ខេត្តព្រៃវែង ៖ បើទោះបីជាជំងឺកូវីដ១៩កាចសាហាវយ៉ាងណាក៏ដោយ ប៉ុន្តែសម្រាប់ក្រុមអ្នកញៀនល្បែងនៅក្នុងខេត្តព្រៃវែង ពួកគេមិនខ្លាចឆ្លងកូវីដសោះឡើយ ដោយបាននាំគ្នាទៅប្រមូលផ្តុំលេងល្បែងជល់មាន់, អាប៉ោង, បៀរយ៉ាងគគ្រឹកគគ្រេងជារៀងរាល់ថ្ងៃ នៅក្នុងកាស៊ីណូមួយកន្លែងឈ្មោះ «ម៉ូណាកូ» ដែលស្ថិតនៅជាប់មាត់ច្រកទ្វារព្រំដែនអន្តរជាតិបន្ទាយចក្រី ក្នុងស្រុកព្រះស្តេច ខេត្តព្រៃវែង ។
ប្រភពព័ត៌មានពីមន្ត្រីនៅមាត់ច្រកបន្ទាយចក្រីនេះបានអោយដឹងថា ក្នុងពេលដែលរដ្ឋាភិបាលប្រកាសបិទក្លឹបកម្សាន្ត និងរមណីយដ្ឋាននានា ដើម្បីទប់ស្កាត់ការឆ្លងរាលដាលនៃជំងឺកូវីដ១៩នោះ កាស៊ីណូ «ម៉ូណាកូ» ក៏ត្រូវបានបិទទ្វារដែរ ប៉ុន្តែសុខៗនៅថ្ងៃទី២៣ វិច្ឆិកា ថ្មីៗនេះ ស្រាប់តែកាស៊ីណូមួយនេះបើកដំណើរការឡើងវិញ ដោយមានប្រជាពលរដ្ឋខ្មែរ នាំគ្នាចូលទៅលេងយ៉ាងគគ្រឹកគគ្រេង និងជារៀងរាល់ថ្ងៃ ដោយគ្មានការរំខានពីមន្ត្រីជំនាញណាឡើយ ។
ក្រុមអ្នកញៀនល្បែងដែលបានចូលទៅលេងក្នុងកាស៊ីណូ «ម៉ូណាកូ» នេះ បានបង្ហើបប្រាប់ថា ម្ចាស់កាស៊ីណូនេះ មិនមែនជាអ្នកបើកដំណើរការលេងផ្ទាល់នោះទេ គឺមានមនុស្សមួយក្រុម ដែលមានគ្នា៦នាក់ បានចូលហ៊ុនគ្នាជួលទីតាំងកាស៊ីណូនេះបើកលេង ដោយគេបានស្គាល់ឈ្មោះទី១-ឈ្មោះ ធិន នៅផ្សារទ្រា ទី0២-ឈ្មោះ រា នៅផ្សារទ្រា ទី៣-ឈ្មោះ ធា នៅផ្សារដីក្រហម ទី៤-ឈ្មោះ អ៊ី មន្ត្រីសុរិយោដី ទី៥-ឈ្មោះ សុក ចន្ទ័រិទ្ធ ជាអធិការរងស្រុកព្រះស្តេច និងទី៦-មិនត្រូវបានគេស្គាល់អត្តសញ្ញាណ
ទេ ។
ចំពោះការបើកអោយប្រជាជនខ្មែរ ចូលលេងល្បែងយ៉ាងគគ្រឹកគគ្រេង ក្នុងកាស៊ីណូ«ម៉ូណាកូ» នេះ ត្រូវបានមេការកាស៊ីណូឈ្មោះ តី ប្រាប់អោយដឹងតាមទូរសព្ទ័ថា ក្រោយពីឮសម្តេចតេជោ ប្រកាសអោយបើកដំណើរការលើគ្រប់វិស័យនោះ គេក៏បានស្នើសុំការអនុញ្ញាតពីឯកឩត្តម ជា សុមេធី អភិបាលខេត្តព្រៃវែង និងលោក ព្រុំ សន្ធរ ស្នងការនគរបាលខេត្តព្រៃវែង ដើម្បីបើកដំណើរការកាស៊ីណូឡើងវិញ ហើយឯកឩត្តម ជា សុមេធី ក៏បានឯកភាព ឯលោក ព្រុំ សន្ធរ ស្នងការខេត្តក៏បានអនុញ្ញាតអោយបើក ទើបខាងកាស៊ីណូ ហ៊ានបើកដំណើរការរហូតដល់ពេលនេះ ។
ទោះជាយ៉ាងណាក៏ដោយ មន្ត្រីមួយចំនួនបានបញ្ជាក់ប្រាប់ថា បើតាមច្បាប់ពាក់ពន្ធ័និងកាស៊ីណូ នៅក្នុងប្រទេសកម្ពុជា គឺគេមិនអនុញ្ញាតអោយប្រជាពលរដ្ឋខ្មែរចូលលេងល្បែងក្នុងកាស៊ីណូនោះទេ ម្យ៉ាងនៅក្នុងវិធានការទប់ស្កាត់ការឆ្លងរាលដាលនៃជំងឺកូវីដ១៩ ដែលរាជរដ្ឋាភិបាលបានដាក់ចេញនោះ ក៏បានហាមមិនអោយមានការប្រមូលផ្តុំគ្នាច្រើនដែរ ដូច្នេះ សកម្មភាពបើកលេងល្បែងក្នុងកាស៊ីណូ «ម៉ូណាកូ» នេះ គឺបានបំពានទាំងច្បាប់ប្រទេស និងបំពានទាំងវិធានការណែនាំរបស់រាជរដ្ឋាភិបាលផងដែរ ប៉ុន្តែមិនដឹងយ៉ាងម៉េច ទាំងអាជ្ញាធរ ទាំងសមត្ថកិច្ចក្នុងខេត្តព្រៃវែង បែរជានាំគ្នាសំងំស្ងាត់ឈឹងទៅវិញ ។
ជុំវិញរឿងរ៉ាវខាងលើនេះ នៅព្រឹកថ្ងៃទី២៩ វិច្ឆិកា កោះសន្តិភាពបានព្យាយាមខលទៅលោក ជា សុមេធី អភិបាលខេត្តព្រៃវែង ដើម្បីសុំការបំភ្លឺផងដែរ ប៉ុន្តែទូរសព្ទ័លោកខលចូលគ្មានអ្នកទទួល ចំណែកលោក ព្រុំ សន្ធរ ស្នងការខេត្តព្រៃវែងក៏ដូចគ្នាដែរ គឺទូរសព្ទ័ខលចូលហើយ តែគ្មានអ្នកទទួល។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ