ខេត្តកំពង់ស្ពឺ ៖ ប្រជាពលរដ្ឋរាប់រយនាក់នាំគ្នាដើរដង្ហែនិងឈរត្រៀបត្រានៅមុខស្នងការដ្ឋាននគរបាលខេត្តកំពង់ស្ពឺ ដោយសារតែមានការកោះហៅតំណាងសហគមន៍ចំនួន០៦នាក់ បំភ្លឺរឿងបំផ្លិចបំផ្លាញទ្រព្យសម្បត្តិ និងគំរាមកំហែងជេរប្រមាថជាសាធារណៈ ក៏ព្រោះតែបងប្អូនប្រជាពលរដ្ឋទាំងអស់នោះ ការពារព្រៃសហគមន៍ (ឧត្តមស្រែពស់) ឱ្យនៅគង់វង្ស ដើម្បីទុកឱ្យក្មេងៗជំនាន់ក្រោយបានស្គាល់។
ជាក់ស្តែង កាលពីព្រឹកថ្ងៃទី៣០ ខែវិច្ឆិកា ឆ្នាំ២០២១នេះ មានពលរដ្ឋសហគមន៍ប្រម៉ាណជិត៦០០នាក់ នាំគ្នាជិះរថយន្ត និងដង្ហែក្បួនមក ឈរនៅមុខរបងស្នងការ ដ្ឋាននគរបាលខេត្តកំពង់ស្ពឺ ខណៈនគរបាលបានកោះតំណាងសហគមន៍ មកធ្វើការ សាកសួរនាំបំភ្លឺ ករណីបំផ្លិចបំផ្លាញទ្រព្យសម្បត្តិនិង គំរាមកំហែងជេរប្រមាថជាសាធារណៈរឿងដីសហគមន៍នៅស្រុកឱរ៉ាល់ ។
ប្រជាពលរដ្ឋជាច្រើនរយនាក់ ដែលលើកគ្នាមកធ្វើការតវ៉ានេះ ដើម្បីទាមទាររកយុត្តិធម៌ និងការពារដីព្រៃសហគមន៍ ឧត្តមស្រែពស់ រាប់រយហិតា ដែលគេដឹងថាមាន ក្រុមមនុស្សមួយក្រុម អ្នកមានលុយមានអំណាច(យោធា កងរថក្រោះ ដែលសង្ស័យធ្វើឯកសារ បំភ័ន្តថ្នាក់លើ ចង់រំលោភបំពានដីព្រៃ ព្រៃឈើ របស់សហគមន៍ឧត្តមស្រែពស់) និងបានដាក់គ្រឿងចក្រមកធ្វើការ
ឈូសឆាយចង់បានយកទៅធ្វើជាសម្បត្តិផ្ទាល់ខ្លួន ហើយករណីបានកើតជាយូរមកហើយរហូតមកទល់ពេលនេះ។
ប៉ុន្តែត្រូវបានប្រជាសហគមន៍ជាច្រើននាំគ្នាធ្វើការតវ៉ា ឃាត់យកគ្រឿងចក្រ(អាប៊ុល) យកមករក្សាទុកនៅផ្ទះរបស់លោក ប្រធានសហគមន៍ ដើម្បីកសាងសំណុំរឿងបញ្ជូនទៅ ជំនាញចាត់បន្តតាមផ្លូវច្បាប់។ក្រោយមកត្រូវបានភាគីម្ខាងទៀតដាក់ពាក្យបណ្តឹង រហូតមកដល់ពេលនេះ រឿងរ៉ាវឈានមកដល់ ស្នងការដ្ឋាននគរបាលខេត្តកំពង់ស្ពឺធ្វើការកោះហៅ តំណាងសហគមន៍ មកសួរនាំ ក៏ប្រជាពលរដ្ឋលើកគ្នាមកធ្វើការតវ៉ាតែម្តងទៅ។
ជុំវិញបញ្ហានេះលោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺបានឲ្យដឹងថា ករណីនេះមានមេធាវីតំណាងបានដាក់បណ្ដឹង ក្រោយពីគេប្ដឹងទាមទារ ជំនាញបានកោះអញ្ជើញគាត់តែចំនួន៤-៥នាក់ ឲ្យមកធ្វើការបំភ្លឺ តែដល់ពួកគាត់ឡើងមកគ្នាច្រើនដែលមិនអាចដោះស្រាយគ្នាកើត ។
លោកស្នងការបានបន្ត ពេលនេះជំនាញបានឲ្យគាត់ត្រឡប់ទៅវិញ ហើយរើសពេលវេលាបន្តដើម្បីដោះស្រាយគ្នា ។ មានន័យថា ថ្ងៃនេះយើងអត់បានធ្វើការដោះស្រាយកើតទេ ដោយសារតែគាត់លើកគ្នាមកច្រើនពេក ។ ជាពិសេស អ្នកកាន់សំណុំរឿងគាត់អត់នៅដាក់ពាក្យសុំច្បាប់យើងឲ្យគាត់ត្រឡប់ទៅវិញសិន រង់ចាំកោះពួកគាត់ក៏លើកក្រោយបន្តទៀត ៕
ចែករំលែកព័តមាននេះ