ខេត្តរតនគិរី ៖ គំនរឈើធ្នង់រាប់សិបកំណាត់ដែលក្រុមឈ្មួញអារច្រៀករួចជាស្រេច និងលាក់ទុកបម្រុងដាក់បង្កប់តាមរថយន្តនាំទៅប្រទេសវៀតណាម បានត្រូវកម្លាំងសមត្ថកិច្ចសហការរុករកឃើញ និងរឹបអូសយកទៅរក្សារទុកជាបណ្តោះអាសន្ន ។
ការចុះបង្ក្រាបឈើតាមការបញ្ជាផ្ទាល់ពីលោក យិន ចំណាន ស្នងការនគរបាលខេត្តនេះ ធ្វើឡើងកាលពីវេលាម៉ោងប្រមាណ១១និង៣០នាទីព្រឹកថ្ងៃទី៤ ខែធ្នូ ឆ្នាំ២០២១កន្លងទៅ ដែលរួមមាន នគរបាលប៉ុស្តិ៍ឃុំប៉ុងដឹកនាំដោយលោក លាង អ៊ូ ព្រះរាជអាជ្ញារងអមសាលាដំបូងខេត្តលោក ឈាង សុភក្តិ នាយផ្នែកនគរបាលប្រឆាំងបទល្មើសសេដ្ឋកិច្ចខេត្ត និងលោក គឹម ឆេងលឹមនាយសង្កាត់រដ្ឋបាលព្រៃឈើស្រុកវើនសៃ ។
ប្រភពព័ត៌មានឲ្យដឹងថា នៅក្នុងការចុះ បង្ក្រាបនេះបានធ្វើការឆែកឆេរនៅក្នុងលំនៅឋាន មួយជាកម្មសិទ្ធិរបស់ឈ្មោះ នូ ខុម ភេទប្រុស អាយុ៥០ឆ្នាំ ជាកសិករនៅភូមិប៉ុង ឃុំប៉ុង ស្រុកវើនសៃ ។
ក្រោយពីការឆែកឆេរ កម្លាំងសមត្ថកិច្ចបានរឹបអូសយកឈើប្រណីតប្រភេទធ្នង់ចំនួ៦២កំណាត់ និងបានដឹកយកទៅរក្សាទុកនៅខណ្ឌរដ្ឋបាលព្រៃឈើខេត្តរតនគិរី ដើម្បីចាត់ការតាមច្បាប់ស្តីពីព្រៃឈើ តែមិនទាន់ធ្វើការវាស់វែងនៅឡើយទេ ៕
ចែករំលែកព័តមាននេះ