កឧត្តម គង់ សោភ័ណ្ឌ អភិបាលខេត្ត បានស្នើឱ្យមន្ត្រីជំនាញនិងសមត្ថកិច្ចពាក់ព័ន្ធទាំងអស់ ពិនិត្យ និងពិភាក្សាឱ្យបានល្អិតល្អន់និងគ្រប់ជ្រុងជ្រោយ ក្នុងការបន្ធូរបន្ថយទោសនិងលើកលែងទោសដល់ទណ្ឌិត ធ្វើយ៉ាងណាស្របទៅនឹង
ខេត្តកណ្ដាល ៖ ឯកឧត្តម គង់ សោភ័ណ្ឌ អភិបាលខេត្ត បានស្នើឱ្យមន្ត្រីជំនាញនិងសមត្ថកិច្ចពាក់ព័ន្ធទាំងអស់ ពិនិត្យ និងពិភាក្សាឱ្យបានល្អិតល្អន់និងគ្រប់ជ្រុងជ្រោយ ក្នុងការបន្ធូរបន្ថយទោសនិងលើកលែងទោសដល់ទណ្ឌិត ធ្វើយ៉ាងណាស្របទៅនឹងច្បាប់និងគោលការណ៍ណែនាំនានា សំដៅជ្រើសរើសបានទណ្ឌិតដែលស្នើសុំការបន្ធូរបន្ថយទោស និងលើកលែងទោស ជាអ្នកមានការតាំងចិត្តកែប្រែខ្លួនឱ្យក្លាយជាពលរដ្ឋល្អក្នុងសង្គមជាតិពិតប្រាកដ អាចរស់នៅប្រកបដោយសេចក្តីសុខជាមួយក្រុមគ្រួសារ ក៏ដូចជាក្នុងសង្គមទាំងមូល ។
ឯកឧត្តមអភិបាលខេត្ត បានស្នើបែបនេះនៅក្នុងកិច្ចប្រជុំកាលពីរសៀលថ្ងៃទី៨ ខែធ្នូ ឆ្នាំ២០២១ នៅសាលាខេត្ត ដើម្បីពិនិត្យវាយតម្លៃកម្រិតកែប្រែខ្លួនរបស់ទណ្ឌិត ដែលត្រូវដាក់ស្នើសុំបន្ធូរបន្ថយទោសនិងលើកលែងទោស ក្នុងឱកាសទិវាជ័យជម្នះលើរបបប្រល័យពូជសាសន៍ ក្នុងឆ្នាំ២០២២ ខាងមុខ ។
ឯកឧត្តមអភិបាលខេត្តបានលើកឡើងថា ទណ្ឌិតទាំងឡាយដែលអាចស្នើសុំការបន្ធូរបន្ថយទោស និងលើកលែងទោស ត្រូវមានលក្ខណសម្បត្តិគ្រប់គ្រាន់តាមលក្ខខណ្ឌកំណត់ដោយច្បាប់ ។ សម្រាប់ទោសដែលមិនមែនជាកម្មវត្ថុក្នុងការលើកលែងទោស បន្ធូរបន្ថយទោស ឬពិបាកក្នុងការលើកលែងទោស និងបន្ថយទោសនោះគឺមានដូចជា ទោសចាប់ជំរិតទារប្រាក់ ប្លន់សម្លា.ប់ រំលោ.ភសម្លា.ប់ ឃាតក.ម្មសា.ហាវឃោរ.ឃៅ ទោសផលិតនិងជួញដូរគ្រឿង.ញៀន ភេរវកម្ម ជនប្រដាប់អាវុធ ទណ្ឌិតទទួលទោសច្រើនដង ទណ្ឌិតដែលជាប់ពន្ធនាគារច្រើនដង និងទណ្ឌិតធ្លាប់ល្មើសជាប់ពិន័យជាដើម ។
គួរបញ្ជាក់ថា ព្រះរាជាណាចក្រកម្ពុជា បានកំណត់យកពិធីបុណ្យធំៗចំនួន៥ សម្រាប់ស្នើសុំបន្ធូរបន្ថយទោស និងលើកលែងទោសឲ្យទណ្ឌិត ក្នុងនោះមាន ៖
១-ទិវាជ័យជម្នះលើរបបប្រល័យពូជសាសន៍៧មករា
២-ពិធីបុណ្យចូលឆ្នាំថ្មីប្រពៃណីជាតិ
៣-ពិធីបុណ្យវិសាខបូជា
៤-ពិធីបុណ្យឯករាជ្យជាតិ និង
៥-ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ។
លោក ឯម និមល ប្រធានពន្ធនាគារខេត្តបានឱ្យដឹងថា អង្គភាពពន្ធនាគារខេត្ត បានជ្រើសយកទណ្ឌិតចំនួន២០នាក់(ស្រី៣នាក់)មកដាក់ជូនគណៈកម្មការត្រួតពិនិត្យ និងវាយតម្លៃកម្រិតកែប្រែរបស់ទណ្ឌិត ក្នុងឱកាសទិវាជ័យជម្នះលើរបបប្រល័យពូជសាសន៍។ ជាលទ្ធផល ទណ្ឌិតដែលស្នើសុំបន្ធូរបន្ថយទោសរយៈពេល៣ខែ មានចំនួន១៥នាក់(ស្រី៣នាក់) ទណ្ឌិតស្នើសុំបន្ទូរបន្ថយទោសរយៈពេល១២ខែ មានចំនួន១នាក់ ៕
ចែករំលែកព័តមាននេះ