ថិរក្នុងសង្គមឆេកឆ្នី គម្រោងជីវិតរបស់នាងមិនបានទទួលជោគជ័យដូចការគូសវាសក្នុងគំនិតរបស់នាងឡើយ ។
បណ្ដាថ្ងៃខែខ្មៅងងឹត
នាងJalina មិននឹកស្មានទាល់តែសោះ ថ្ងៃមួយពេលនាងកំពុងធ្វើដំណើរត្រឡប់ពីសាលារៀនវិញ ក៏ត្រូវយុវជនម្នាក់ឈ្មោះ Rusdamu រួមដៃជាមួយមិត្តភក្តិរបស់គេប៉ុន្មាននាក់ទៀត ស្ទាក់ចាប់តាមផ្លូវនាំឡើងរថយន្ត១គ្រឿង ហើយបើកសំដៅផ្ទះមួយ ដែលជាសាច់ញាតិរបស់ខ្លួននៅជាយក្រុង Grozy ។ នៅទីនោះ នាងត្រូវRusdamu ចាប់បង្ខំឱ្យរៀបការជាមួយខ្លួន ។ សព្វថ្ងៃនាងក្លាយជាម្ដាយរបស់កូន២នាក់ ពេលទើបតែមានអាយុ២៣ឆ្នាំ ។
ករណីប្លន់កូនក្រមុំមួយទៀត គឺអ្នកកាសែតស្រី Elina Ersehoyera ត្រូវចាប់ខ្លួន ហើយបង្ខំឱ្យរៀបការធ្វើប្រពន្ធទី៤របស់មេភេរវករឈ្មោះ Shamil Basaqev ជនដែលនៅពីក្រោយការបាញ់ប្រហារយ៉ាងសាហាវឃោរឃៅនៅសាលាមធ្យមសិក្សាBeslan បណ្ដាលឱ្យមានមនុស្សស្លាប់រាប់រយនាក់ ។ ថ្ងៃទី១១ កក្កដា ២០០៦ ពេលមេភេរវកររូបនោះត្រូវសម្លាប់ ទើបនាងElina មានឱកាសបានជួបមុខម្ដាយ និងជម្រាបប្រាប់ម្ដាយពីជីវិតទី២របស់ខ្លួនរយៈពេលដែលនាងបាត់ខ្លួន ដោយគ្មានដំណឹងអ្វីសោះដែលតាមពិតពេលនោះនាងត្រូវមេភេរវករចាប់ខ្លួន និងបង្ខំឱ្យរៀបការធ្វើប្រពន្ធទី៤របស់គេ បើមិនព្រមទេជីវិត ប្អូនៗរបស់នាងនឹងត្រូវរងគ្រោះ។ នាងរស់ក្នុងបណ្ដាថ្ងៃខែដ៏ខ្មៅងងឹត រហូតដល់ថ្ងៃBasaqev ត្រូវសម្លាប់ ។ ប៉ុន្តែជីវិតមានសេរីភាពវិញរបស់នាង ក៏មិនបានស្ថិតស្ថិរយូរដែរ ,ក្រោយពេលមេភេរវករស្លាប់បានមួយរយៈ ស្រាប់តែនាងត្រូវជនមិនស្គាល់មុខចាប់ខ្លួនទៀត ហើយនាងក៏បាត់ដំណឹងសូន្យឈឹងរហូតដល់សព្វថ្ងៃ ។
ចំណោមអាពាហ៍ពិពាហ៍៥ មានមួយគឺកូនក្រមុំត្រូវស្ទាក់ប្លន់តាមផ្លូវ
ការវិលត្រឡប់មកវិញដ៏ខ្លាំងក្លារបស់ប្រពៃណីប្លន់កូនក្រមុំ បានបង្កឱ្យមានអារម្មណ៍មិនល្អចំពោះគ្រួសារមានកូនក្រមុំនៅឆេកឆ្នី ,ពិសេសពេលដែលករណីចាប់កូនក្រមុំលក់ឱ្យពួកឧទ្ទាមកាន់តែមានច្រើនឡើង ។ តាមការស្រាវជ្រាវឃើញថា ចំណោមអាពាហ៍ពិពាហ៍ចំនួន៥ នៅប្រទេសកាន់សាសនាអ៊ិស្លាមមួយនេះ មានការរៀបអាពាហ៍ពិពាហ៍មួយដែលកូនក្រមុំជាជនរងគ្រោះត្រូវគេចាប់តាមផ្លូវ ។ ព្រោះតែប្រពៃណី នេះស៊ីជម្រៅច្រើននៅឆេកឆ្នីបានឈានទៅរកជំងឺសរសៃប្រសាទ ដោយសាររស់នៅជាមួយជីវិតគ្មានស្នេហាពិតប្រាកដ ក្លាយជាទាសីផ្លូវភេទ និងជាម៉ាស៊ីនបង្កើតកូនឱ្យគេ ។
ព្រោះតែដូច្នេះ ទើបប្រមុខអាជ្ញាធរឆេកឆ្នីបានចេញសេចក្ដីសម្រេចពិន័យ១លានរូប(៣៣.៤០០ដុល្លារអាមេរិក) ចំពោះស្ថានភាពប្លន់កូនក្រមុំ ។ ជាមួយការសម្រេចចិត្តនេះដែរ អាចារ្យ (អ៊ិស្លាម) ដែលចេញមុខធ្វើអធិបតីក្នុងពិធីរៀបការដែលគ្មានការយល់ព្រមពីកូនក្រមុំក៏ត្រូវទទួលខុសត្រូវករណីប្លន់កូនក្រមុំដូចគ្នា ។ អាចារ្យ (អ៊ិស្លាម) ទាំងនោះ ត្រូវបង់ប្រាក់១លានរូបឱ្យឪពុកម្ដាយកូនក្រមុំ ។ អ្នកមានតួនាទីក្នុងអាជ្ញាធរមូលដ្ឋាន និងពួកអាចារ្យ(អ៊ិស្លាម) ដែលចូលរួមក្នុងពិធីរៀបការប្រភេទនោះ ឬប្រើឥទ្ធិពលរបស់ខ្លួនបង្ខិតបង្ខំឪពុកម្ដាយកូនក្រមុំឱ្យយល់ព្រមតាមការចង់បានរបស់កូនកំលោះ ដែលប្លន់កូនក្រមុំ នឹងត្រូវដកតួនាទីគ្រវាត់ចោល។ លោក Sultan Hirzaye ប្រមុខអាជ្ញាធរឆេកឆ្នីព្រមានថា «ចាប់ពីពេលហ្នឹងទៅ អាជ្ញាធរត្រូវតែប្រើវិធានការមិនធ្លាប់មាននេះ ដើម្បីប្រឆាំងប្រពៃណីប្លន់កូនក្រមុំ» ។
ក្រោយពេលសហភាពសូវៀតដួលរលំ រដ្ឋស្វយ័តឆេកឆ្នី វិលត្រឡប់ទៅប្រព្រឹត្ត អ្វីៗតាមបែបអ៊ិស្លាមវិញយ៉ាងឆាប់រហ័ស ប្រជាជនមូលដ្ឋានត្រូវស្លៀកពាក់តាមអ្វីដែលសាសនាអ៊ិស្លាមបានកំណត់ ប្រុសអាចមានប្រពន្ធច្រើនឡើងវិញ ,ប្រុសចាប់ផ្ដើមប្រមាថស្រី ៗតាមរបៀបចាត់ទុកខ្លួនជាអ្នកធំក្នុងគ្រួសារ ,ថ្នាក់ដឹកនាំឆេកឆ្នីម្នាក់ហ៊ានប្រកាសដោយចំហថា ស្រីៗត្រូវតែចំណុះប្ដីទាំងស្រុង ៕
ចែករំលែកព័តមាននេះ