រាជធានីភ្នំពេញ ៖ នារីម្នាក់ជាបុគ្គលិកឥណទានតូចចិត្តនឹងគូស្នេហ៍របស់នាង ដែលស្រឡាញ់គ្នាអស់រយៈពេលជាងមួយឆ្នាំរស់នៅជាមួយគ្នាដូចប្តីប្រពន្ធទៅហើយ បែរជាបែកចិត្តលួចទៅមានអ្នកថ្មី ថែមទាំងបោះពាក្យសម្ដីមើលងាយនាងទៀត ធ្វើអោយនាងហួសចិត្ត គិតអ្វីមិនចេញ ក៏បានទៅលើស្ពានជ្រោយចង្វាប៉ុនប៉ងលោ.តទឹកដើម្បីបញ្ចប់បញ្ហាទាំងអស់ តែត្រូវប្រជាពលរដ្ឋជួយឃាត់ទាន់ បង្កឱ្យមានការភ្ញាក់ផ្អើលកាលពីវេលាម៉ោង៩និង១៥នាទីយប់ ថ្ងៃ០១ ខែធ្នូ ឆ្នាំ២០២១ នៅលើស្ពានជ្រោយចង្វាចាស់ ស្ថិតក្នុងសង្កាត់ស្រះចក ខណ្ឌដូនពេញ ។
នារីតូចចិត្តនឹងសង្សារមានអ្នកថ្មីខាងលើនេះ មានឈ្មោះ លី អាយុ២៥ឆ្នាំ មុខរបរបុគ្គលិកឥណទាន ស្នាក់នៅម្តុំផ្សារស្ទឹងមានជ័យថ្មី សង្កាត់ស្ទឹងមានជ័យ១ ខណ្ឌមានជ័យ បានប្រាប់ឲ្យដឹងថា គាត់បានស្រលាញ់គ្នាជាមួយបុរសម្នាក់មានឈ្មោះ កុល ដារ៉ូ អាយុ២៦ឆ្នាំ មុខរបរបុគ្គលិកធនាគារ បច្ចុប្បន្នរស់នៅ និងធ្វើការនៅខេត្តកំពង់ស្ពឺ ។
ប្រភពដដែលបានបន្តទៀតថា គាត់និងគូស្នេហ៍គាត់បានស្រលាញ់គ្នាអស់រយៈពេលជាងមួយឆ្នាំទៅហើយ និងបានរស់នៅជាមួយគ្នាដូចជាប្តីប្រពន្ធអញ្ចឹង ដោយមានចាស់ទុំទាំងសង្ខាងបានដឹងលឺទៀតផង ។
នារីខាងលើបន្តថា ស្រាប់តែមួយរយៈចុងក្រោយនេះ សង្សាររបស់គាត់បានលួចមានទំនាក់ទំនងជាមួយអ្នកថ្មី ហើយសុំនាងបែកគ្នា ដោយលើកហេតុផលថា គ្រួសារគាត់មិនពេញចិត្តនាង តែការពិត គឺបុរសនោះបានលួចមានទំនាក់ទំនងជាមួយអ្នកថ្មីជាយូរណាស់មកហើយ លុះពេលគាត់តាមទាន់ សង្សារគាត់ក៏បានសុំនាងបែកគ្នា និងបានផ្ញើសារមកនាង ដោយសរសើរអ្នកថ្មីថា ល្អជាងនាង សរសើរថា គេអាចផ្តល់អ្វីគ្រប់យ៉ាងអោយខ្លួនបាន ហើយពួកគេ នឹងត្រៀមចូលរោងការជាមួយគ្នា ក្នុងពេលឆាប់ៗនេះ មិនដូចនាងបង្កតែរឿង ។
នារីខាងលើបន្តទៀតថា ពាក្យប៉ុន្មានម៉ាត់នេះ បានធ្វើឲ្យនាងឈឺចាប់ខ្លាំងណាស់ មិនដែលនឹកស្មានថា មនុស្សប្រុសដែលគាត់ស្រលាញ់ស្មើជីវិត បែរជាហ៊ាននិយាយពាក្យបែបនេះដាក់នាងទៅវិញ ហើយនាងក៏បានដេកយំតែម្នាក់ឯងស្ទើរតែរាល់ថ្ងៃ សុញគំនិតគិតអ្វីមិនចេញ ក៏សម្រេចចិត្តជិះម៉ូតូពីម្តុំផ្សារស្ទឹងមានជ័យថ្មី មកលើស្ពានជ្រោយចង្វារ រួចឈរយំតែម្នាក់ឯង និងមានគំនិតចង់បញ្ចប់ជីវិតដើម្បីគេចផុតពីបញ្ហាទាំងនេះ តែត្រូវប្រជាពលរដ្ឋដែលធ្វើដំណើរឆ្លងកាត់ទីនោះឃើញ ក៏ជួយឃាត់ទាន់ពេលវេលាតែម្តង ។
ក្រោយពេលកើតហេតុ បន្ទាប់ពីមានការភ្ញាក់ផ្អើល នារីខាងលើត្រូវបានប្រជាពលរដ្ឋជួយ និយាយពាក្យលួងលោម និងលើកទឹកចិត្តអោយនាងគិតសារជាថ្មីម្តងទៀត និងបានជូននារីខាងលើ ត្រឡប់ទៅផ្ទះវិញដោយសុវត្ថិភាពផងដែរ ៕
ចែករំលែកព័តមាននេះ