បន្ទាប់ពីប៉ះទង្គិចគ្នាដោយកាំបិត និងដុំថ្មមួយប្រាវ បណ្ដាលឲ្យភាគីម្ខាងចាញ់រហូតរងរបួសចំនួន២នាក់ លុះបួនថ្ងៃក្រោយមក សមត្ថកិច្ចបានធ្វើការស្រាវជ្រាវរហូតឃាត់ខ្លួនភាគីដែលច្បាំងឈ្នះបានចំនួន៦នាក់ជាបន្តបន្ទាប់ បង្កឱ្យមាន
ខេត្តបាត់ដំបង ៖ បន្ទាប់ពីប៉ះទង្គិចគ្នាដោយកាំបិត និងដុំថ្មមួយប្រាវ បណ្ដាលឲ្យភាគីម្ខាងចាញ់រហូតរងរបួសចំនួន២នាក់ លុះបួនថ្ងៃក្រោយមក សមត្ថកិច្ចបានធ្វើការស្រាវជ្រាវរហូតឃាត់ខ្លួនភាគីដែលច្បាំងឈ្នះបានចំនួន៦នាក់ជាបន្តបន្ទាប់ បង្កឱ្យមានការភ្ញាក់ផ្អើលកាលព្រឹកថ្ងទី១១ ខែធ្នូ ឆ្នាំ២០២១ ដោយជនខ្លះក្របួច.កបាននៅខាងមុខសាលាខេត្ត និងខ្លះទៀតក្របួច.កបាននៅផ្ទះសំណាក់មួយកន្លែង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង។
បើតាមលោក ឈឿង គឹមសុង នាយការិយាល័យព្រហ្មទណ្ឌកំរិតស្រាល បានឲ្យដឹងថា ក្រោយការប្រយុទ្ធគ្នា ភាគីដែលឈ្នះនឹងមានគ្នាច្រើនផង បានរត់គេចខ្លួនបាត់ ខណៈភាគីដែលចាញ់ហើយមានគ្នាតិច បានរងរបួសចំនួន០២នាក់។ លោកបានប្រាប់ថា ក្រោយកើតហេតុ កម្លាំងរបស់លោកបានសហការជាមួយកម្លាំងជំនាញការិយាល័យព្រហ្មទណ្ឌកំរិតធ្ងន់ ធ្វើការស្រាវជ្រាវតាមឃាត់ខ្លួនភាគីដែលឈ្នះបានចំនួន០៦នាក់ ក្នុងចំណោមបក្សពួកជិត១០នាក់។
បើតាមរបាយការណ៍ ក្រុមជនអន្ធពាលទាំង០៦នាក់ដែលត្រូវឃាត់ខ្លួនបាននោះ គឺមាន១-ឈ្មោះ សុង ភារម្យ អាយុ២៦ឆ្នាំ ២-ឈ្មោះ រិទ្ធ មេសា ហៅសាល អាយុ១៩ឆ្នាំ ៣-ឈ្មោះ សុខ រីហ្វី ហៅង៉ោល អាយុ២៣ឆ្នាំ ៤-ឈ្មោះ រី សារ៉ាក់ ហៅផ្លិក អាយុ២១ឆ្នាំ ៥-ឈ្មោះ ជួន វ៉ាន់ឌីន អាយុ២១ឆ្នាំ និង៦-ឈ្មោះ ចេង សារ៉េតប្រាថ្នា ហៅពន្លឺ ។ ដោយឡែកគាគីដែលចាញ់ហើយមានរបួសផងនោះ មានឈ្មោះ អែល អ៊ូម៉ើត ហៅម៉ៅ អាយុ២០ឆ្នាំ របួសកំភូនដៃ និងម្នាក់ទៀតឈ្មោះ សឿន ជីងឈី អាយុ១៧ឆ្នាំ របួសធ្ងន់។
ពាក់ព័ន្ធនឹងការប៉ះទង្កិចគ្នាដោយកាំបិត និងដុំថ្មរវាងជនទំនើងទាំង០២ក្រុមខាងលើនេះ ពុំទាន់មានចម្លើយជាក់លាក់ដែលនាំឲ្យមានការប្រយុទ្ធគ្នានោះទេ។ ប៉ុន្តែបើតាមចម្លើយពីភាគីដែលឈ្នះ និងត្រូវចាប់ខ្លួនចំនួន០៦នាក់នេះ បាននិយាយថា មូលហេតុដែលនាំឲ្យពួកគេទាញកាំបិត និងដុំថ្មកា.ប់ចាក់ និងគប់គ្នាយ៉ាងបែបនេះ គឺផ្ដើមចេញពីរឿង «ជម្លោះពាក្យសំដី»។
លោក ឈឿង គឹមសុង បាននិយាយក្នុងរបាយការណ៍ថា ក្រុមក្មេងទំនើងទាំង០២ក្រុមនេះ បានប៉ះទង្គិចគ្នាកាលពីវេលារំលងអធ្រាត្រឈានចូលថ្ងៃទី០៨ ខែធ្នូ នៅតាមផ្លូវលេខ១ ត្រង់ចំណុចខាងមុខមន្ទីររៀបចំដែនដីនគររូបនីយកម្ម និងសំណង់ ស្ថិតក្នុងក្រុងបាត់ដំបង។
របាយការណ៍បានបញ្ជាក់ទៀតថា ភាគីដែលឈ្នះបានប្រើកាំបិត និងដុំថ្ម កា.ប់និងគប់ទៅលើភាគីដែលចាញ់ បណ្ដាលឲ្យរបួស០២នាក់។
ក្រោយពេលកើតហេតុ ភាគីដែលឈ្នះ ហើយមានគ្នាច្រើនបានរត់គេចខ្លួន ខណៈភាគី០២នាក់ដែលចាញ់ បានទៅមន្ទីរពេទ្យ ដើម្បីរុំរបួស លុះក្រោយមកក៏បានដាក់ពាក្យបណ្ដឹង។ បន្ទាប់ពីទទួលបានពាក្យបណ្ដឹង សមត្ថកិច្ចបានធ្វើការស្រាវជ្រាវ រហូតឃាត់ខ្លួនភាគីដែលឈ្នះបានចំនួន០៦នាក់ ខណៈប៉ុន្មាននាក់ទៀតកំពុងរត់គេចខ្លួន។
យ៉ាងណាក្ដី បើតាមលោក ឈឿង គឹមសុង បានបញ្ជាក់ថា ពេលនេះលោកស្នងការបានបញ្ជាឲ្យមន្ត្រីជំនាញសួរនាំជនសង្ស័យ ដើម្បីកសាងសំណុំរឿងបញ្ជូនទៅកាន់សាលាដំបូង ហើយបានបញ្ជាឲ្យតាមចាប់ខ្លួនបក្សពួកដែលនៅសេសសល់ កំពុងរត់គេចខ្លួនបន្តទៀត៕
ចែករំលែកព័តមាននេះ