ប្រាប់ឱ្យបញ្ឈប់ការសង់ តែអត់ស្តាប់ ចាត់វិធានការកណ្តាប់ដៃដែក
- កំពត
ខេត្តកំពត ៖ កម្លាំងអាជ្ញាធរខេត្ត ដឹកនាំដោយលោក សេង សិរីបុត្រ អភិបាលរងខេត្ត និងលោក នាក់ សុវណ្ណារី…
ខេត្តកំពត ៖ កម្លាំងអាជ្ញាធរខេត្ត ដឹកនាំដោយលោក សេង សិរីបុត្រ អភិបាលរងខេត្ត និងលោក នាក់ សុវណ្ណារី អភិបាល ស្រុកទឹកឈូ ដែលរួមមាន កងរាជអាវុធហត្ថ និងនគរបាលខេត្ត ដោយមានការសម្របសម្រួលនីតិវិធីពីសំណាក់ឯកឧត្តមព្រះរាជអាជ្ញាអមសាលាដំបូងខេត្ត កាលពីព្រឹកថ្ងៃទី១៣ ខែធ្នូ ឆ្នាំ២០២១ បាននាំយកគ្រឿងចក្រអេស្កាវ៉ាទ័រចំនួន៣គ្រឿងទៅវាយកម្ទេចរបងបេតុងដ៏រឹងមាំចំនួន៣កន្លែងផ្សេងៗគ្នា នៅតាមបណ្ដោយមាត់ព្រែកស្ពានក្បាលរមាស ស្ថិតក្នុងភូមិត្រពាំងធំ ឃុំជុំគ្រៀល ស្រុកទឹកឈូ ។
លោក សេង សិរីបុត្រ បានប្រាប់អ្នកយកព័ត៌មានថា របងបេតុងដែលគេធ្វើរំលោភយកដីរបស់រដ្ឋតាមបណ្តោយមាត់ព្រែកនេះមានម្ចាស់ ២នាក់ តែទីតាំងដែលយកគ្រឿងចក្រទៅវាយកម្ទេចនិងឈូសឆាយនេះមាន៣កន្លែងផ្សេងគ្នា ។ មន្ត្រីមន្ទីររៀបចំដែនដី បានធ្វើការវាស់វែងរួចហើយដែលបង្ហាញថា របងបេតុងដ៍រឹងមាំទាំងអស់នោះ ត្រូវបានធ្វើរំលោភយកដីមាត់ព្រែកជាដីរបស់រដ្ឋ ។ អាជ្ញាធរខេត្តបានជូនដំណឹងដល់ម្ចាស់សំណង់ដែលបានធ្វើរំលោភយកដីរដ្ឋត្រូវរុះរើដោយខ្លួនឯងតាមការកំណត់ ហើយបើម្ចាស់សំណង់ទាំងនេះមិនរុះរើទេ គឺអាជ្ញាធរខេត្តនឹងយកគ្រឿងចក្រទៅវាយកម្ទេចចោល ។
លោក នាក់ សុវណ្ណារី បានឱ្យដឹងដែរថា សំណង់រឹងមាំនៅតាមបណ្ដោយព្រែកស្ពានក្បាលរមាសនេះ អាជ្ញាធរស្រុកបានជូនដំណឹងដល់ម្ចាស់សំណង់ឈ្មោះ អេង សុខហេង និងឈ្មោះ អាន លឹមគួយ ឱ្យបញ្ឈប់ការសាងសង់ តែម្ចាស់សំណង់នៅតែជួលកម្មកទៅធ្វើ ទើបពេលនេះយើងត្រូវប្រើកម្លាំងនិងគ្រឿងចក្រមកវាយនិងឈូសឆាយដីតាមបណ្ដាយព្រែកនេះ ។ ទោះបីជាបែបណា ឈ្មោះដែលត្រូវបានប្រាប់ឱ្យដឹងនេះ មើលទៅគ្រាន់តែជាអ្នកឈរឈ្មោះឱ្យគេប៉ុណ្ណោះ ព្រោះថាតាមស្ថានភាពសំណង់របងថ្មនេះ មិនមែនមនុស្សធម្មតាសាងសង់បាននោះឡើយ ។
លោក នាក់ សុវណ្ណារី ថ្លែងទៀតថា ដីចំណីព្រែកចំនួន៣០ម៉ែត្រ និងតាមបណ្ដាយព្រែកដែលយើងបានវាយកម្ទេចចោលនេះប្រវែងជាង៥០០ម៉ែត្រ ត្រូវរក្សាទុកជាដីរបស់រដ្ឋវិញ ។ ប៉ុន្តែតាមការឯកភាពរបស់លោក សេង សិរីបុត្រ គឺដីតាមបណ្ដាយព្រែកនេះមានគម្រោងធ្វើផ្លូវនិងសួនច្បារសម្រាប់ទាក់ទាញអ្នកទេសចរមកកម្សាន្តនៅស្ពានក្បាលរមាសនេះ ៕
ចែករំលែកព័តមាននេះ