តារាសម្តែងនាង ប៊ែលឡា ដានីត បានកើតទុក្ខមិនសុខចិត្ត និងស្រែករកយុត្តិធម៌ទាមទារសុំសិទ្ធិយកកូនស្រីរបស់ខ្លួនមកវិញ ពីការចាប់បង្ខាំងពីក្រុមគ្រួសារ ជាថ្នូរនឹង
រាជធានីភ្នំពេញ ៖ តារាសម្តែងនាង ប៊ែលឡា ដានីត បានកើតទុក្ខមិនសុខចិត្ត និងស្រែករកយុត្តិធម៌ទាមទារសុំសិទ្ធិយកកូនស្រីរបស់ខ្លួនមកវិញ ពីការចាប់បង្ខាំងពីក្រុមគ្រួសារ ជាថ្នូរនឹងការឱ្យនាងយល់ព្រមចាកចេញពីស្វាមី។
តារារូបនេះបានសម្តែងការហួសចិត្ត នៅពេលដែលម្តាយ បងប្រុស បងស្រីបង្កើតរបស់ខ្លួនបានធ្វើសកម្មភាពចាប់ពង្រាត់កូនស្រីរបស់នាងពីដើមទ្រូង ដោយបង្ខំឲ្យនាងធ្វើរឿងដែលនាងមិនចង់ធ្វើ។
ជុំវិញបញ្ហាខាងលើនេះ ប៊ែលឡា ដានីត បានអះអាងប្រាប់សារព័ត៌មានកោះសន្តិភាពពីដំណើរដើមទងនៃរឿងនេះថា កាលដើមឡើយ នាងមានស្វាមី និងបានរស់នៅជាមួយគ្នារយៈពេលប្រមាណ៣ឆ្នាំមកហើយ ដោយមានកូនម្នាក់ក្នុងបន្ទុក ហើយមិនបានចុះអេតាស៊ីវិលឡើយ។
នាងបញ្ជាក់ថា លុះក្រោយមក ដោយសារការរស់នៅជាមួយគ្នាមិនចុះសម្រុង នាង និងស្វាមីក៏បានបែកគ្នា ហើយនាងក៏សម្រេចចុះទៅរស់នៅជុំគ្នាជាមួយគ្រួសាររបស់នាងវិញ ដោយមានបងប្រុស បងស្រីរបស់នាងក៏រស់នៅជុំគ្នាផងដែរ។ នាងថា អំឡុងពេលដែលនាងរស់នៅជុំគ្រួសារនោះ នាងតែងតែផ្ញើកូនអោយម្តាយ និងបងប្អូនឲ្យជួយមើល ដោយសារនាងជាប់រវល់ការងារថត ប៉ុន្តែនាងមិនដែលទុកកូនចោលដើរលេងផ្តេសផ្តាសឡើយ ពោលគឺក្រោយចប់ការងារ នាងបានត្រឡប់មកផ្ទះគេងជាមួយកូនវិញជាធម្មតា។
នាងបន្តថា ក្នុងរយៈពេល៣ឆ្នាំដែលនាងរស់នៅជាមួយគ្រួសារ គឺមានតែមួយលើកគត់ដែលនាងទៅចោលកូនប្រមាណជា៤ថ្ងៃ ដោយសារនាងត្រូវទៅថតភាពយន្តនៅឯខេត្តសៀមរាប ប៉ុន្តែនាងតែងតែទាក់ទងសួរនាំកូនរហូត ដែលនេះបញ្ជាក់ថា នាងមិនដែលមានគំនិតភ្លើតភ្លើន ឬចង់ចោលកូនរបស់ខ្លួនឡើយ។
ប៊ែលឡា ដានីត បានលើកឡើងទៀតថា នៅក្នុងពេលដែលរស់នៅជាមួយគ្នានេះដែរ ម្តាយ និងបងស្រីរបស់នាងតែងតែលួងលោមនាងឲ្យទៅយកអ្នកនេះ អ្នកនោះឲ្យគេចិញ្ចឹម ដោយពួកគាត់ធានារកអោយ ខណៈពេលដែលបងស្រីរបស់នាងតែងតែទទូចចង់បានកូនស្រីរបស់នាងយកទៅចិញ្ចឹម ប៉ុន្តែនាងមិនព្រម។ នាងបញ្ជាក់ថា រយៈពេល៣ខែចុងក្រោយនេះ នាង និងគ្រួសារបានកើតមានទំនាស់ជាញឹកញាប់ ដោយសារបងស្រីរបស់នាងបានជេរប្រមាថមកលើរូបនាង បូករួមរឿងការមិនព្រមធ្វើតាមគាត់ និងការមិនអោយកូនស្រីនាងមកឲ្យគាត់ចិញ្ចឹម។
នាងថា ដោយសារឃើញការលំបាក នាងក៏បានលួចចេញដោយស្ងាត់ៗ២នាក់កូននៅយប់កណ្តាលអធ្រាត្រ ពោលគឺនៅពេលពួកគាត់សម្រាន្តលក់អស់ ហើយនាងក៏បានខលហៅស្វាមីរបស់នាងឲ្យមកយក ដោយពេលនោះពួកនាងក៏សម្រេចចិត្តជួលខន់ដូមួយកន្លែងរស់នៅជុំគ្នា។
នាងបន្ថែមថា ចាប់តាំងក្រោយមកទៀត នៅពេលដែលឃើញទិដ្ឋភាពរៀងស្ងាប់ស្ងាត់ ហើយនាងគិតថា ក្រុមគ្រួសារទំនងជាមិនរករឿងនាងទៀតនោះទេ នាងក៏បាននាំកូនចេញចូលទៅលេងគ្រួសាររបស់នាងជាធម្មតា ហើយនាងអនុញ្ញាតឲ្យម្តាយ និងបងស្រីអាចយកកូនរបស់នាងទៅខេត្តផងដែរ។ លុះដល់ថ្ងៃមួយ ពួកគាត់បានហៅទូរស័ព្ទមកនាង ដោយប្រាប់ថា ចង់ជុំគ្រួសារទៅញ៉ាំអីខាងក្រៅម្តង ហើយនាងក៏យល់ព្រម ដោយនាំទាំងកូនទៅជាមួយផងដែរ ប៉ុន្តែអ្វីដែលនឹកស្មានមិនដល់ គឺនៅពេលញ៉ាំអីជុំគ្នាចប់ ពួកគាត់បានចាប់កូនរបស់នាងទុក ដោយមិនអោយចុះពីឡានមករកនាងឡើយ។
នាងបន្ថែមទៀតថា ពេលនោះនាងក៏បានស្រវេស្រវ៉ារត់ទៅដណ្តើមកូនយកចេញមក ប៉ុន្តែខណៈពេលនោះ បងប្រុសរបស់នាងក៏បានមកវាយដុំច្រំធាក់នាងផ្ទប់នៅនឹងឡានទាំងនាងកំពុងឱបកូនជាប់នឹងដៃ។ នាងបញ្ជាក់ថា ក្នុងពេលប្រវាយប្រតប់គ្នានោះ គឺមានតែប៉ារបស់នាងតែម្នាក់គត់ ដែលបានឃាត់កុំអោយមានការវាយតប់ ប៉ុន្តែនាងបានអស់កម្លាំងដោយព្រលែងកូនឲ្យគេដណ្តើមបាន ដោយសារនាងបានលឺពីការជេរប្រមាថយ៉ាងធ្ងន់ធ្ងរពីបងប្រុសមកលើប៉ារបស់នាង។
នាងបញ្ជាក់ទៀតថា តែយ៉ាងណា នាងនៅតែរត់សុំអង្វរសុំអោយបងស្រីរបស់ខ្លួនកុំឲ្យយកកូនរបស់នាងទៅណា ព្រោះនាងមិនអាចរស់នៅដោយគ្មានកូនបានឡើយ ខណៈពេលដែលនាងក៏បានព្រមានថា នឹងរត់ចូលឡាន ប្រសិនបើមិនឲ្យកូននាងមកវិញទេនោះ។ ខណៈពេលនោះ បងស្រីរបស់នាងក៏បានស្រែកប្រាប់អោយបងប្រុសចាប់នាងចូលក្នុងឡាន ព្រោះលឺនាងគំរា.មធ្វើរឿងខាងលើនេះ។
ប៊ែលឡា ដានីត បានបញ្ជាក់បន្ថែមទៀតថា ក្រោយកើតហេតុ នាងក៏បានរត់ទៅប្តឹងអោយអាជ្ញាធរភូមិ-ឃុំជួយដោះស្រាយ ប៉ុន្តែអជ្ញាធរបានដោះស្រាយអោយនាងចាញ់ ដោយសារបងស្រីរបស់នាងមានអ្នកធំមួយរូបជួយចេញមុខកាងចំពោះរឿងនេះ។ លុះក្រោយមក នាងក៏បានទៅដាក់ពាក្យបណ្តឹងនៅស្នងការក្រុង ដែលពេលនោះស្នងការក្រុងក៏បានសម្រេចឲ្យនាងទទួលបានកូនមកវិញ ប៉ុន្តែពេលនោះក្រុមគ្រួសារនាងក៏បាននាំកូនស្រីរបស់នាងចូលទៅឡានមួយ ដើម្បីគេចចេញទៅបាត់ទៀត។
ទោះជាយ៉ាងណា បើតាម ប៊ែលឡា ដានីត ថា រឿងក្តីរបស់នាងបើដោះស្រាយតាមច្បាប់នោះហាក់មិនមានប្រសិទ្ធភាពឡើយ ហេតុនេះដំណោះស្រាយចុងក្រោយរបស់នាងមានតែស្នើសុំ អន្តរាគមណ៍ពីសំណាក់ប្រមុខដឹកនាំ និងសមាគមសិល្បករខ្មែរ មេត្តាជួយស្វែងយុត្តិធម៌សម្រាប់រូបនាងផង។ នាងបញ្ជាក់ថា អ្វីដែលនាងចង់បាននៅពេលនេះ គឺបានកូនមករស់នៅជុំគ្នាជាមួយនាងវិញ ដោយសារនាងមិនចង់ប្តឹងចាប់ទោសទៅដល់គ្រួសារណាម្នាក់នោះឡើយ។
យ៉ាងណាម៉ិញ នេះគ្រាន់តែជាការលើកឡើងរបស់តារាសម្តែងនាង ប៊ែលឡា ដានីត តែប៉ុណ្ណោះ ដូច្នេះយើងមានតែរង់ចាំមើលការបញ្ជាក់ពីភាគីម្តាយ បងប្រុស បងស្រីរបស់នាងបន្តទៀតនៃរឿងហេតុដែលតារាសម្តែងបានរៀបរាប់ខាងលើនេះ៕
ចែករំលែកព័តមាននេះ