រាជធានីភ្នំពេញ ៖ គិតត្រឹមខែតុលា ២០២១ ទុនវិនិយោគពីប្រទេសចិននៅកម្ពុជាមានចំនួនប្រមាណ ២៧ ពាន់លានដុល្លារអាមេរិក ។ នៅក្នុងជំនួបជាមួយឯកអគ្គរដ្ឋទូតចិន ប្រចាំកម្ពុជាកាលពីថ្ងៃទី ២៩ វិច្ឆិកា ២០២១ ដើម្បីផ្សព្វផ្សាយពីច្បាប់វិនិយោគថ្មីរបស់កម្ពុជា លោក សុខ ចិន្ដាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្រៅពីការទុនវិនិយោគនៅកម្ពុជាច្រើនជាងគេហើយនោះ ចិន បានផ្ដល់ជំនួយដល់កម្ពុជាយ៉ាងច្រើនផងដែរជាក់ស្ដែងចាប់តាំងពីឆ្នាំ ១៩៩២ ដល់ឆ្នាំ ២០២០ ចិន បានផ្ដល់ជំនួយដល់កម្ពុជាគិតជាទឹកប្រាក់ ៤.៦៥៥ លានដុល្លារអាមេរិក ។
លោក សុខ ចិន្តាសោភា បានជម្រាបទៅកាន់ឯកអគ្គរដ្ឋទូតចិនប្រចាំកម្ពុជាថា ច្បាប់វិនិយោគថ្មីរបស់កម្ពុជា ត្រូវបានតាក់តែងឡើងស្របតាមការចង្អុលបង្ហាញរបស់គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥ ដើម្បីឆ្លើយតបទៅនឹងការប្រែប្រួលនៃភូមិសាស្ត្រ នយោបាយ និងសេដ្ឋកិច្ច បដិវត្តន៍ឧស្សាហកម្ម ៤.០ បរិវត្តកម្មឌីជីថល និងការរអាក់រអួលនៃខ្សែច្រវ៉ាក់តម្លៃសាកលដែលបណ្ដាលមកពីកូវីដ ១៩ សំដៅច្បាមយកកាលានុវត្តភាពជាអតិបរមានពីនិម្មាបនកម្ម សេដ្ឋកិច្ចក្នុងតំបន់ដែលកំពុងវិវត្តយ៉ាងឆាប់សហ័ស ក៏ដូចជាទាញយកផលប្រយោជន៍ពីកិច្ចព្រមព្រៀងពាណិជ្ជកម្មសេរីពហុភាគី និងទ្វេភាគី ។
មន្រ្តីកម្ពុជាបញ្ជាក់ថា ដើម្បីជំរុញកិច្ចសហប្រតិបត្តិការវិនិយោគ ក្រុមប្រឹក្សាអភិវឌ្ឍន៍កម្ពុជា និងគណៈកម្មាធិការជាតិអភិវឌ្ឍន៍និងកែទម្រង់នៃសាធារណរដ្ឋប្រជាមានិតចិន បានចុះហត្ថលេខាលើអនុស្សរណៈនៃការយោគយល់គ្នាជាបន្តបន្ទាប់ និងចុងក្រោយនេះ បានចុះហត្ថលេខាស្ដីពីការធ្វើឱ្យប្រសើរឡើងនូវកិច្ចសហប្រតិបត្តិការសមត្ថភាពផលិត និងការវិនិយោគ ។ តាមរយៈការផ្សព្វផ្សាយ លោករំពឹងថា វិនិយោគិនចិននឹងបានយល់កាន់តែច្បាស់ និងស៊ីជម្រៅ ពីច្បាប់វិនិយោគនៃព្រះរាណាចក្រកម្ពុជា និងសម្រេចចិត្តបណ្ដាក់ទុនវិនិយោគនៅកម្ពុជាបន្ថែមទៀត និងក្នុងពេលដែលកម្ពុជាបានលើកលែងការធ្វើចត្តាឡីស័ក អ្នកដំណើរបរទេសចូលមកកម្ពុជា សម្រាប់អ្នកដំណើរចាក់វ៉ាក់សាំងដូសមូលដ្ឋានរួចរាល់ ។
លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា បានមានប្រសាសន៍ថា ទំនាក់ទំនងល្អរវាងកម្ពុជា និងចិន ធ្វើឱ្យកម្ពុជាក្លាយជាទិសដៅវិនិយោគដ៏សំខាន់សម្រាប់ចិន ហើយតាមរយៈច្បាប់ស្ដីពីការវិនិយោគថ្មី នឹងធ្វើឱ្យគំនិតផ្ដួចផ្ដើមផ្លូវមួយខ្សែក្រវ៉ាត់មួយ និងការចូលជាធរមាននៃកិច្ចព្រមព្រៀងពាណិជ្ជកម្មកម្ពុជា ចិន កិច្ចសហប្រតិបត្តិការវិនិយោគកម្ពុជា ចិននឹងទទួលបានលទ្ធផលគួរជាទីគាប់ប្រសើរជាក់ជាមិនខាន ។
ក្នុងរយៈពេល ៦ ខែដំបូងឆ្នាំ ២០២១ នេះ កម្ពុជាក៏ទទួលបានទុនវិនិយោគផ្ទាល់ពីបរទេសប្រមាណ ៣៩ ពាន់លានដុល្លារអាមេរិក ហើយចិននៅតែឈរលំដាប់កំពូលជាអ្នកវិនិយោគច្រើនជាងគេ ដោយមានទឹកប្រាក់ប្រមាណ ១៧,៣ ពាន់លានដុល្លារអាមេរិក ឬប្រមាណ ៤៤,២ ភាគរយនៃទឹកប្រាក់វិនិយោគសរុប ៕
ចែករំលែកព័តមាននេះ