សារព័ត៌មានបរទេសកាលពីពេល ថ្មីៗកន្លងមកផ្សាយថា លោកប្រធានាធិបតីបារ៉ាក់អូបាម៉ា មេដឹកនាំសហរដ្ឋអាមេរិក បានចុះហត្ថលេខាលើសេចក្ដីព្រាងច្បាប់ស្ដីពីក្របី «Bison» កាលពីថ្ងៃទី៩ ខែឧសភា ឆ្នាំ២០១៦ ដោយចាត់ទុកជាសត្វអភិរក្ស និងជាសត្វនិមិត្ដរូបរបស់ជាតិ ។ក្របីចិញ្ចឹមកូនដោយទឹកដោះ ហើយវាជាសត្វមានន័យដ៏សំខាន់លើផ្នែកវប្បធម៌ និងសេដ្ឋកិច្ចក្នុងប្រវត្ដិសាស្ដ្រអាមេរិក ។ សេចក្ដីព្រាងច្បាប់នេះបានយល់ស្របពីសភា និងព្រឹទ្ធសភា កាលពីខែមុន ព្រមទាំងទទួលការគាំទ្រពីក្រុមអភិរក្ស និងអ្នកចិញ្ចឹមសត្វ ។
«Bison» ជាសត្វចិញ្ចឹមកូនដោយទឹកដោះ មានទំហំធំបំផុតនៅភូមិភាគអាមេរិកខាងជើង មានជម្រករស់នៅតាំងពីតំបន់ព្រៃនៅរដ្ឋអាឡាស្កា ភាគខាងជើងសហរដ្ឋអាមេរិក រហូតដល់តំនប់វាលស្មៅក្នុងប្រទេសម៉ិចស៊ិក ។
នៅពេលធំពេញវ័យ ក្របីប្រភេទនោះអាចមានទម្ងន់ដល់ទៅ១តោន ។ ទោះបីជាមានមាឌធំ និងទម្ងន់ធ្ងន់ក៏ដោយ ប៉ុន្ដែវាអាចរត់បានក្នុងល្បឿនប្រហែល៥៦គីឡូម៉ែត្រក្នុងមួយម៉ោង ។
កាលពីអតីតកាល ក្របី «Bison» មាននៅពេសពេញអាមេរិកខាងជើងជាច្រើនលានក្បាល ប៉ុន្ដែបច្ចុប្បន្នតួលេខនៅអាមេរិកមានប្រហែល៥០.០០០ក្បាល ភាគច្រើនចិញ្ចឹមនៅក្នុងកសិដ្ឋាន និងបង្កាត់ពូជជាមួយបសុសត្វនានា ។ ចំណែក «Bison» ក្នុងដែនធម្មជាតិមាននៅសេសសល់ប្រហែលពី២០.០០០ទៅ៣០.០០០ក្បាល ភាគច្រើនស្ថិតនៅក្នុងតំបន់អភិរក្សដែលរួចផុតពីការតាមបរបាញ់ និងមួយចំនួនប្រទះឃើញនៅក្នុងឧទ្យានជាតិ Yellowstone៕
ចែករំលែកព័តមាននេះ