រាជធានីភ្នំពេញ ៖ មិនថា លក់បន្លែ លក់ត្រី លក់សម្លៀកបំពាក់ គ្រឿងប្រើប្រាស់នានានោះទេ មានម៉ូតូមួយគ្រឿង សម្រាប់ទាញរឺម៉ក់ ដែលអាចផ្ទុកទំនិញទាំងនោះ គឺអាចរកលុយចិញ្ចឹមជីវិតហើយ ខុសពីមុនការលក់ដូរលុះត្រាមានតូប មានកន្លែងដែលត្រូវចំណាយលុយច្រើនទើបរកស៊ីបាន ។ លោក អៀង វិទ្យា អាយុ ៤៩ ឆ្នាំ និងអ្នកស្រី ខុន ធី អាយុ ៣៣ ឆ្នាំ ពីមុនជាកម្មករសំណង់ទាំងពីរនាក់ ប៉ុន្តែដោយសារពួកគាត់គិតថា ការរកស៊ីខ្លួនឯងប្រសើរជាងទើបសម្រេចចិត្ត ដើរលក់ដូរតាមរឺម៉កចល័នេះ ។
អ្នកស្រុកកំពង់ត្របែក ខេត្តព្រៃវែង រូបនោះបាននិយាយថា សម្ភារៈដែលគាត់ដឹកលក់ចល័តតាមរ៉ឺម៉កម៉ូតូរាល់ថ្ងៃនេះមានដូចជា ខោអាវ ខ្សែក្រវ៉ាត់ កាបូបបុស និងស្ត្រី ស្បែកជើង មួក របស់ក្មេងលេង ថ្នាំ និងច្រាស់ដុសធ្មេញ សាប៊ូ ព្រមទាំងរបស់មួយចំនួនទៀត ។ ពួកគាត់បានរកស៊ីចល័តនេះរយៈពេលជាង ២ ឆ្នាំហើយ ចំណែកទីតាំងដែលត្រូវដើរលក់គឺនៅជាយរាជធានីភ្នំពេញ ខេត្តកណ្ដាល ខេត្តតាកែវ និងខេត្តកំពង់ស្ពឺ ។
ការលក់ដូរចល័តតាមរឺម៉កនេះត្រូវគេមើលឃើញថា ជាសេវាកម្មលក់ដូរល្អមួយ ដែលដឹកទំនិញដល់ដៃអតិថជន បាននៅគ្រប់កន្លែង ពិសេសអ្នកដើលក់ចល័តបែបនេះ តែងតែយករ៉ម៉ករបស់ខ្លួនជាកន្លែងស្នាក់អាស្រ័យជំនួសផ្ទះបានទៀតផង ។ លោក អៀង វិទ្យា ដែលជាស្វាមី ឲ្យដឹងបន្ថែមទៀតថា ពួកគាត់ពុំបានជួលផ្ទះស្នាក់នៅភ្នំពេញនោះទេ គឺដើរលក់ចល័តគ្រប់កន្លែង ពេលថ្ងៃត្រង់បានចូលសម្រាកហូបបាយយកកម្លាំងនៅក្នុងបរិវេណវត្តនានា ។ រហូតដល់វេលារសៀលរៀងត្រជាក់បន្តិច ទើបបន្តដំណើរទៅលក់ទៀត ហើយយប់ត្រង់ណាសម្រាកត្រង់នោះតែម្ដងមិនកំណត់ទីកន្លែងឡើយ ។
បុរសកូនពីរខាងលើនិយាយថា ជាទូទៅអីវ៉ាន់ ១ រ៉ឺម៉កម៉ូតូលក់ត្រឹមតែរយៈពេល ១ អាទិត្យ ឬ ១០ ថ្ងៃប៉ុណ្ណោះ ពេលលក់អស់ទើបឡើងមកភ្នំពេញទិញអីវ៉ាន់ថ្មី យកទៅដឹកដើរលក់ទៀតហើយ ។ ក្នុង ១ ថ្ងៃអាចរកប្រាក់បានចាប់ចាប់ពី ៤០ ម៉ឺនទៅ ៥០ ម៉ឺនរៀល ហើយទទួលបានប្រាក់ចំណេញច្រើនគួរសមដែរ ។
ដោយសារកូវីដ ១៩ ការលក់ដូររៀងយ៉ាប់បន្តិច ។ លោក អៀង វិទ្យា បានរៀបរាប់ប្រាប់ទៀតថា ប៉ុន្តែឥឡូវនេះមិនដូចមុនឡើយ លោក និងប្រពន្ធបើករ៉ឺម៉កដឹកសម្ភារៈដើរលក់ត្រាច់ចរគ្រប់កន្លែង ហើយរយៈពេល ១៥ ទៅ២០ថ្ងៃទើបអស់១រ៉ឺម៉កនិងឡើងមកភ្នំពេញយកថ្មីទៅលក់បន្តទៀតទៀត ។ចំណែកប្រាក់ចំណូលហាក់ធ្លាក់ចុះខ្លាំង ដោយក្នុង១ថ្ងៃលក់បានត្រឹមតែជាង១០ម៉ឺនទៅជាង២០ម៉ឺនរៀល ដោយអាចទទួលបានប្រាក់ចំណេញបានចន្លោះពី៥ទៅ៦ម៉ឺនរៀលប៉ុណ្ណោះ ។ប៉ុន្តែទោះជាបែបនេះក្ដីលោកគិតថាមិនចាញ់ការងារសំណង់ឡើយ ថែមធូរកម្លាំងជាងឆ្ងាយណាស់ និងមានពេលវេលាសម្រាប់ឈប់សម្រាកផងដែរ ៕
ចែករំលែកព័តមាននេះ