លោក ប៊ុន ផាក អ្នកជំនួញកំពុងល្បីរឿងស្នេហាជាមួយស្រីស្រស់ថៅកែហាងខោអាវត្រូវចាប់ខ្លួន
- ភ្នំពេញ
រាជធានីភ្នំពេញ ៖ លោក ប៊ុន រស្មី ហៅ ប៊ុន ផាក (Bun Park)…
រាជធានីភ្នំពេញ ៖ លោក ប៊ុន រស្មី ហៅ ប៊ុន ផាក (Bun Park)…
រាជធានីភ្នំពេញ ៖ លោក ប៊ុន រស្មី ហៅ ប៊ុន ផាក (Bun Park) ដែលគេស្គាល់ថាជាអ្នកជំនួញនិងគ្រូជោគជ័យមួយរូប ដែលថ្មីៗនេះបានតាំងខ្លួនជាមេធាវី ត្រូវបាននគរបាលព្រហ្មទណ្ឌកម្រិតស្រាលនៃស្នងការនគរបាល រាជធានីភ្នំពេញឃាត់ខ្លួន និងបញ្ជូនមកតុលាការហើយ នៅវេលាម៉ោង១០និង១០ព្រឹក ថ្ងៃទី៤ ខែធ្នូនេះ ។
ការបញ្ជួនខ្លួនលោក ប៊ុន ផាក មកតុលាការនៅព្រឹកថ្ងៃទី ៤ ធ្នូ នេះ គឺដើម្បីបញ្ជូនអោយតំណាងអយ្យការធ្វើការសាកសួរតាមនីតិវិធី ហើយចំពោះការចេញដីកាបញ្ជូនអោយស៊ើបសួរ ឬចោទប្រកាន់នោះ ក្រុមអ្នកសារព័ត៌មាន កំពុងរងចាំព្រោងព្រាតក្រៅរបងតុលាការ ដើម្បីទទួលការផ្តល់ដំណឹងពីលោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យាការ អមសាលាដំបូងរាជធានីភ្នំពេញ ។
សូមបញ្ជាក់ថា ឈ្មោះ ប៊ុន រស្មី ហៅ ប៊ុន ផាក (Bun Park) ដែលជាអ្នកជំនួញ បានតាំងខ្លួនជាមេធាវី នៅចំពោះមុខសមត្ថកិច្ច នៅក្នុងរឿងរ៉ាវទំនាក់ទំនងសេ្នហាជាមួយ នារីរូបស្រស់មួយរូប ជាអ្នករកស៊ីអនឡាញ ដែលកំពុងទទួលការចាប់អារម្មណ៍យ៉ាងខ្លាំងពីអ្នកលេងបណ្តាញសង្គម ដោយសារតែអតីតគូស្នេហ៍របស់ស្រីស្រស់ម្ចាស់ហាងសម្លៀកបំពាក់ល្បីឈ្មោះរូបនេះ បានចោទប្រកាន់ លោក ប៊ុន ផាក ជាជនទី៣ បំបែកបំបាក់ស្នេហារបស់ខ្លួន ។
សូមបញ្ជាក់ថា អង្គភាព បានទទួលពាក្យបណ្តឹងមួយចោទលើ លោក ប៊ុន ផាក ដោយដើមបណ្ដឹងមានឈ្មោះថា ជា ចាន់តុលា ភេទប្រុស អាយុ២៩ឆ្នាំ ជនជាតិខ្មែរ សញ្ជាតិខ្មែរ ស្នាក់នៅផ្ទះលេខ៩១ សេអ៊ឺ២ ផ្លូវ១៣៨ ភូមិ២ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ មុខរបរ លក់ដូរ ។
យោងតាមពាក្យបណ្តឹង ដើមបណ្ដឹងមានឈ្មោះថា ជា ចាន់តុលា បានដាក់ជូន លោកឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ កម្មវត្ថុ: សុំប្ដឹងឈ្មោះប៊ុនរស្មី ហៅ ប៊ុន ផាក (Bun Park) ភេទប្រុស អាយុ២៩ឆ្នាំ ជនជាតិខ្មែរ សញ្ញាតិខ្មែរ ស្នាក់នៅផ្ទះលេខ៥៤ ផ្លូវលេខ៥៨៨ ភូមិ២ សង្កាត់បឹងកក់២ ខណ្ឌទួលគោក រាជធានីភ្នំពេញ បានធ្វើសកម្មភាពតាំងខ្លួនជាមេធាវីរារាំង និងញុះញង់ឱ្យឈ្មោះ ស៊ាន ធារី និងបុគ្គលិករបស់ហាងឈ្មោះ V SHOP CAMBODIA យកសំលៀកបំពាក់ក្នុងហាង ទូដែក វេរប្រាក់ ចេញពីគណនីធនាគារ និងផ្ទេរកម្មសិទ្ធិផ្ទះរបស់ខ្ញុំបាទ និងឈ្មោះ ស៊ាន ធារី ប្រព្រឹត្តនៅរាជធានីភ្នំពេញ អំឡុងខែវិច្ឆិកា ឆ្នាំ២០២១ ។
តបតាមកម្មវត្ថុ និងយោងខាងលើ ខ្ញុំបាទមានកិត្តិយស សូមគោរពជម្រាបជូនលោក មេត្តាជ្រាបថា កាលពីអំឡុងខែវិច្ឆិកា ឆ្នាំ២០២១ ឈ្មោះ ប៊ុន រស្មី ហៅ ប៊ុន ផាក (Bun Park) បានលួចមានទំនាក់ទំនងជាមួយឈ្មោះ ស៊ាន ធារី ដែលត្រូវជាប្រពន្ធរបស់ខ្ញុំបាទ (អនីតិសង្វាស) ដោយបង្គាប់ឱ្យឈ្មោះ ស៊ាន ធារី យកទូដែកចេញពីផ្ទះរបស់ខ្ញុំបាទ ផ្ទេរប្រាក់ចេញពីគណនីធនាគាររបស់ឈ្មោះ ស៊ាន ធារី ដែលប្រាក់នេះ គឺជាប្រាក់ដែលបានមកពីការរកស៊ីជាមួយគ្នា និងឱ្យឈ្មោះ ស៊ាន ធារីផ្ទេរកម្មសិទ្ធិផ្ទះដែលខ្ញុំបាទ និងឈ្មោះ ស៊ាន ធារី បានទិញរួមគ្នា និងបានផ្ញើរសារបង្គាប់ឲ្យឈ្មោះ ស៊ាន ធារី ដកឈ្មោះខ្ញុំបាទចេញពីគ្រុបការងារ និងបណ្ដេញខ្ញុំបាទចេញលែងឲ្យធ្វើការងារបន្តទៀត ហើយថែមទាំងប្រាប់ឲ្យ ស៊ាន ធារី ផ្លាស់ប្តូរសោរទ្វារផ្ទះលែ្វង មិនឲ្យខ្ញុំបាទចូលស្នាក់នៅបានដោយ ពុំបានផ្ដល់ដំណឹងឲ្យខ្ញុំបាទបានដឹងឡើយ ។
នៅថ្ងៃទី២៨ ខែវិច្ឆិកា ឆ្នាំ២០២១ នៅពេលដែលខ្ញុំបាទទៅហាងលក់សំលៀកបំពាក់ឈ្មោះ V SHOP CAMBODIA ដែលមាន ទីតាំងស្ថិតនៅផ្ទះលេខC13 C15 ភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ ដើម្បីប្រាប់បុគ្គលិកហាងកុំឱ្យយកសំលៀកបំពាក់ទាំងអស់នោះចេញពីហាង ដោយមានសមត្ថកិច្ចជួយសម្របសម្រួល និងណែនាំដល់បុគ្គលិកទាំងអស់នោះ ស្រាប់តែឈ្មោះ ស៊ាន ធារ៉ា ជាបុគ្គលិកហាងបានហៅ វីដេអូខលទៅឈ្មោះ ស៊ាន ធាវី ដើម្បីបញ្ជាក់ និងទាមទារយកអីវ៉ាន់ចេញ ពេលដែលកំពុងនិយាយ ស្រាប់តែ ឈ្មោះ ប៊ុន រស្មី ហៅ ប៊ុន ផាក (Bun Park) បានចូលមកនិយាយសាកសួរទៅសមត្ថកិច្ចដែលកំពុងណែនាំ និងបង្ហាញឯកសារមួយចំនួនមកកាន់សមត្ថកិច្ច ពេលនោះផងដែរសមត្ថកិច្ចបានសួរនាំទៅឈ្មោះ ប៊ុន រស្មី ហៅ ប៊ុន ផាក(Bun Park) ថា មានតួនាទីជាអ្វីនៅក្នុងរឿងនេះបានជាអ្នកហ៊ានអះអាង និងសួរនាំសមត្ថកិច្ចដូច្នេះ ពេលនោះ ដោយមានការបញ្ជាក់ជាច្រើនដងពីសមត្ថកិច្ចឈ្មោះ ប៊ុន រស្មី ហៅប៊ុន ផាក (Bun Park) បានឆ្លើយអះអាងថា ខ្លួន គឺជាមេធាវីតំណាងឱ្យឈ្មោះ ស៊ាន ធារី បន្ទាប់មកសមត្ថកិច្ចក៏ស្នើសុំឱ្យឈ្មោះ ប៊ុន រស្មី ហៅ ប៊ុន ផាក (Bun Park) និងឈ្មោះ ស៊ាន ធារី មកហាង ដើម្បីធ្វើការសម្របសូម្រួលតែឈ្មោះ ស៊ាន ធារី និងឈ្មោះ ប៊ុន រស្មី ហៅ ប៊ុនផាក (Bun Park) មិនមកជួបដោះស្រាយជាមួយខ្ញុំបាទឡើយ ។
ដើមបណ្តឹងសំណូមពរ សមត្ថកិច្ចមានវិធានការទៅលើឈ្មោះ ប៊ុន រស្មី ហៅ ប៊ុន ផាក (Bun Park) តាមនីតិវិធីច្បាប់ ដើម្បីកុំឲ្យឈ្មោះ ប៊ុន រស្មី ហៅ ប៊ុន ផាក (Bun Park) នេះបង្កការខូចខាត ដែលនាំឲ្យប៉ះពាល់ដល់ផលប្រយោជន៍ និងកិត្តិយសរបស់ខ្ញុំបាទបន្តទៅទៀត ។ អាស្រ័យដូចបានគោរពជម្រាបជូនខាងលើនេះសូម លោកមេត្តាទទួលយកពាក្យបណ្តឹងរបស់ ខ្ញុំបាទដោយក្តីអនុគ្រោះ ៕
ចែករំលែកព័តមាននេះ