រាជធានីភ្នំពេញ ៖ ក្រសួងធនធានទឹក និងឧតុនិយមបានបានបញ្ជាក់ថា តំបន់មួយចំនួនរបស់ប្រទេសកម្ពុជានឹងចុះត្រជាក់ រហូតដល់១៦អង្សាសេ ។
យោងតាមសេចក្តីជូនដំណឹងស្ដីពីស្ថានភាពធាតុអាកាស ចាប់ពីថ្ងៃទី ១-៧ ខែធ្នូ ឆ្នាំ២០២១បានលើកឡើងថា ព្រះរាជាណាចក្រកម្ពុជា ទទួលឥទ្ធិពលពីទ្រនុងសម្ពាធខ្ពស់ប្រទេសចិន ដែលបន្តរំកិលចុះមកក្រោមជាមួយ និងខ្យល់មូសុងឦសាន បង្កើនល្បឿនក្នុងកម្រិតពីមធ្យមទៅបង្គួរ ។
ក្រសួងបានលើកឡើងថា ស្ថានភាពបែបនេះនឹងធ្វើឲ្យបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា មានពី១៧-១៩ អង្សាសេសីតុណ្ហភាពអតិបរមាមានពី២៦-២៨ អង្សាសេ ។ អាចមានអាកាសធាតុត្រជាក់បង្គួរ និងខ្យល់ខុសធម្មតា (ខ្យល់រដូវ)។
ចំណែកបណ្តាខេត្តដាប់ជួរភ្នំដងរែក និងខ្ពង់រាបឦសានមានសីតុណ្ហភាពអប្បបរមា មានពី១៦-១៨ អង្សាសេសីតុណ្ហភាពអតិបរមា មានពី ២៦-២៨ អង្សាសេ ។ ក្នុងនោះខេត្តមណ្ឌលគិរី , ខេត្តរតនគិរី , ខេត្តព្រះវិហារ និងខេត្តឧត្តរមានជ័យ សីតុណ្ហភាពអប្បបរមា អាចចុះដល់ ១៥អង្សាសេ ។
ចំណែកតំបន់មាត់សមុទ្រមានសីតុណ្ហភាពអប្បបរមាមានពី១៨-២០ អង្សាសេសីតុណ្ហភាពអតិបរមា មានពី២៧-២៩អង្សាសេ ។ អាចមានអាកាសធាតុត្រជាក់បន្តិចបន្តួច និងខ្យល់ខុសធម្មតា (ខ្យល់រដូវ) ។
ក្រសួងសូមសាធារណជនទទួលជ្រាបជាព័ត៌មាន និងយកចិត្តទុកដាក់ខ្ពស់ ចំពោះការធ្លាក់ចុះនៃសីតុណ្ហភាពត្រជាក់នេះ ៕
ចែករំលែកព័តមាននេះ