ខេត្តកណ្តាល ៖ យោងតាមប្រភពព័ត៌មានបានបង្ហើបប្រាប់ថា សហគមន៍អតីតឡូត៍លេខ១១ សណ្តារ-ក្អមសំណ ស្រុកលើកដែក សង្ស័យឃុបឃិតត្នាជាមួយមន្ត្រីជលផលកាត់ព្រែកលក់ក្នុងតម្លៃរាប់ពាន់ដុល្លារ ទៅឱ្យជនជាតិវៀតណាមដាក់យ៉ប្រមូលផលត្រីក្នុងមួយថ្ងៃៗរាប់តោន ដោយជ្រកក្រោមផ្លាកសហគមន៍ ។…
ខេត្តកណ្តាល ៖ យោងតាមប្រភពព័ត៌មានបានបង្ហើបប្រាប់ថា សហគមន៍អតីតឡូត៍លេខ១១ សណ្តារ-ក្អមសំណ ស្រុកលើកដែក សង្ស័យឃុបឃិតត្នាជាមួយមន្ត្រីជលផលកាត់ព្រែកលក់ក្នុងតម្លៃរាប់ពាន់ដុល្លារ ទៅឱ្យជនជាតិវៀតណាមដាក់យ៉ប្រមូលផលត្រីក្នុងមួយថ្ងៃៗរាប់តោន ដោយជ្រកក្រោមផ្លាកសហគមន៍ ។
ជាក់ស្ដែង កាលពីល្ងាចថ្ងៃទី២៧ ខែវិច្ឆិកា ឆ្នាំ២០២១ អ្នកសារព័ត៌មានយើងបានទៅថតផ្ដិតយករូបភាពយ៉ក្រឡាញឹកដែលជន ជាតិវៀតណាមដាក់កាត់ទទឹងព្រែក២កន្លែងផ្សេងគ្នា ។ នៅចំណុចទី១-ព្រែកបាតឹង ស្ថិតក្នុងឃុំព្រែកជ្រៃ ស្រុកកោះធំ គ្រប់គ្រងដោយជនជាតិវៀតណាមឈ្មោះ ណាម ។ នៅចំណុចទី២-ព្រែកបឹងតូច ស្ថិតក្នុងភូមិក្អមសំណក្រោម ឃុំក្អមសំណ ស្រុកលើកដែក គ្រប់គ្រងដោយជនជាតិវៀតណាមឈ្មោះ ឌឿក កំពុងធ្វើសកម្មភាពល្មើសនេសាទដាក់យ៉ស្បៃមុងក្រឡាញឹកកាត់បិទជិតទទឹងព្រែក ប្រមូលផលត្រីតូចធំគ្រប់ប្រភេទដឹកយកទៅលក់បន្តឱ្យឈ្មួញនៅប្រទេសវៀតណាម ក្នុង១ថ្ងៃៗរាប់តោន ។
មិនតែប៉ុណ្ណោះ គេសង្កេតឃើញវត្តមានមន្ត្រីរដ្ឋបាលជលផលកោះធំនៅប្រចាំការ ថែមទាំងស្រែកគំរាមមកលើអ្នកសារព័ត៌មាន ដែលបានទៅយកព័ត៌មាននៅចំណុចនោះ ដោយហាមមិនឱ្យអ្នកសារព័ត៌មានថតយករូបភាពទៀតផង ។ ប្រភពព័ត៌មានខាង លើបានដាក់ការសង្ស័យថា ការដាក់យ៉ប្រមូលផលត្រីរបស់ជនជាតិវៀតណាមបានដោយរលូនបែបនេះ គឺដោយសារតែជន ជាតិ វៀតណាមចំណាយលុយទិញតពីសហគមន៍អតីតឡូត៍១១(សណ្តារ-ក្អមសំណ) ក្នុង១កន្លែងតម្លៃប្រហែល១០.០០០ដុល្លារទៅ
១៥.០០០ដុល្លារ ទៅ២០.០០០ដុល្លារសហរដ្ឋអាមេរិកក្នុងមួយរដូវ ។
គួរបញ្ជាក់ថា នៅក្នុងស្រុកលើកដែក ចាប់ពីឃុំព្រែកដាច់រហូតដល់ឃុំក្អមសំណ មានការដាក់របាំងយ៉ធំៗកាត់ទទឹងព្រែកម្រមូលផលត្រីចំនួន២៥កន្លែង ដែលអ្នកគ្រប់គ្រងមានទាំងខ្មែរនិងជនជាតិវៀតណាម ដោយជ្រកក្រោមផ្លាកសហគមន៍ក្រោមលេសប្រមូលផលត្រីលក់យកលុយ ធ្វើការអភវឌ្ឍមូលដ្ឋាន ។ ប៉ុន្តែពី១ឆ្នាំទៅ១ឆ្នាំមិនដែលឃើញមានការអភិវឌ្ឍស្តារព្រែក ឬធ្វើផ្លូវនោះឡើយ ចំណែកព្រែកគោករាក់ ផ្លូវខូចខាតពិបាកធ្វើដំណើរយ៉ាងណាក៏មិនខ្វល់ ។ រីឯផ្លូវតាមមាត់ព្រែកខ្លះដែលធ្វើរួច គឺលុយគម្រោងអភិវឌ្ឍន៍ភូមិ-ឃុំ ឬលុយរបស់ក្រុមការងាររាជរដ្ឋាភិបាលចុះជួយមូលដ្ឋានធ្វើទេ ។
ទន្ទឹមនឹងនោះ នៅតាមព្រែកមួយចំនួនគ្រាន់តែពលរដ្ឋទៅធ្វើចម្ការក្បែរព្រែក ហើយដាក់សំណាញ់គ្រាន់បានត្រីខ្លះមកធ្វើម្ហូប ក៏ត្រូវក្រុមសហគមន៍ទាំងនោះរារាំងនិងគំរាមចាប់យកសំណាញ់ក៏មានដែរ ។ពាក់ព័ន្ធនឹងបញ្ហានេះ លោក មាស សាន់ នាយ
សង្កាត់រដ្ឋបាលជលផលលើកដែក ធ្លាប់បានប្រាប់ភ្នាក់ងារយើងយ៉ាងខ្លីថា នៅក្នុងស្រុកលើកដែក មានសហគមន៍ដាក់របាំងយ៉តាមព្រែកយកត្រី តែជាង១០កន្លែងទេ ។ រីឯលោក ប៉េង លី ប្រធានសហគមន៍អតីតឡូត៍១១(សណ្តារ-ក្អមសំណ)បានឱ្យដឹងតាមទូរស័ព្ទកាលពីល្ងាចថ្ងៃទី២៧ ខែវិច្ឆិកា ឆ្នាំ២០២១ថា រឿងនេះរូបលោកមិនដឹងទេ សូមសួរទៅខាងជលផលខេត្តចុះ ។
ដោយឡែក លោក ហេង ធារិទ្ធ នាយខណ្ឌរដ្ឋបាលជលផលកណ្តាល បានប្រាប់ភ្នាក់ងារយើងតាមទូរស័ព្ទថា រឿងមួយចំនួនរូបលោក មិនបានដឹងទេ សូមសួរទៅខាងសង្កាត់បានដឹង ។ បើតាមលោកដឹង ការដាក់របាំងយ៉ប្រមូលផលត្រីនោះ គឺសុទ្ធតែសហ គមន៍ខ្មែរ រីឯជនជាតិវៀតណាមគ្រាន់តែជួលគេយកមកធ្វើជាអ្នកបច្ចេកទេសដាក់ទេ ។ ទោះជាយ៉ាងណា លោកនាយខណ្ ឌជលផល មិនបានបញ្ជាក់ប្រាប់ពីការកាត់ព្រែកលក់ និងការកំណត់ក្រឡាឱ្យដាក់របាំងយ៉ទំហំប៉ុន្មាននោះទេ គ្រាន់តែប្រាប់ថា មិនអនុញ្ញាតឱ្យដាក់ក្រឡាញឹកទេ ហើយក៏បើកឱ្យពលរដ្ឋបង់សំណាញ់នេសាទត្រីជាលក្ខណៈគ្រួសារផងដែរ សម្រាប់ផ្គត់ផ្គង់ជីវភាព ៕
ចែករំលែកព័តមាននេះ