ខេត្តកណ្តាល ៖ សាច់គោ និងសាច់ក្របី ប្រមាណ៣តោន ដែលនាំចូលដោយខុសច្បាប់ពីប្រទេសវៀតណាមដែលត្រូវបានសមត្ថកិច្ចចម្រុះនៃស្នងការនគបាលខេត្តកណ្តាលបង្ក្រាបត្រូវបានដុតកម្ទេចចោលរួចរាល់ ខណៈម្ចាស់រថយន្តដឹកសាច់ខូចគុណភាពទាំងអស់ត្រូវបានពិន័យអន្តរកាល ។ នេះបើតាមសមត្ថកិច្ចខេត្តកណ្តាល ។
ឧត្តមសេនីយ៌ត្រី លី សុជាតិ ស្នងការរងទទួលផែនសេដ្ឋកិច្ច ស្នងការដ្ឋាននគរបាលខេត្តកណ្តាល បានប្រាប់សារព័ត៌មានកោះសន្តិភាព នាថ្ងៃទី១៣ ខែធ្នួ ឆ្នាំ២០២១ នេះថាពាក់ព័ន្ធនឹងវត្ថុតាងមានសាច់គោ និងសាច់ក្របី ដែលនាំចូលខុសច្បាប់ពីប្រទេសវៀតណាម ត្រូវបានដុតបំផ្លាញចោល នៅថ្ងៃទី១២ ខែធ្នួ ឆ្នាំ២០២១ ម្សិលមិញ ហើយការបំផ្លាញចោលធ្វើនៅបរិវេណស្នងការដ្ឋាននគរបាលខេត្តកណ្តាល ។
ឧត្តមសេនីយ៌ត្រី លី សុជាតិ បានបន្តទៀតថា «ចំពោះអ្នកដែលបើកបររថយន្តដឹកសាច់គោ និងសាច់ក្របី ត្រូវបានសមត្ថកិច្ចជំនាញធ្វើការពិន័យអន្តរកាល មិនមានធ្វើការបញ្ជួនទៅតុលាការទេ ប៉ុន្តែសុំណុំរឿង និងម្ចាស់ទីតាំងដែលនាំចូលត្រូវបានបញ្ជួនទៅតុលាការហើយ» ។
បើតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា CFF បានឱ្យដឹងថាកន្លងទៅនេះ មន្ត្រីក.ប.ប. បានចុះត្រួតពិនិត្យទៅលើអនុលោមភាពទៅលើគុណភាព និងសំបកវេចខ្ចប់ទំនិញយ៉ាងសកម្មនៅលើទីផ្សារនៅទូទាំងប្រទេស ។ ការចុះត្រួតពិនិត្យនេះ គឺក្នុងគោលបំណងទប់ស្កាត់ការចរាចរណ៍ទំនិញក្លែងក្លាយទំនិញខូចគុណភាព និងទំនិញដែលមានសំបកវេចខ្ចប់មិនត្រឹមត្រូវ ។
ប្រភពដដែលបានបន្តថា ជាក់ស្ដែងកន្លងទៅនេះ មន្ត្រីក.ប.ប. ប្រចាំខេត្តកណ្ដាលបានរកឃើញ និងដកហូតទំនិញខូចគុណភាពផលិតបានសរុបចំនួន៣តោនពីទីផ្សារ និងសិប្បកម្មនានាក្នុងខេត្តកណ្ដាល ។ ទំនិញដែលត្រូវដកហូតបានទាំងនោះត្រូវបានមន្ត្រីក.ប.ប. ធ្វើការកម្ទេចចោលនៅក្រុងតាខ្មៅ នៅព្រឹកថ្ងៃទី១១ ខែធ្នូ ឆ្នាំ២០២១នេះ ដោយមានការឯកភាពពីព្រះរាជអាជ្ញាអមសាលាដំបូងខេត្តកណ្ដាល ព្រមទាំងមានការចូលរួមពីមន្ត្រីពាក់ព័ន្ធផ្សេងទៀតផងដែរ ៕
ចែករំលែកព័តមាននេះ