អូស្ត្រាលីដើរតាមអាមេរិក ពិចារណាធ្វើពហិការ ការ ទូតកីឡាអូឡាំពិកក្រុងប៉េកាំង
ស៊ីដនី ៖ អូស្ត្រាលីកំពុងពិចារណាមិនបញ្ជូនមន្ត្រីរដ្ឋាភិបាលខ្លួនទៅចូលរួមព្រឹត្តិការណ៍កីឡាអូឡាំពិករដូវរងាទីក្រុងប៉េកាំងឆ្នាំ
ស៊ីដនី ៖ អូស្ត្រាលីកំពុងពិចារណាមិនបញ្ជូនមន្ត្រីរដ្ឋាភិបាលខ្លួនទៅចូលរួមព្រឹត្តិការណ៍កីឡាអូឡាំពិករដូវរងាទីក្រុងប៉េកាំងឆ្នាំ ២០២២ ឡើយ ខណៈការអំពាវនាវឱ្យធ្វើពហិការការទូតកំពុងកើនឡើងក្នុងចំណោមសមាជិកសភា។ នេះបើតាមប្រភពពីសារព័ត៌ មាន The Sydney Morning Herald បានរាយការណ៍កាលពីថ្ងៃទី២៥ ខែវិច្ឆិកា។
អូស្ត្រាលីបានចូលរួមជាមួយ សហរដ្ឋអាមេរិក អង់គ្លេស និងកាណាដា ក្នុងការពិចារណាធ្វើពហិការការទូតសម្រាប់ព្រឹត្តិការណ៍កីឡាលំដាប់ពិភពលោក ដែលប្រទេសចិនទទួលសិទ្ធិរៀបចំនៅឆ្នាំក្រោយ។
ការពិចារណាធ្វើពហិការការទូតនេះ នឹងមិនប៉ះពាល់ដល់អត្តពលិកទៅចូលរួមប្រកួតដណ្តើមមេដាយព្រឹត្តិការណ៍នោះទេ។ ដោយគ្រាន់តែប្រទេសទាំងនោះ មិនបញ្ជូនគណៈប្រតិភូរដ្ឋាភិបាលរបស់ខ្លួនទៅកាន់ទីក្រុងប៉េកាំង។ ហើយទង្វើនេះ ដើម្បីបង្ហាញការឆ្លើយតបទៅនឹងការរំលោ.ភបំពា.នសិទ្ធិមនុស្សពីសំណាក់ប្រទេសចិនលើជនជាតិភាគតិចអ៊ុយហ្គឺ (Uighur) និងជនជាតិភាគតិចមូស្លីមផ្សេងទៀតនៅតំបន់ស៊ីនជាំង ។
របាយការណ៍ពី The Sydney Morning Herald បានបន្តថា រដ្ឋាភិបាលអូស្ត្រាលីកំពុងរង់ចាំការសម្រេចចិត្តពីរដ្ឋបាលរបស់ប្រធានាធិបតីអាមេរិក ចូ បៃឌិន (Joe Biden) ហើយទើបអូស្ត្រាលីសម្រេចចិត្តតាមក្រោយ ។
ជាមួយគ្នានោះ លោក Eric Abetz សមាជិកសភាមកពីគណបក្ស Liberal ដែលកំពុងកាន់អំណាចបាននិយាយថា «សហរដ្ឋអាមេរិក និងចក្រភពអង់គ្លេស កំពុងផ្តល់ការពិចារណាយ៉ាងសំខាន់លើការធ្វើពហិការការទូត។ ខ្ញុំគ្រាន់តែសង្ឃឹមថា នៅពេលទទួលបានសំឡេងគាំទ្របន្ថែម នោះសន្ទុះរបស់ប្រទេសស្រឡាញ់សេរីភាពនៃពិភពលោក នឹងក្រោកឈរដើម្បីនិយាយទៅកាន់របបផ្តាច់ការថា គ្រប់គ្រាន់ហើយ»។ នេះជាសម្តីលោក Abetz ដែលនិយាយសំដៅដល់ប្រទេសចិន។
គួរបញ្ជាក់ថា ព្រឹត្តិការណ៍អូឡាំពិករដូវរងាទីក្រុងប៉េកាំងឆ្នាំ ២០២២ នឹងចាប់ផ្តើមនាថ្ងៃទី៤ ខែកុម្ភៈ រហូតដល់ថ្ងៃទី២០ ខែកុម្ភៈ។ ស្របពេលប៉ារ៉ាឡាំពិកនឹងចាប់ផ្តើមនាថ្ងៃទី៤ ខែមីនា រហូតដល់ថ្ងៃទី១៣ ខែមីនា៕ (ប្រភពពី Reuters និង Kyodo)
ចែករំលែកព័តមាននេះ