រាជធានីភ្នំពេញ ៖ យុវជនឈា.មរាវ២នាក់ផឹកស៊ីស្រវឹងក៏ទាញកាំបិត និងពូថៅដេញកា.ប់ ហើយក៏ត្រូវអ្នកលក់ស្រាប្តឹងសមត្ថកិច្ចឱ្យចុះមកអន្តរាគមន៍ លុះពេលទៅដល់ក៏ត្រូវជនបង្កវាយទាំងសមត្ថកិច្ចទៀត បណ្ដាលឲ្យរបួសម្នាក់ ក្រោយមកក៏ត្រូវឃាត់ខ្លួនជនបង្កទាំង២នាក់យកទៅសួរនាំ បង្កការភ្ញាក់ផ្អើលកាលពីវេលាម៉ោង៧និង៣៥នាទីយប់ ថ្ងៃទី២ ខែធ្នូ ឆ្នាំ២០២១ ស្ថិតនៅភូមិទិបញ្ញោ សង្កាត់សំរោងក្រោម ខណ្ឌពោធិ៍សែនជ័យ ។
តាមប្រភពព័ត៌មានបញ្ជាក់ពីស្រី្តម្នាក់ជាអ្នកលក់ស្រា បានអោយដឹងថា នៅពេលកើតហេតុយុវជនទាំងពីរនាក់ខាងលើនេះ បាននាំគ្នាមកផឹកស៊ីកន្លែងរបស់គាត់ ដោយមានគ្នាចំនួន៥ នាក់ លុះពេលស្រវឹងស្រាក៏បានទាត់កៅអីរបស់គាត់ បណ្ដាលឲ្យដួលរាយប៉ាយតែម្តង។
ស្ត្រីខាងលើបន្តថា នៅពេលនោះ គាត់បានសួរថា «តើខឹងរឿងអីបង?» បន្ទាប់មកជនបង្កទាំង២នាក់នោះបានឆ្លើយតបមកគាត់វិញថា «បន្តិចទៀតនឹងដឹងហើយ»។ ក្រោយពេលនិយាយហើយ ពួកគេទាំង២នាក់នោះក៏នាំគ្នាដើរចូលទៅក្នុងវត្តបាត់អស់មួយសន្ទុះ ក្រោយមកស្រាប់តែជនបង្កទាំងពីរនាក់នោះបាននាំគ្នាទាញយកកាំបិត និងពូថៅមកដេញកា.ប់ប្ដីរបស់គាត់ផ្អើលស្រែកឆោឡោអោយគេឯងជួយ ។
ប្រភពដដែលបន្តថា ភ្លាមៗនោះ ខាងប្រជាការពារភូមិក៏បាននាំគ្នាជួយអន្តរាគមន៍ឃាត់ដែរ តែឃាត់មិនឈ្នះ ក៏ទាក់ទងទៅកម្លាំងសមត្ថកិច្ចឱ្យចុះមកជួយអន្តរាគមន៍ ។ បន្ទាប់មកកម្លាំងសមត្ថកិច្ចបានចុះទៅចាប់ឃាត់ដែរ បែរជាត្រូវយុវជនទាំងពីរនាក់នោះវាយតដៃទៅលើកម្លាំងសមត្ថកិច្ចវិញ បណ្ដាលឲ្យរងរបួសម្នាក់ ទើបសមត្ថកិច្ចឃាត់ខ្លួនជនបង្កទាំងពីរនាក់នោះ បញ្ជូនទៅសួរនាំនៅប៉ុស្តិ៍សំរោងក្រោមតែម្តង។
ក្រោយពេលកើតហេតុ សមត្ថកិច្ចប៉ុស្តិ៍សំរោងក្រោម បានបញ្ជូនយុវជនបង្កទាំងពីរនោះ ប្រគល់ទៅឱ្យផ្នែកជំនាញព្រហ្មទណ្ឌខណ្ឌពោធិ៍សែនជ័យបន្ត ដើម្បីចាត់ការទៅតាមនីតិវិធី ៕
ចែករំលែកព័តមាននេះ