ខេត្តបាត់ដំបង ៖ បន្ទាប់ពីអ្នកភូមិនាំគ្នាបិទផ្លូវអស់រយៈពេលបីថ្ងៃ មិនឲ្យរថយន្តរាប់សិបគ្រឿងចូលដឹកថ្មនៅក្នុងការដ្ឋានកិនថ្មជួរ «ភ្នំតាគ្រាម» ដោយសារមិនព្រមធ្វើផ្លូវដីហុយចូលពេញៗផ្ទះរាល់ថ្ងៃ នៅព្រឹកថ្ងៃទី៩ ធ្នូ នេះ អ្នកភូមិបានយល់ព្រមបើកបារាស់ឲ្យរថយន្តធ្វើចរាចរណ៍ចូលដឹកថ្មបានដូចប្រក្រតីវិញហើយ…
ខេត្តបាត់ដំបង ៖ បន្ទាប់ពីអ្នកភូមិនាំគ្នាបិទផ្លូវអស់រយៈពេលបីថ្ងៃ មិនឲ្យរថយន្តរាប់សិបគ្រឿងចូលដឹកថ្មនៅក្នុងការដ្ឋានកិនថ្មជួរ «ភ្នំតាគ្រាម» ដោយសារមិនព្រមធ្វើផ្លូវដីហុយចូលពេញៗផ្ទះរាល់ថ្ងៃ នៅព្រឹកថ្ងៃទី៩ ធ្នូ នេះ អ្នកភូមិបានយល់ព្រមបើកបារាស់ឲ្យរថយន្តធ្វើចរាចរណ៍ចូលដឹកថ្មបានដូចប្រក្រតីវិញហើយ ក្រោយពីអាជ្ញាធរចុះទៅសម្របសម្រួល ហើយភាគីខាងក្រុមហ៊ុនកិនថ្ម ព្រមទទូលយកលក្ខខណ្ឌចំនួន៤ចំណុច ដែលស្នើឡើងដោយប្រជាពលរដ្ឋដែលរងផលប៉ះពាល់។
ប្រជាពលរដ្ឋរាប់សិបនាក់ និងច្រើនគ្រួសារ ដែលរងផលប៉ះពាល់ដោយសារធូលីដីហុយចូលផ្ទះរាល់ថ្ងៃ នៅភូមិប៉ោងស្វាយ ឃុំតាគ្រាម ស្រុកបាណន់ បាននាំគ្នាសែងកំណាត់ឈើ កំណាត់ដើមដូងដាក់ពាំងផ្លូវ កាលពីថ្ងៃទី ០៦ ធ្នូ មិនឲ្យរថយន្តចូលដឹកថ្ម នៅក្នុងការដ្ឋានកិនថ្ម នៅជួរ «ភ្នំតាគ្រាម» បានឡើយ ដែលមានក្រុមហ៊ុនឯកជនកិនថ្មលក់ចំនួន០៥ នៅតំបន់នោះ។ មូលហេតុ ដែលប្រជាពលរដ្ឋនាំគ្នាធ្វើដូច្នេះ ដោយសារតែភាគីក្រុមហ៊ុនកិនថ្មទាំងនេះមិនព្រមធ្វើផ្លូវ ដែលនាំឲ្យមានធូលីដីហុយចូលផ្ទះដែលនៅអមសងខាងផ្ឡុវចូលការដ្ឋានរៀងរាល់ថ្ងៃប៉ះពាល់ដល់សុខភាពយ៉ាងធ្ងន់ធ្ងរ។ នេះបើតាមការផ្ដល់បទសម្ភាសន៍ផ្ទាល់ជាមួយកោះសន្តិភាព នៅព្រឹកថ្ងៃទី ៩ ធ្នូ នៅកន្លែងកើតហេតុ ។
មិនតែប៉ុណ្ណោះ បើតាមអ្នកភូមិបាននិយាយថា ប៉ុន្មានឆ្នាំចុងក្រោយនេះ ដីហុយកាន់តែខ្លាំង ហើយផ្លូវខូចខាងក្រុមហ៊ុនកិនថ្មមិនព្រមធ្វើ រថយន្តដឹកលើសចំណុះ ធ្លាក់ថ្មរាយពេញផ្លូវ ដែលបង្កឲ្យមានគ្រោះថ្នាក់ដល់អ្នកដំណើ និងកូនសិស្សដែលជិះកង់ទៅសាលា ហើយទាំងភាគីក្រុមហ៊ុនកិនថ្ម ទាំងអ្នកបើរថយន្តដឹកថ្ម មិនដែលខ្វល់ខ្វាយអំពីផល់ប៉ះពាល់ដល់អ្នកភូមិ ឬ កូនសិស្សទាំងនោះទេ ម្នាក់ៗគិតតែប្រយោជន៏ផ្ទាល់ខ្លួន ដូច្នេះហើយទើបអ្នកភូមិនាំគ្នាបិទផ្លូវចេញចូលតែម្ដង ដើម្បីរកដំណោះស្រាយ។ លោក គង់ ម៉ៅ អាយុ៥៦ឆ្នាំ ដែលស្ថិតក្នុងចំណោមអ្នកតវ៉ាបាននិយាយថា ប៉ុន្មានឆ្នាំចុងក្រោយនេះ ផ្លូវក៏ខូច ដីក៏ហុយខ្លាំង ដែលធ្វើឲ្យប៉ះពាល់ខ្លាំងដល់ពលរដ្ឋដែលរស់នៅអមសងខាងផ្លូវចូលក្នុងការដ្ឋានកិនថ្ម។
មិនតែប៉ុណ្ណោះ លោកថា ដោយសារតែធូលីដីមួយថ្ងៃៗគ្មានស្រាកស្រាន្ត ទើបបង្ខំឲ្យលំនៅឋានបិទទ្វារ រីឯតូបលក់ដូរមួយចំនួនក៏ត្រូវបង្ខំចិត្តបិទទ្វារផ្អាកលក់ផងដែរ ព្រោះពិបាកដកដង្ហើមពេក ។ លោកម៉ៅ បានបញ្ជាក់ថា មូលហេតុ ដែលពលរដ្ឋនាំគ្នាបិទផ្លូវចេញចូលនេះ គឺ ដើម្បីរកដំណោះស្រាយ។ គាត់បានលើកអំពីដំណោះស្រាយយ៉ាងដូច្នេះថា «ឥឡូវនេះ អ្នកភូមិបានបិទផ្លូវមិនឲ្យរថយន្តចេញចូលដឹកថ្មទៀតទេ បើគ្មានដំណោះស្រាយពីអាជ្ញាធរ ឬ ខាងក្រុមហ៊ុន។ ពួកខ្ញុំមានលក្ខខណ្ឌ
ចំនួន០៤ចំណុច បើភាគីក្រុមហ៊ុនឯកភាព គឺ ពួកខ្ញុំបើកផ្លូវវិញ»។
លោកគង់ ម៉ៅ ក៏ដូចអ្នកភូមិជាច្រើននាក់ទៀតបានលើកហេតុផលនានា និង លើកយកលក្ខខ័ណ្ឌទាំង០៤ចំណុចនេះ នៅចំពោះមុខលោក អ៊ុឹម ប៊ុនយូ មេឃុំតាគ្រាម លោក អុឹម សុភ័ក្រ តំណាងក្រុមហ៊ុនកិនថ្ម «ណឹមម៉េង គ្រុប» នាយប៉ុស្ដិ៍នគរបាលតាគ្រាម និង លោកមេភូមិ កាលពីព្រឹថ្ងៃទី ៩ ធ្នូ ខណៈដែលជួបគ្នាដើម្បីរកដំណោះស្រាយ។ ប៉ុន្តែមិនមានវត្តមានតំណាងក្រុមហ៊ុនកិនថ្មីដទៃទៀតចូលរួមរកដំណោះស្រាយទេ គឺមានតែតំណាងក្រុមហ៊ុន «ណឹមម៉េងគ្រុប» តែមួយប៉ុណ្ណោះ ជាមួយនឹងអាជ្ញាធរ ដែលបានចុះជួបពលរដ្ឋនៅកន្លែងកើតហេតុ រីឯភាគីក្រុមហ៊ុនចំនួន០៤ មិនហ៊ានអើតកទេ គឺសម្ងំចាំទទូលផល។
លក្ខខណ្ឌទាំង០៤ចំណុច ដែលអ្នកភូមិបានស្នើទៅខាងក្រុមហ៊ុនកិនថ្មនោះមាន ១-ក្រុមហ៊ុនត្រូវធ្វើផ្លូវឡើងវិញ ២-រថយន្តមិនត្រូវដឹកលើសចំណុះ ហើយត្រូវគ្របឲ្យបានជិត ៣-រថយន្តដឹកថ្មមិនត្រូវបើកលឿនដែលអាចធ្វើឲ្យប៉ះពាល់ដល់សិស្សសាលានិងក្មេងៗដែលដើរឆ្លងផ្លូវ និង ៤-រថយន្តដឹកថ្មត្រូវបញ្ចប់ការដឹកជញ្ជូនត្រិមម៉ោង៧យប់។ ជាមួយនឹងលក្ខខណ្ឌទាំង០៤ចំណុចនេះ តំណាងក្រុមហ៊ុន «ណឹងម៉េង គ្រុប» លោក អ៊ឹម សុភ័ក្រ ហាក់មិនរារែកទេ ក្នុងការទទូលយក ។ លោក អ៊ឹម សុភ័ក្រ បានស្វាគមន៍ចំពោះលក្ខខណ្ឌ០៤ចំណុចរបស់ពលរដ្ឋ តែលោកបានស្នើត្រឡប់ទៅកាន់ពលរដ្ឋវិញ សុំឲ្យពលរដ្ឋបើកផ្លូវឲ្យរថយន្តចេញចូលដឹកថ្មនៅព្រឹកថ្ងៃចចារនេះតែម្ដង(៩ ១២ ២១)។
តំណាងក្រុមហ៊ុនរូបនេះបានលើកឡើងថា «ខ្ញុំឯកភាពទទូលយកលក្ខខណ្ឌទាំង០៤ចំណុចនេះ តែខ្ញុំសុំឲ្យពលរដ្ឋបើកផ្លូវឲ្យរថយន្តចេញ-ចូលនៅព្រឹកនេះតែម្ដង។ ប៉ុន្តែរឿងធ្វើផ្លូវឡើងវិញ ខ្ញុំសុំសន្យា នឹងចាប់ផ្ដើមធ្វើនៅសប្ដាហ៍ក្រោយនេះ ពីព្រោះខ្ញុំត្រូវការជួបពិភាក្សាគ្នាល្អិតល្អន់ជាមួយតំណាងក្រុមហ៊ុនកិនថ្មចំនួន០៤ទៀត ដើម្បីឯកភាពគ្នា តើត្រូវធ្វើបែបណា ? តើត្រូវធ្វើផ្លូវបេតុង ឬ ត្រូវចាក់កៅស៊ូ ? ព្រោះពេលនេះភាគីក្រុមហ៊ុននីមួយៗ មិនទាន់បានស្រុះស្រូលគ្នានៅឡើយទេ»។ លោក សុភ័ក្រ ក៏បានរំលឹកអំពីការស្ថាបនាផ្លូវចូលការដ្ឋាននេះកន្លងមកដែរថា កន្លងមក ផ្លូវក្រាលកៅស៊ូប្រវែង២គីឡូម៉ែត្រការដ្ឋានកិនថ្ម ភ្នំតាគ្រាម គឺក្រុមហ៊ុនលោកជាអ្នកធ្វើ គ្មានបដិភាគជាមួយក្រុមហ៊ុនផ្សេងទេ ។
ប៉ុន្តែពេលនេះ ផ្លូវបានខូចអស់ហើយ ដូច្នេះក្រុមហ៊ុនទាំងអស់ដែលមានការដ្ឋានកិនថ្ម ធ្វើចរាចរណ៏លើផ្លូវនេះ ត្រូវតែសហការគ្នាធ្វើ។ លោកក៏បានបញ្ជាក់ដែរថា បើមានតែការដ្ឋានរបស់លោកមួយធ្វើចរាចរណ៏លើផ្លូវនេះ ម្លេះលោកធ្វើយូរណាស់មកហើយ មិនមែនទុកឲ្យរំខានដល់ពលរដ្ឋរហូតមកដល់ថ្ងៃនេះទេ។ នៅចំពោះមុខពលរដ្ឋរាប់សិបនាក់ មេឃុំតាគ្រាម លោក អ៊ឹម ប៊ុនយូ ដែលចូលរួមជួយរកដំណោះស្រាយ បានគាំទ្រនូវការទទួលយកសំណើពីប្រជាពលរដ្ឋ របស់តំណាងក្រុមហ៊ុន «ណឹមម៉េង គ្រុប»។ លោកមេឃុំ បានសន្យាបន្ថែមលើការឯកភាពគ្នារវាងភាគីក្រុមហ៊ុនកិនថ្ម និង ប្រជាពលរដ្ឋ ដោយលោកបាននិយាយថា ពេលនេះយើងអាចរកដំណោះស្រាយឃើញហើយ ដោយភាគីទាំង២បានព្រមព្រៀងគ្នារួចហើយ លើសំណើ០៤ចំណុចដែលទាមទារដោយភាគីពលរដ្ឋ។
ប៉ុន្តែលោកមេឃុំបានបញ្ជាក់ប្រាប់ទៅភាគីពលរដ្ឋយ៉ាងដូច្នេះថា « ភាគីក្រុមហ៊ុនបានឯកភាពទទូលយកលក្ខខណ្ឌ០៤ចំណុចនេះហើយ តែសូមបងប្អូនទុកពេលមួយសប្ដាហ៏ ដើម្បីផ្ដល់លទ្ធភាពឲ្យក្រុមហ៊ុនកិនថ្ម ទាំងអស់ជួបពិភាក្សាគ្នា ពាក់ព័ន្ធនឹងបច្ចេកទេស នៃការសាងសង់ផ្លូវឡើងវិញ»។ មិនត្រឹមតែសន្យានឹងមាត់នៅចំពោះមុខប្រជាពលរដ្ឋប៉ុណ្ណោះទេ បើតាមលោក អ៊ឹម ប៊ុនយូ បានអះអាងថា ដើម្បីឲ្យមានការជឿជាក់ លោកនឹងធ្វើកិច្ចសន្យាជាលាយល័ក្ខអក្សរផ្ដិតស្នាមមេដៃរវាងភាគីទាំង០២ ដែលមានការចូលរួមពីអាជ្ញាធរភូមិ ឃុំ និង សមត្ថកិច្ចផង។ ហើយលោកនឹងអញ្ជើញតំណាងក្រុមហ៊ុនការដ្ឋានកិនថ្មទាំងអស់មកជួបពិភាក្សាគ្នា ដើម្បីចាត់ចែងពេលវេលាចុះសាងសង់ផ្លូវនេះមិនឲ្យលើដពីសប្ដាហ៏ក្រោយឡើយ។
ប៉ុន្តែយ៉ាងក៏ដោយ ជាមួយនឹងការសន្យានេះ ក្រុមអ្នកភូមិរាប់សិបនាក់ បានព្រមាននៅចំពោះមុខតំណាងក្រុមហ៊ុន និង លោកមេឃុំតាគ្រាមថា ពួកគេនឹងបិទផ្លូវជាស្ថាពរមិនបើកវិញសោះឡើយ ប្រសិនបើក្រុមហ៊ុនកុហក មិនព្រមចុះធ្វើផ្លូវក្នុងសប្ដាហ៏ក្រោយតាមការសន្យា៕
ចែករំលែកព័តមាននេះ