ប្រទេសចិន ៖ តម្លៃនៃអចលនទ្រព្យនៅប្រទេសចិនក្នុងរយៈពេលបីខែដំបូងនេះបានកើនឡើង១០% ពីមួយឆ្នាំទៅមួយឆ្នាំ ប៉ុន្តែបានធ្លាក់ចុះពីមួយត្រីមាសទៅមួយត្រីមាសក្នុងអត្រា៧៣% ស្មើនឹងទឹកប្រាក់២,៨ប៊ីលានដុល្លារ។ នេះបើតាមរបាយការណ៍ដែលបានចុះផ្សាយដោយក្រុមហ៊ុនសេវាកម្មអចលនទ្រព្យ JLL ។
ការធ្លាក់ចុះនេះ ជាកត្តារួមចំណែកនៃកង្វះឆន្ទៈរបស់អ្នកលក់ និងកំណើនទីផ្សារមានភាពខុសគ្នារវាងទីក្រុងថ្នាក់ទីមួយ និងថ្នាក់ទីពីររបស់ចិន ។ គម្លាតដ៏ធំរវាងការរំពឹងទុករបស់អ្នកលក់ និងអ្នកទិញ គឺជាលទ្ធផលនៃទ្រព្យសកម្មដែលពិបាករក ។ ក្នុងនោះដែរ វិនិយោគិននឹងបន្តស្វែងរកទ្រព្យសកម្មដែលមានស្ថិរភាពនៅក្នុងទីក្រុងធំៗ បន្ទាប់ពីការវិនិយោគនៅឆ្នាំ២០១៥ ។
ទន្ទឹមនឹងនេះ សកម្មភាពវិនិយោគអចលនទ្រព្យនៅក្រុងហុងកុងនាត្រីមាសទី១ បានកើនឡើងទ្វេដងពីមួយឆ្នាំទៅមួយឆ្នាំ ស្មើនឹង២,៩ប៊ីលានដុល្លារ ។
សម្រាប់តំបន់អាស៊ីប៉ាស៊ីហ្វិកទាំងមូល ការវិនិយោគនៅត្រីមាសទី១ បានធ្លាក់ចុះ៥% ពីមួយឆ្នាំទៅមួយឆ្នាំ ស្មើនឹង២៣,៧ប៊ីលានដុល្លារ ខណៈដែលមានការចុះខ្សោយនៅប្រទេសជប៉ុន និងបានកើនឡើងនៅហុងកុង អូស្ត្រាលី និងកូរ៉េខាងត្បូង ។
ជាក់ស្តែង តម្លៃកិច្ចព្រមព្រៀងនៅប្រទេសជប៉ុន ដែលជាទីផ្សារធំជាងគេក្នុងតំបន់បានធ្លាក់ចុះ២៦%កាលពីឆ្នាំមុន ប៉ុន្តែបានកើនឡើង ៦៥%ពីមួយត្រីមាសទៅមួយត្រីមាស ស្មើនឹង ៩,៦ប៊ីលានដុល្លារ ។
យោងតាមរបាយការណ៍បានឲ្យដឹងទៀតថា វិនិយោគិនហាក់ដូចជាចូលចិត្តទីផ្សារក្នុងស្រុក ប្រហែលដោយសារតែភាពមិនប្រាកដប្រជានៃសេដ្ឋកិច្ចសកល ជាមួយនឹងការកើនឡើងនៃតម្លៃកិច្ចព្រមព្រៀងអន្តរតំបន់នៅត្រីមាសទីមួយបានកើនឡើងច្រើនជាង២៦០% ពីមួយឆ្នាំទៅមួយឆ្នាំ ស្មើនឹង៤ប៊ីលានដុល្លារ ៕
ចែករំលែកព័តមាននេះ