ខេត្តព្រះសីហនុ ៖ មហាសន្និបាតសមុទ្រអាស៊ីបូព៌ាលើកទី៧ ក្រោមប្រធានបទ «បង្កើតទសវត្សរ៍ថ្មីនៃសុខុមាលភាពសមុទ្រ មនុស្ស និងសេដ្ឋកិច្ច» នឹងចាប់ផ្តើមបើកជាផ្លូវការ នៅថ្ងៃទី១ ខែធ្នូនេះ នៅខេត្តព្រះសីហនុ ។
ឯកឧត្តមគួច ចំរើន អភិបាលខេត្តព្រះសីហនុក្នុងមហាសន្និបាត នាព្រឹកថ្ងៃទី១ ធ្នូ ឆ្នាំ២០២១ នៅសណ្ឋាគារឯករាជ្យខេត្តព្រះសីហនុថា៖យើងខ្ញុំពិតជាមានមោទនភាពចំពោះសមិទ្ធផលដែលសម្រេចបាននាពេលកន្លងមក និងសូមថ្លែងនូវអំណរគុណយ៉ាងជ្រាលជ្រៅដល់អង្គការ PEMSEA និងដៃគូអភិវឌ្ឍទាំងអស់ដែលបាននឹងកំពុងបន្តកិច្ចគាំ ទ្រក្នុងការអនុវត្តកម្មវិធីគ្រប់គ្រងចម្រុះតំបន់ឆ្នេរ ICM) ក្នុងខេត្តព្រះសីហនុ ។
ជាពិសេសគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងសូមថ្លែងនូវការកោតសរសើរ និងវាយតម្លៃខ្ពស់ចំ ពោះបណ្តាមន្ទីរអង្គភាពជំនាញ អង្គការដៃគូ សង្គម ស៊ីវិល សហគមន៍មូលដ្ឋាន និងអាជ្ញាធរពាក់ព័ន្ធគ្រប់លំដាប់ថ្នាក់ ព្រមទាំងប្រជាជននៅខេត្តព្រះសីហនុក្នុងកិច្ចខិតខំប្រឹងប្រែងពង្រឹងយន្តការអភិបាលកិច្ចល្អ និងការអនុវត្តសកម្មភាពនៅមូលដ្ឋាន ដើម្បីដោះស្រាយការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយ សំដៅការការពារ និងការស្តារឡើងវិញនូវទីជម្រកធនធានធម្មជាតិ ធានានូវសន្តិសុខស្បៀង ការគ្រប់គ្រងប្រភពទឹក ផ្គត់ផ្គង់ទឹកស្អាត និងការគ្រប់គ្រងសំណល់រឹង-រាវ នៅខេត្តព្រះសីហនុ ។
លោកបន្តថា រដ្ឋបាលខេត្តព្រះសីហនុបានសហការរៀបចំផែនការរៀ បចំដែនដីខេត្តព្រះសីហនុចក្ខុវិស័យឆ្នាំ២០៣០ និងចក្ខុវិស័យឆ្នាំ ២០៣៨ សម្រាប់រដ្ឋបាលក្រុងព្រះសីហនុ និងបានរៀបចំយុទ្ធសាស្ត្រអភិវឌ្ឍ និងក្របខណ្ឌទីក្រុងឆ្លាត សម្រាប់ក្រុងព្រះសីហនុប្រកបដោយនិរន្តរភាព និងបរិយាប័ន្នស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣១ ។
ឯកឧត្តអភិបាលខេត្តបានលើកឡើងថា រដ្ឋាភិបាលខេត្តកំពុងជំរុញការងាររៀបចំផែនការ ដើម្បីអភិវឌ្ឍ និងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូ ពហុបំណង ដោយបានកំពុងធ្វើការសិក្សាប្រមូលព័ត៌មានបឋម រៀបចំគោលបំណងគោលដៅ និងផែនការសកម្មភាព ដើម្បីទ្រទ្រង់ដល់វិស័យសេដ្ឋកិច្ច-សង្គម និងការប្រើប្រាស់ធនធានតំបន់ឆ្នេរប្រកបដោយចីរភាព ។
ឯកឧត្តមក៏បានលើកឡើងថា ជាមួយមោទនភាពនៃសម្រស់ដ៏ស្រស់ស្អាតនៃឆ្នេរ និងសមុទ្រកម្ពុជា នៅពេលព្រឹកមិញនេះយើងខ្ញុំបានរៀបចំវេទិកាថ្នាក់ក្រោមជាតិនៃបណ្តាញគ្រប់គ្រងបរិស្ថានសមុទ្រអាស៊ី-បូព៌ាប្រចាំឆ្នាំ២០២១ នៃអង្គការ PEMSEA ដែលរដ្ឋបាលថ្នាក់ក្រោមជាតិជាសមាជិកទាំង៥១ខេត្ត-ក្រុង រួមទាំងខេត្តព្រះសីហនុ និងខេត្ត តំបន់ឆ្នេរចំនួន០៣ផ្សេងទៀតរបស់កម្ពុជា និងមានការចូលរួមពីប្រទេសជាសមាជិកចំនួន១១ ក្នុងតំបន់ និងអាស៊ាន ព្រមទាំងអង្គការ អន្តរជាតិចំនួន២១ នៅទូទាំងតំបន់អាស៊ី-បូព៌ា បានជួបជុំ ពិភាក្សា និងផ្លាស់ប្ដូរនូវបទពិសោធន៍នៃការគ្រប់គ្រងតំបន់ឆ្នេរ និងសមុទនៃប្រទេសនីមួយៗ សំដៅសហការរួមគ្នាថែរក្សា ការពារ និង អភិវឌ្ឍតំបន់ឆ្នេរសមុទ្រក្នុងតំបន់ ប្រកបដោយនិរន្តរភាព។
ឯកឧត្តមបញ្ជាក់ថា ៖ ក្នុងនាមជាសមាជិកបណ្តាញ PNLG យើងខ្ញុំទាំងអស់គ្នាបានរួមគ្នាអនុម័តនូវសេចក្តីប្រកាសរួមខេត្តព្រះសីហនុ (Preah Sihanouk Declaration) ដែលបញ្ជាក់សាជាថ្មីនូវការប្តេជ្ញាចិត្តយ៉ាងខ្ពស់របស់ យើងខ្ញុំក្នុងនាមជារដ្ឋបាលថ្នាក់ក្រោមជាតិ ដើម្បីបន្តអភិវឌ្ឍសេដ្ឋកិច្ចខៀវ តាមរយៈកម្មវិធី ICM និងគំនិតផ្តួចផ្ដើមពាក់ព័ន្ធផ្សេងៗទៀត ។
ហេតុដូច្នេះ យើងខ្ញុំទាំងអស់គ្នាបានប្តេជ្ញាថា នឹងខិតខំធ្វើការសហ ការគ្នាជាបណ្ដាញ ដើម្បីអនុវត្តនូវផែនការយុទ្ធសាស្ត្រសកម្មភាព PNLG ឆ្នាំ២០២២-២០៣០ ឱ្យមានប្រសិទ្ធភាពស្របតាមកម្មវិធី ធំៗចំនួន៣ រួមមាន: ១. ពង្រឹងអភិបាលកិច្ច និងភាពជាដៃគូ ២. ការចូលរួមអនុវត្តកម្មវិធីគ្រប់គ្រងពាក់ព័ន្ធនឹងគោលដៅ អភិវឌ្ឍប្រកបដោយចីរ ភាព(SDGs)មានជាអាទិ៍៖គោលដៅទី៦ ស្តីពីការប្រើប្រាស់ និងការគ្រប់គ្រងទឹក -គោល ដៅទី១១ ស្តីពីការការពារសមុទ្រ និងការកាត់បន្ថយ ការបំពុល គោលដៅទី១៣ ស្តីពីការបន្សំ ការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយ ,គោលដៅទី១៤ ស្តីពីការអភិរក្សជីវៈចម្រុះ និងការស្តារ ឡើងវិញនូវប្រព័ន្ធអេកូឡូស៊ី។
លើកកម្ពស់ការគ្រប់គ្រង ការវាយតម្លៃ និងការរាយការណ៍ក្នុង នាមជាសមាជិកបណ្តាញ ដើម្បីអភិវឌ្ឍសក ម្មភាពប្រកបដោយចីរភាព សម្រាប់ទសវត្សថ្មី ជាមួយការប្តេជ្ញាចិត្តជាថ្មី ក្នុងកម្រិតតំបន់ និងអន្តរជាតិ ដូចជាផែនការយុទ្ធសាស្ត អភិវឌ្ឍដោយចីរភាព សម្រាប់សមុទ្រអាស៊ី-បូព៌ា (SDS SEA) ឆ្នាំ២០២៣-២០២៧ និងផែនទីបង្ហាញផ្លូវ PEMSEA ឆ្នាំ២០៣០ ក្របខណ្ឌអភិ វឌ្ឍជីវៈចម្រុះ និងផែនការយុទ្ធ សាស្ត្រគ្រប់គ្រង និង អភិវឌ្ឍតំបន់ឆ្នេរ និងសមុទ្រដទៃទៀត។ ចំណែកមន្ត្រីនាំពាក្យក្រសួងបរិស្ថានបានថ្លែងថា នេះគឺជាលើកទី១ ដែលកម្ពុជាបាន ទទួលធ្វើម្ចាស់ផ្ទះនៃការ រៀបចំមហាសន្និបាតសមុទ្រ អាស៊ី បូព៌ាលើកទី៧ ចាប់តាំងពីការចូលជាសមាជិកនៃអង្គការអន្តរជាតិភាពជាដៃគូនៃ ការគ្រប់ គ្រងបរិស្ថានសមុទ្រអាស៊ីបូព៌ា (PEMSEA) នៅឆ្នាំ ១៩៩៤។
មហា សន្និបាតដែលមាន រយៈពេល ២ ថ្ងៃនេះ នឹងប្រព្រឹត្តទៅដោយមានការចូលរួមផ្ទាល់ និងការចូលរួមតាម រយៈប្រព័ន្ធបញ្ជូនសំឡេងនិងរូបភាពពីបណ្តាប្រទេសជាសមាជិកនៃអង្គការ PEMSEA។
មន្ត្រីបានថ្លែងថា មុននឹងបើកមហាសន្និ បាតសមុទ្រអាស៊ីបូព៌ាឆ្នាំ២០២១ ជាផ្លូវការនៅ រសៀលម៉ោង ១ មានការបើកកិច្ចប្រជុំនៃរដ្ឋបាលថ្នាក់ក្រោមការជាតិនៃបណ្តាខេត្ត របស់ប្រទេ សសមាជិក PEMSEA ដែលក្នុងនោះ រដ្ឋបាលខេត្តជាប់មាត់សមុទ្រទាំង ៤ របស់កម្ពុជា រួមមានខេត្តព្រះសីហនុ ខេត្តកំពត កោះកុង និងកែប ។
ក្រសួងបរិស្ថានបានថ្លែងថា គោលបំណងសំខាន់ៗនៃការរៀបចំម ហាសន្និបាតសមុទ្ររួមមាន៖ ទី១) ចែករំលែកមេរៀនជាបទពិសោធន៍ តាមដានវឌ្ឍនភាពការងារកន្លងមក និងពង្រីកបន្ថែមនូវការអនុវត្តយុទ្ធសាស្ត្រ ដែលបានប្រតិបត្តិនៅថ្នាក់តំបន់ ជាតិ និងរដ្ឋបាលថ្នាក់ក្រោមជាតិ។
ទី២) បង្កើតនិងរៀបចំឡើងវិញនូវយន្តការគ្រប់គ្រងដែលមានស្រាប់ និងជំរុញបង្កើតឱកា សថ្មីៗបន្ថែមទៀត សម្រាប់ភាពជាដៃគូក្នុងតំបន់ តាមរយៈបច្ចេកវិទ្យា នវានុវត្តន៍ ការវិនិយោគ និងហិរញ្ញប្បទាន ដើម្បីបន្តនិរន្តភាពនៃបរិស្ថានតំបន់ឆ្នេរ និងសមុទ្រ និង ទី៣) កំណត់នូវផែនទីបង្ហាញផ្លូវដ៏ច្បាស់លាស់មួយ សម្រាប់ជាដំណោះស្រាយចំ ពោះបញ្ហាសមុទ្រនាទស្សវត្សន៍ខាងមុខ ដោយអនុលោមទៅតាមផែនការមួយទសវត្សរ៍ របស់អង្គការសហប្រជាជាតិ នៃវីទ្យាសាស្ត្រមហាសមុទ្រ របៀបវារៈរបស់អង្គការស ហប្រជាតិឆ្នាំ២០៣០ អនុសញ្ញាក្របខ័ណ្ឌសហប្រជាតិស្តីពីការប្រែប្រួលអាកាសធាតុ និងក្របខ័ណ្ឌជីវៈចម្រុះសកលក្រោយឆ្នាំ២០២០ ព្រមទាំងបណ្តាក្របខ័ណ្ឌពាក់ព័ន្ធនានា៕
ចែករំលែកព័តមាននេះ