ខេត្តសៀមរាប៖ ព្រះសង្ឃ និងពុទ្ធបរិស័ទចំណុះជើងវត្ដ និងប្រជាពលរដ្ឋ ក្នុងក្រុងសៀមរាប បានសំដែងការមិនសប្បាយចិត្ត ចំពោះម្ចាស់សណ្ឋាគារ «ស្ទឹងសៀមរាប» ដែលបានឱ្យជាងសំណង់ មកវាយរបងវត្តនិងដាក់ម៉ាស៊ីនភ្លើង…
ខេត្តសៀមរាប៖ ព្រះសង្ឃ និងពុទ្ធបរិស័ទចំណុះជើងវត្ដ និងប្រជាពលរដ្ឋ ក្នុងក្រុងសៀមរាប បានសំដែងការមិនសប្បាយចិត្ត ចំពោះម្ចាស់សណ្ឋាគារ «ស្ទឹងសៀមរាប» ដែលបានឱ្យជាងសំណង់ មកវាយរបងវត្តនិងដាក់ម៉ាស៊ីនភ្លើង ចូលក្នុងវត្ត ដែលធ្វើឱ្យប៉ះពាល់ដល់ការសមាធិរបស់ព្រះសង្ឃ និងឧបាសក ឧបាសិកា។
ព្រះតេជគុណ តង់ តន ព្រះចៅអធិការវត្តព្រះព្រហ្មរ័ត្ន បានប្រាប់កោះសន្តិភាពនៅរសៀលថ្ងៃទី២៩ ខែវិច្ឆិកានេះថា ព្រះអង្គមិនថា អីទេ ករណីម្ចាស់សណ្ឋាគារ ដាក់ម៉ាស៊ីនភ្លើងក្នុងវត្តនេះ។ តែគណៈកម្មការវត្ត និងឧបាសក ឧបាសិកា ចំណុះជើងវត្ត ស្នើសុំម្ចាស់សណ្ឋាគារ«ស្ទឹងសៀមរាប» មេត្តាជួយធ្វើរបងនោះឡើងវិញ និងជួយយកម៉ាស៊ីនភ្លើងចេញពីក្នុងវត្តវិញផង។
ជុំវិញករណីខាងលើនេះ កោះសន្តិភាព បានព្យាយាមទាក់ទងទៅម្ចាស់សណ្ឋាគារ«ស្ទឹងសៀមរាប» ជាច្រើនដង ប៉ុន្តែទូរស័ព្ទរបស់គាត់ នៅក្រៅតំបន់សេសេវា។
ចំណែកលោក វណ្ណា ប៊ុនណា ប្រធានមន្ទីរធម្មការ និងសាសនា ខេត្តសៀមរាប មិនអាចទាក់ទងតាមទូរស័ព្ទបានទេនៅរសៀលថ្ងៃទី២៩ ខែវិច្ឆិកានេះ ដោយហៅចូលច្រើនដង តែគ្មានអ្នកទទួល។
រីឯលោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តសៀមរាប បានមានប្រសាសន៍ថា ករណីនេះ លោកនៅមិនទាន់បានដឹងនៅឡើយទេ។ លោកសន្យាថា នឹងឱ្យមន្ត្រីជំនាញចុះទៅពិនិត្យមើលជាបន្ទាន់។
គួរបញ្ជាក់ថា សណ្ឋាគារ«ស្ទឹងសៀមរាប» មានទីតាំងស្ថិតនៅពីខាងលិចស្ទឹងសៀមរាប ក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប ជាប់នឹងរបងវត្តព្រះព្រហ្មរ័ត្ន។
មហាជនរង់ចាំមើលថា តើអាជ្ញាធរពាក់ព័ន្ធទាំងអស់នៃខេត្តសៀមរាប អាចមានវិធានការយ៉ាងណា ចំពោះម្ចាស់សណ្ឋាគារខាងលើនោះ បានដែរ ឬទេ? ព្រោះរបងវត្ត គឺមានសប្បុរសជននានាជួយកសាង និងដាក់ឈ្មោះ តែពេលនេះ របងវត្ត ត្រូវបានគេធ្វើផ្ទះថ្មព័ទ្ធជុំវិញវត្ត គ្មានអ្នកណាម្នាក់ អាចមើលឈ្មោះសប្បុរសជន ពុទ្ធបរិស័ទ ជាអ្នកកសាងរបងនោះ បានទៀតឡើយ។ មិនត្រឹមប៉ុណ្ណោះ ក៏ត្រូវគេវាយកម្ទេច ហើយយកដីវត្ត ទៅបម្រើផលប្រយោជន៍ផ្ទាល់ខ្លួនដូច្នេះទៀត៕ ច័ន្ទ រស្មី
ចែករំលែកព័តមាននេះ