រាជធានីភ្នំពេញ ៖ ជនស៊ីវិលមួយក្រុម ត្រូវបាននគរបាលរដ្ឋបាលទឹកល្អក់៣ ឃាត់ខ្លួនយកទៅធ្វើការសាកសួរនាំ បន្ទាប់ពីធ្វើសកម្មភាពដេញតាមឃាត់ខ្លួនជនសង្ស័យ២នាក់ប្រសាចពេញផ្លូវ បង្កឱ្យមានការភ្ញាក់ផ្អើលកាលពីវេលាម៉ោង៩និង១០នាទីយប់ ថ្ងៃទី១ ខែធ្នូ ឆ្នាំ២០២១ ត្រង់ចំណុចក្បែរស្ថានីយប្រេងឥន្ធនៈតូតាល់ តាមបណ្ដោយផ្លូវ២៦១កែងនឹងផ្លូវ១៨២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីនគរបាលរដ្ឋបាលទឹកល្អក់៣ បានអោយដឹងថា នៅមុនពេលកើតហេតុ ខណៈពេលដែលកម្លាំងកំពុងធ្វើការជិះល្បាតក្នុងភូមិសាស្ត្រដើម្បីទប់ស្កាត់បទល្មើសដែលអាចកើតឡើងដោយប្រការណាមួយនោះ។ លុះពេលជិះដល់ចំណុចកើតហេតុ ក៏ស្រាប់តែប្រទះឃើញជនស៊ីវិលមួយក្រុមមានគ្នាជាង១០នាក់ ដោយមិនមានពាក់កាត់សម្គាល់ ដោយមិនដឹងថាជាកម្លាំងខាងណានោះទេ បានកំពុងធ្វើការឃាត់ចាប់ និងប្រើប្រាស់អំពើហិ.ង្សាទៅលើបុរសជាជនសង្ស័យចំនួន២នាក់ ដែលបានជិះម៉ូតូមួយគ្រឿងម៉ាកហុងដាស្គុបភី ពណ៌ស ពាក់ស្លាកលេខ តាកែវ 1K-4338 យ៉ាងអនាធិបតេយ្យប្រសាចពេញផ្លូវតែម្តង ដោយមិនដឹងថា ឃាត់រឿងអ្វីនោះទេ។
ប្រភពដដែលបន្តថា ខណៈពេលដែលជនស៊ីវិលទាំងនោះបានឃើញសមត្ថកិច្ចមូលដ្ឋានភ្លាម ខ្លះក៏បានជិះគេចខ្លួន ឯខ្លះទៀតក៏ត្រូវបានសមត្ថកិច្ចមូលដ្ឋានដែលកំពុងធ្វើជិះល្បាត បានធ្វើការឃាត់ខ្លួន រួមជាមួយនឹងជនសង្ស័យទាំង២នាក់នោះយកទៅធ្វើការសាកសួរនៅប៉ុស្តិ៍នគរបាលរដ្ឋបាលទឹកល្អក់ទី៣ ភ្លាមៗតែម្ដង។
បន្ទាប់ពីធ្វើការសាកសួរ ជនស៊ីវិលទាំងនោះក៏បានអះអាងថា ជាកម្លាំងរបស់មន្ទីរប្រយុទ្ធប្រឆាំងគ្រឿង.ញៀននៃអគ្គស្នងការនគរបាលជាតិ ប៉ុន្តែមិនបានបញ្ជាក់ថា ជាកម្លាំងកប៉ុន្មានឲ្យពិតប្រាកដនោះទេ ដោយបញ្ជាក់ថាជនសង្ស័យទាំង២នាក់នោះដែលត្រូវបានកម្លាំងរបស់ខ្លួនធ្វើការឃាត់ខ្លួន គឺពាក់ព័ន្ធនឹងករណីគ្រឿង.ញៀន។
ក្រោយពេលកើតហេតុ បន្ទាប់ពីធ្វើការត្រួតពិនិត្យទៅលើកាត់សម្គាល់ខ្លួនរបស់ជនស៊ីវិលទាំងនោះ សមត្ថកិច្ចមូលដ្ឋានក៏បានធ្វើការដោះលែងប្រគល់ជនសង្ស័យទាំង២នាក់នោះឲ្យទៅកម្លាំងស៊ីវិលទាំងនោះ ដើម្បីនាំយកទៅអគ្គស្នងការនគរបាលជាតិ រង់ចាំចាត់ការទៅតាមនីតិវិធីច្បាប់ជាបន្តទៀតផងដែរ៕
ចែករំលែកព័តមាននេះ